Emighanzo 30:1-16
30 Enyuma sy’aho, Musa mwabwira abakulu b’ebihanda bye Israeli ati: “Yehova mwakabugha ati:
2 Omundu amabiyilagha erikolera Yehova y’omwatsi mulebe kutse inialapa eritendibya akakola omwatsi mulebe, atolere iniasikya ebyo alyabugha. Atolere iniakola ebyosi ebyo alyalagha erikola.
3 “Omumbesa oyukine ewabo amabiyilagha erikolera Yehova y’omwatsi mulebe kutse inialapa eritendibya akakola omwatsi mulebe,
4 neryo baba wiwe iniaminya ngoko abiriyilagha erikola omwatsi mulebe kutse abirilapa eritendibya akakola omwatsi mulebe, aliwe baba wiwe iniataghana omwatsi oyo, aho ebyosi ebyo alyayilagha ibikendibya bitya, n’ebyosi ebyo alyalapa eritendibya akakola ibikendibya bitya.
5 Aliwe baba wiwe amabyowa ngoko mwali wiwe abiriyilagha erikola omwatsi mulebe kutse abirilapa eritendibya akakola omwatsi mulebe, neryo iniaghana omwatsi oyo, aho ebyo abiriyilagha isibyendibya bitya. Yehova iniakendimughanyira kundi baba wiwe mwakaghana.
6 “Aliwe amabilunga iniabiriyilagha erikola omwatsi mulebe kutse ihane omwatsi ogho ayilagha erikola omw’itendilengekania,
7 neryo omwira wiwe iniowa omwatsi oyo, aliwe iniataghanagho ekiro alyowagho, ebyo ayilagha erikola kutse ebyo alapa eritendibya akakola ibikendibya bitya.
8 Aliwe omwira wiwe amabighanabyo ekiro alyowabyo, aho ebyo omukali wiwe ayilagha erikola, kutse hamabya omwatsi ogho ayilagha omw’itendilengekania, ebyo ibyamahweraho, na Yehova iniakendimughanyira.
9 “Aliwe omukwa-kali kutse omukali oyo babirilekana n’omwira wiwe amabiyilagha erikola omwatsi mulebe, ritolere iniabererya ebyosi ebyo abiriyilagha.
10 “Aliwe omukali amabiyilagha erikola omwatsi mulebe kutse inialapa eritendibya akakola omwatsi mulebe inianikere n’omwira wiwe,
11 neryo omulume wiwe iniowa omwatsi oyo, aliwe iniataghanagho, ebyosi ebyo omukali oyo abiriyilagha erikola kutse ebyosi ebyo abirilapa eritendibya akakola ibikendibya bitya.
12 Aliwe omulume wiwe amabyowa ebyo omukali wiwe ayilagha erikola kutse ebyo alapa eritendibya akakola, neryo iniaghanabyo olosi ekiro alyowabyo, ibyamahwera aho. Yehova iniakendimughanyira kundi omulume wiwe mwakaghanabyo.
13 Omulume w’omundu yukaligha kutse erighana omwatsi wosi-wosi ogho mukali wiwe akayilagha erikola kutse ogho mukali wiwe akalapa eritendibya akakola.*
14 Aliwe omulume amabyowa ebyo mukali wiwe abiriyilagha, neryo ebiro bikalaba iniataghanabyo, ebyosi ebyo mukali wiwe abiriyilagha erikola kutse ebyosi ebyo mukali wiwe abirilapa eritendibya akakola ibikendibya bitya. Ibikendibya bitya kundi omulume wiwe mwataghana ekiro owabyo.
15 Aliwe enyuma sy’aho, amabighanabyo ekiro ekyo owabyo kyabilaba, ekosa y’omukali oyo iyikendibya oko mutwe w’omulume wiwe.
16 “Ebyo byo byalayiro ebyo Yehova abwira Musa ebilebirye omulume n’omukali wiwe, kandi ebilebirye baba na mwali wiwe oyukine ewabo.”
Amaelezo awehikwa
^ Kutse “eryaghalya enafsi yiwe.”
