Emighanzo 27:1-23
27 Neryo abali ba Zelofehadi, mughala wa Heferi, mughala wa Gileadi, mughala wa Makiri, mughala wa Manase, b’omo bihanda bya Manase, mughala wa Yozefu, mubasa. Habya Mala, Noa, Hogla, Milka, na Tirza.
2 Mubimana embere sya Musa, omuhereri Eleazari, abakulu, n’embere sy’Abaisraeli bosi oko mulango w’ehema y’erihindanamo. Mubabugha bati:
3 “Baba wetu mwaholera omo mbwarara, aliwe iye syabya omo bandu abayighunga busana n’eripinga Yehova, abandu ba Kora. Iye mwahola busana n’erilolo riwe-riwe, kandi mwatabuta omwana w’obulume.
4 Erina rya baba wetu rikendibiriranwa omo kihanda kiwe kundi mwatabuta omwana w’obulume? Mutuhe ekitaka ng’abaghala b’abobaba wetu.”
5 Neryo Musa mwayabwira Yehova omwatsi oyo.
6 Neryo Yehova mwabwira Musa ati:
7 “Abali ba Zelofehadi basingene. Isiwanatabula eribaha ekitaka ekikendibya mwandu wabo ng’abaghala babo baba wabo. Ubahe omwandu ogho wangahere baba wabo.
8 Kandi ubwire Abaisraeli uti, ‘Omundu amahola isyalyatabuta omwana w’obulume, mukendisyabya mukaha mwali wiwe y’omwandu wiwe.
9 Amabya isyawite n’omwana w’obukali, imwaha abaghala babo b’omwandu wiwe.
10 Amabya isyawite n’oko baghala babo, imwaha abaghala babo baba wiwe b’omwandu wiwe.
11 Na baba wiwe amabya isyawite oko baghala babo, omwandu wiwe iniakendihabwa omutunga wiwe w’ahakuhi-kuhi omo kihanda, oyo yukendimya omwandu oyo. Ebyo namayisogha bino bikendibya mughambo ogho Baisraeli bakendibya bakakwama, ngoko Yehova anabwira Musa.’”
12 Enyuma sy’aho, Yehova mwabwira Musa ati: “Hetukira oko kitwa kino kye Habarimu, ulangire ekihugho ekyo ngendiha Abaisraeli.
13 Ukendibya wabilangirakyo, naghu ukendihindanibwa* n’abandu baghu, ng’omughala wenyu Haruni.
14 Kundi omughulu Abaisraeli banibugha-bughako omo mbwarara ye Zini, mumutasikya ebyo nababwira. Mumutaniha olukengerwa embere sy’Abaisraeli omughulu nabaha amaghetse. W’amaghetse we Meriba, e Kadeshi, omo mbwarara ye Zini.”
15 Neryo Musa mwabwira Yehova ati:
16 “Yehova oMungu oyukaha abandu bosi b’engebe* asombolere Abaisraeli b’omulume
17 oyukendibya akabasondola omo myatsi yosi n’oyo bakendibya bakakwama omo myatsi yosi, neryo abandu ba Yehova sibendibya ng’esyombuli esitawite mulisya.”
18 Neryo Yehova mwabwira Musa ati: “Imaya Yosua, mughala wa Nuni, omulume w’obutoki, umuhireko ebyala.
19 Neryo umwimanaye embere sy’omuhereri Eleazari, n’embere sy’Abaisraeli bosi. Ukendimuyira m’omusondoli embere syabo.
20 Ukendimuha oko lukengerwa lwaghu, Abaisraeli bosi batoke eribya bakamuhulikirira.
21 Akendimana embere sy’omuhereri Eleazari oyukendibya akamubulirya Yehova y’obusondoli erilabira e Urimu. Iye n’Abaisraeli bosi, ni bugha ambu, endeko yosi bakendisyabya bakakwama ekyo amabugha.”
22 Neryo Musa mwakola ngoko Yehova amubwira. Mwimya Yosua, amamwimania embere sy’omuhereri Eleazari n’embere sy’Abaisraeli bosi.
23 Mwamuhirako ebyala biwe, neryo amamuyira m’omusondoli, ngoko Yehova anabwira Musa.
Amaelezo awehikwa
^ Ebi ni binywa by’ekisosekanio ebikamaanisaya erihola.
^ Kinywa kwa kinywa, “oMungu w’ebirimu by’emibiri yosi.”
