Emighanzo 3:1-51
3 Aba bo babya bana* ba Haruni na Musa omughulu Yehova akanaya na Musa oko Kitwa kye Sinai.
2 Abaghala ba Haruni babya Nadabu akambere, Abihu, Eleazari, na Itamari.
3 Abo bo babya baghala ba Haruni, abahereri abahirawako amaghuta batoke eriyirwa mo* bahereri.
4 Aliwe, Nadabu na Abihu mubaholera embere sya Yehova omughulu baherera omuliro owatahamulirwe embere sya Yehova omo mbwarara ye Sinai. Mubatabuta abana. Aliwe Eleazari na Itamari mubalola embere eribya bahereri haghuma na Haruni baba wabo.
5 Neryo Yehova mwabwira Musa ati:
6 “Ulete Abalawi, bimane embere sy’omuhereri Haruni. Bakendibya bakamukolera.
7 Bakendibya bakamukolera n’erikolera endeko yosi y’Abaisraeli omw’ikola emibiiri yabo oko hema.
8 Bakendibya bakateya ebindu byosi ebikakolesibawa oko hema y’erihindanamo, kandi bakendisyabya bakakolera Abaisraeli omw’ikola emibiiri eyikakolawa eyiri ehema.
9 Haruni n’abaghala biwe, ukendihabo Abalawi. Ni bandu abo Mungu akamuha omo bana ba Israeli.
10 Ukendiyira Haruni n’abaghala biwe mo bahereri, neryo bakendibya bakakola emibiiri y’abahereri. Omundu oyute muhereri* amabihika hakuhi n’ehema, iniakenditibwa.”
11 Kandi Yehova mwabwira Musa ati:
12 “Ingye ngayimiraya Abalawi omo mwanya w’ehimbere hyosi* hy’Abaisraeli. Abalawi ni baghe.
13 Kundi obuli kambere ni kaghe. Omughulu niita obuli kambere omo kihugho kye Misri, munayiyirira ehimbere hyosi hye Israeli mo hibuyirire. Ehimbere hy’abandu n’ehy’esyonyama, ni hyaghe. Ingye Yehova.”
14 Kandi Yehova mwakania na Musa omo mbwarara ye Sinai, ati:
15 “Uhandike abaghala ba Lawi erikwamana n’ebitunga byabyo n’ebihanda byabo. Uhandike obuli mulume eritsuka oko w’omwisi mughuma.”
16 Neryo Musa mwahandikabo, ngoko Yehova amubwira.
17 Abaghala ba Lawi ni Gershoni, Kohati, na Merari.
18 Abaghala ba Gershoni erikwamana n’ebihanda byabo ni Libni na Shimei.
19 Abaghala ba Kohati erikwamana n’ebihanda byabo ni Amramu, Izihari, Hebroni, na Uzieli.
20 Abaghala ba Merari erikwamana n’ebihanda byabo ni Mali na Mushi.
Ebyo byo byabya bihanda by’Abalawi erikwamana n’ebitunga byabo.
21 Gershoni yo wabuta ekihanda ky’Abalibni n’ekihanda ky’Abashimei. Ebyo byo byabya bihanda by’Abagershoni.
22 Abalume bosi b’eritsuka oko mwisi mughuma abahandikawa babya 7 500.
23 Ebihanda by’Abagershoni byabya bikapanga enyuma sy’ehema, oko luhande lw’eyo ryuba rikalengera.
24 Omukulu w’ekitunga ky’Abagershoni abya Eliasafu, mughala wa Laeli.
25 Omubiiri ogho baghala ba Gershoni babya bakakola oko hema y’erihindanamo abya eriteya ehema, ebindu ebyabya bikaswikayo, erido y’oko mulango w’ehema y’omuhindano,
26 esyorido esitimbire oko kibugha, erido y’oko mulango w’obutala obutimbire oko hema n’oko kiherero, esyokamba sy’ehema, n’erikola emibiiri yosi eyilebirye ebindu ebyo.
27 Kohati yo w’abuta ekihanda ky’Abaamramu, ekihanda ky’Abaizihari, ekihanda ky’Abahebroni, n’ekihanda ky’Abauzieli. Ebyo byo byabya bihanda by’Abakohati.
28 Abalume bosi b’eritsuka oko mwisi mughuma abahandikawa babya 8 600; bo babya bakateya ahabuyirire.
29 Ebihanda by’abaghala ba Kohati byabya bikapanga oko luhande lw’eyikwa lw’ehema.
30 Omukulu w’ekitunga ky’Abakohati abya Elizafani, mughala wa Uzieli.
31 Babya n’omubiiri w’eriteya esanduku, emeza, ekindu ky’erihirako esyotala, ebiherero, ebindu ebikakolesibawa omo mubiiri w’ahabuyirire, erido, n’erikola emibiiri yosi eyilebirye ebindu ebyo.
32 Omukulu w’abakulu b’Abalawi abya Eleazari, mughala w’omuhereri Haruni. Abya akimanira abakakolera ahabuyirire.
33 Merari yo w’abuta ekihanda ky’Abamali n’ekihanda ky’Abamushi. Ebyo byo bihanda bya Merari.
34 Abalume bosi b’eritsuka oko mwisi mughuma abahandikawa babya 6 200.
35 Omukulu w’ekitunga ky’ebihanda bya Merari abya Zurieli, mughala wa Abihaili. Abamerari babya bakapanga oko luhande lw’endata lw’ehema.
36 Abaghala ba Merari babya n’omubiiri w’eriteya ehikadre hy’ehema, ebibatsi byayo, esyonduyi syayo, ebindu by’erimaniako ehikadre hyayo, n’ebindu ebikakolesibawa oko hema, n’erikola emibiiri yosi eyilebirye ebindu ebyo.
37 Kandi ibakateghaya esyonduyi esitimbire oko butala, ebindu by’erimaniako esyonduyi esyo, emisumari yayo, n’esyokamba syayo.
38 Musa, Haruni, n’abaghala biwe bo babya bakapanga embere sy’ehema, eluhande lw’eyo ryuba rikasira, embere sy’ehema y’erihindanamo. Bo babya bakateya ahabuyirire. Oyo w’omubiiri ogho babya bakakolera Abaisraeli. Omundu wosi-wosi oyute Mulawi* amabihika ahabuyirire, ritolere inyitibwa.
39 Abalume bosi ababya Balawi ab’eritsuka oko mwisi mughuma abo Musa na Haruni bahandika erikwamana n’ebihanda byabo ngoko Yehova abugha babya 22 000.
40 Kandi Yehova mwabwira Musa ati: “Uhandike ehimbere hyosi hy’Abaisraeli hy’eritsuka oko mwisi mughuma, ughanzehyo, kandi uhandike amena wahyo.
41 Unyimiraye Abalawi omo mwanya w’ehimbere hyosi hy’Abaisraeli, kandi wimaye esyonyama esikatungawa sy’Abalawi omo mwanya w’ehimbere hy’esyonyama esikatungawa sy’Abaisraeli. Ingye Yehova.”
42 Neryo Musa mwahandika ehimbere hyosi hy’Abaisraeli, ngoko Yehova amubwira.
43 Ehimbere hyosi hy’eritsuka oko mwisi mughuma ehyahandikawa erikwamana n’amena wahyo hyabya 22 273.
44 Kandi Yehova mwabwira Musa ati:
45 “Wimaye Abalawi omo mwanya w’ehimbere hyosi hy’Abaisraeli, kandi wimaye esyonyama sy’eritunga sy’Abalawi omo mwanya w’esyonyama sy’eritunga sy’Abaisraeli. Abalawi ni baghe. Ingye Yehova.
46 Emighanzo y’ehimbere hye Israeli muyikabya minene kulenga emighanzo y’Abalawi. Muyikalabiramo ehimbere 273. Erikombola ehimbere ehyo ehiryalabiramo,
47 ukendimya esyoshekeli itano omo mwanya w’obuli kambere erikwamana n’eshekeli y’ahabuyirire.* Eshekeli nguma ni syogera* 20.
48 Ukendiha esyofranga esyo syo Haruni n’abaghala biwe mo syofranga esikakombola ehimbere hy’Abaisraeli ehiryabya hinene oko mighanzo y’Abalawi.”
49 Neryo Musa mwimya esyofranga esiryakombola ehimbere hy’Abaisraeli ehiryabya hinene oko mighanzo y’Abalawi.
50 Mwimya esyofranga sy’erikombola ehimbere hy’Abaisraeli, syabya esyoshekeli 1 365 erikwamana n’eshekeli y’ahabuyirire.
51 Neryo Musa mwaha esyofranga sy’erikombola ehimbere ehyo syo Haruni n’abaghala biwe erikwamana n’ekinywa* kya Yehova, ngoko Yehova abwira Musa.
Amaelezo awehikwa
^ Kinywa kinywa, “bizazi; syondengo.”
^ Kinywa kwa kinywa, “abo ebyala byabo byusulibawa.”
^ Kinywa kwa kinywa, “omugheni,” ni bugha ambu oyute omo kihanda kya Haruni.
^ Kinywa kwa kinywa, “obuli kambere akakakingula enda.”
^ Kinywa kwa kinywa, “oyuli mugheni.”
^ Kutse “erikwamana n’eshekeli eyibuyirire.”
^ Egera nguma ini grame 0,57. Ulebaye Endomeko B14.
^ Kinywa kwa kinywa, “n’obuno.”
