Emighanzo 28:1-31
28 Enyuma sy’aho, Yehova mwabwira Musa ati:
2 “Ubwire Abaisraeli uti, ‘Isimwabula eribya mukaniherera obuhere bwaghe, akalyo kaghe. Amahere waghe agho mukendisyabya mukaniherera omo muliro awakaluamo ekikumbo ekyuwene ekikanitsemesaya,* mukendisyabya mukahereragho oko mughulu owabirihirwaho.’
3 “Kandi ubabwire uti, ‘Buno b’obuhere obo mukendisyabya mukaherera Yehova omo muliro: Obuli kiro, mukendisyabya mukaherera ebyana bibiri by’esyombuli eby’obulume by’omwaka mughuma-mughuma ebiteko bulema. Mukendibya mukahererabyo mo buhere bw’eryokererya.
4 Mukendisyabya mukaherera ekyana kighuma ky’embuli eky’obulume omo tututu, n’ekindi omw’igholo-gholo.*
5 Mukendisyabya mukahirako n’obuhere bw’akalyo ni bugha ambu, ekighuma ky’omw’ikumi kye efa* y’efarine eyuwene eyitswangenemo ekighuma ky’oko bini ky’ehini* y’amaghuta w’emizeituni eyiryatwangawa.
6 Ni buhere bw’ebiro byosi bw’eryokererya obo Mungu atsukisaya oko Kitwa kye Sinai, obuhere obukahererawa omo muliro, obukaluamo ekikumbo ekyuwene ekikatsemesaya* Yehova.
7 Mukendisyabya mukahira oko buhere obo kw’ekihembo ky’obwabu, ni bugha ambu, obuli mbuli eyikendisyabya ikayako ekighuma ky’omo bini ky’ehini. Mukendisyabya mukuta obwabu obukalire ahabuyirire mo kihembo ky’obwabu ekyo mukaha Yehova.
8 N’ekindi kyana ky’embuli ky’obulume, mukendisyabya mukahererakyo omw’igholo-gholo.* Mukendisyabya mukahererakyo ngoko mulyaherera ekyana ky’embuli ky’omo tututu, ni bugha ambu, mukendisyabya mukahirako obuhere bw’akalyo n’ekihembo ky’obwabu. Mukendisyabya mukahererakyo ng’obuhere obukahererawa omo muliro obukaluamo ekikumbo ekyuwene ekikatsemesaya* Yehova.
9 “‘Aliwe ekiro ky’Esabato, mukendisyabya mukaherera ebyana bibiri by’esyombuli eby’obulume eby’omwaka mughuma-mughuma ebiteko bulema n’ebibiri by’omw’ikumi bye efa y’efarine eyuwene, eyitswangenemo amaghuta mo buhere bw’akalyo. Mukendisyabya mukahirako n’ekihembo ky’obwabu.
10 Obo ni buhere bw’eryokererya bw’ekiro ky’Esabato. Mukendisyabya mukahererabo haghuma n’obuhere bw’eryokererya obo mukaherera biro byosi n’ekihembo kyabo ky’obwabu.
11 “‘Oko mwanzo w’obuli mwisi, mukendisyabya mukaherera Yehova obuhere bw’eryokererya. Ebyo mukendisyabya mukaherera bya bino: Esyonume ibiri sy’esyonde esikine nyilere, embangale nguma, ebyana 7 by’esyombuli by’obulume eby’omwaka mughuma-mughuma.
12 Oko buli nume y’ende, mukendisyabya mukahirako obuhere bw’akalyo, ni bugha ambu, ebisatu by’omw’ikumi by’efarine eyuwene eyitswangenemo amaghuta. Oko mbangale nguma, mukendisyabya mukahirako obuhere bw’akalyo, ni bugha ambu, ebibiri bw’omwikumi by’efarine eyuwene eyitswangenemo amaghuta.
13 Oko kyana kighuma ky’embuli eky’obulume, mukendisyabya mukahirako obuhere bw’akalyo, ni bugha ambu, ekighuma ky’omw’ikumi ky’efarine eyuwene eyitswangenemo amaghuta. Ni buhere bw’eryokererya obukaluamo ekikumbo ekyuwene,* obuhere obo mukaherera Yehova omo muliro.
14 N’ekihembo ky’obwabu ekyo mukendisyabya mukahira oko nume y’ende, kikendisyabya kikabya enusu y’ehini, n’ekighuma ky’omo bisatu ky’ehini oko mbangale, n’ekighuma ky’omo bini ky’ehini oko kyana ky’embuli eky’obulume. Obo ni buhere bw’eryokererya bw’oko buli mwisi w’omwaka.
15 Eritomeka oko buhere bw’eryokererya bw’obuli kiro n’oko kihembo kyabo ky’obwabu, mukendisyabya mukaherera Yehova embene eyikine nyilere mo buhere bw’erilolo.
16 “‘Ekiro 14 ky’omwisi w’ekwanza, mukendisyabya mukakola Epasaka ya Yehova.
17 N’ekiro kye 15 ky’omwisi oyo, kikendisyabya kikabya kiro kikulu. Mukendisyabya mukalya omukati owatemo levire* omo biro 7.
18 Ekiro ky’ekwanza, mukendisyabya mukakola omuhindano mubuyirire. Simwendisyabya mukakola omubiiri wosi-wosi owakalire.
19 Kandi mukendisyabya mukaherera Yehova esyonume ibiri sy’esyonde esikine nyilere, embangale nguma, ebyana 7 by’esyombuli eby’obulume eby’omwaka mughuma-mughuma. Mukendisyabya mukahererabyo mo buhere bw’eryokererya obukahererawa omo muliro. Mukendisyabya mukaherera esyonyama esiteko obulema.
20 Mukendisyabya mukahererasyo haghuma n’obuhere bw’akalyo obw’efarine eyuwene eyitswangenemo amaghuta. Oko buli nume y’ende, mukendisyabya mukahirako ebihande bisatu by’omw’ikumi by’efarine. Oko buli mbangale, mukendisyabya mukahirako ebibiri by’omwikumi by’efarine.
21 N’oko byana 7 by’esyombuli eby’obulume, mukendisyabya mukahirako ekighuma ky’omw’ikumi eky’efarine.
22 Kandi mukendisyabya mukaherera embene mo buhere bw’erilolo mutoke erighanyirwa amalolo wenyu.
23 Mukendisyabya mukaongezya ebyo oko buhere bw’eryokererya bw’omo tututu, obukahererawa buli kiro.
24 Mukendisyabya mukahererabyo ngoko mukanaherera ebindi obuli kiro omo biro 7 mo buhere bw’akalyo,* obuhere obukahererawa omo muliro, obukaluamo ekikumbo ekyuwene ekikatsemesaya* Yehova. Mukendisyabya mukahererabo haghuma n’obuhere bw’eryokererya bw’obuli kiro n’ekihembo kyabo ky’obwabu.
25 Omo kiro kye 7, mukendisyabya mukakola omuhindano mubuyirire. Simwendisyabya mukakola omubiiri wosi-wosi owakalire.
26 “‘Ekiro ky’eriherera akalyo k’erimbere akalyasolomawa, omughulu mukendisyaherera Yehova obuhere bw’akalyo akakalua erisolomwa, mukendisyabya mukakola omuhindano mubuyirire omo kiro kikulu ky’amayenga. Simwendisyabya mukakola omubiiri wosi-wosi owakalire.
27 Mukendisyabya mukaherera obuhere bw’eryokererya obukaluamo ekikumbo ekyuwene ekikatsemesaya* Yehova. Mukendisyabya mukaherera esyonume sy’esyonde ibiri esikine nyilere, embangale nguma, ebyana 7 by’esyombuli eby’omwaka mughuma-mughuma.
28 Oko buli nume y’ende, mukendisyabya mukahirako obuhere bw’akalyo bw’efarine eyuwene eyitswangenemo amaghuta, ni bughambu, ebibiri by’omw’ikumi by’efarine. Oko mbangale, mukendisyabya mukahirako ebibiri by’omw’ikumi by’efarine.
29 Oko buli ky’ana ky’embuli eky’obulume ky’oko byana 7 ebyo, mukendisyabya mukahirako ekighuma ky’omw’ikumi eky’efarine.
30 Mukendisyabya mukaherera n’embene nguma eyikine nyilere amalolo wenyu atoke erighanyirwa.
31 Mukendisyabya mukaongezya ebyo oko buhere bw’eryokererya bw’obuli kiro n’obuhere bwabo bw’akalyo. Mukendisyabya mukaherera esyonyama esiteko bulema, kandi imwahirako n’ebihembo by’obwabu.
Amaelezo awehikwa
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kinywa kwa kinywa, “omo kati-kati k’amagholo abiri.”
^ Ekighuma ky’omw’ikumi kye efa ini syolitre 2,2. Ulebaye Endomeko B14.
^ Ehini nguma ini syolitre 3,67. Ulebaye Endomeko B14.
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kinywa kwa kinywa, “omo kati-kati k’amagholo abiri.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “kihamya.”
^ Kinywa kwa kinywa, “bw’omukati.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
