Emighanzo 31:1-54
31 Enyuma sy’aho, Yehova mwabwira Musa ati:
2 “Uhe Abamidiani b’amalipizi busana n’ebyo bakolera Abaisraeli. Enyuma sy’aho, ukendihindanibwa* n’abandu baghu.”
3 Neryo Musa mwabwira abandu ati: “Muhe abalume abali omo kati-kati kenyu ebindu by’amalwa batoke eriyalwa na Midiani busana n’eriha Midiani amalipizi wa Yehova.
4 Mwimaye abalume 1 000 omo buli kihanda, omo bihanda byosi bye Israeli, mutumebo bayalwe.”
5 Neryo omo maelfu w’Abaisraeli, mubasombolamo abalume 1 000 omo buli kihanda, ni bugha ambu abalume 12 000 ababirihabwa ebindu by’amalwa batoke eriyalwa.
6 Neryo Musa mwatuma abalume 1 000 b’omo buli kihanda bayalwe. Finehasi, mughala w’omuhereri Eleazari, mwaghenda nabo inianahekire ebindu bibuyirire n’esyongunga esy’eribirikira abandu b’oko malwa.
7 Neryo mubalwa na Midiani, ngoko Yehova anabwira Musa. Mubita abalume bosi.
8 Kandi mubita n’abami be Midiani, ni bugha ambu Evi, Rekemu, Zuri, Huru, na Reba, abami batano be Midiani. Mubita na Balamu, mughala wa Beori, omo muyali.
9 Aliwe mubaheka abakali n’abana be Midiani mo banyewa. Mubapura esyonyama syabo syosi sy’eritunga, ebihangulo byabo byosi, n’ebindu byabo byosi.
10 Emiyi yosi eyo Bamidiani babya bikeremo n’esyokambi* syabo syosi, Abaisraeli mubatimyasyo omo muliro.
11 Mubaheka ebindu byosi ebyo bapura, ni bugha ambu abandu n’esyonyama.
12 Mubaleta abana abanyeghawa, ebindu ebyapurawa embere sya Musa, n’omuhereri Eleazari n’endeko yosi y’Abaisraeli omo kambi eyabya omo ribanda eriri ng’embwarara erye Moabu, hakuhi ne Yordani, e Yeriko.
13 Neryo Musa, omuhereri Eleazari, n’abakulu bosi b’Abaisraeli mubayahindana nabo ehihya w’ekambi.
14 Aliwe Musa mwahitana kutsibu oko bimaniri b’abasuda, abakulu b’amaelfu, n’abakulu b’amamia ababya bakalua oko malwa.
15 Musa mwabwirabo ati: “Kwe lero, simwitita abakali bosi!
16 Si munasi ngoko aba busana n’erikwama ebinywa bya Balamu mubaleka Abaisraeli ibaleghula oko Yehova omo mwatsi we Peori, n’ekyo mukyaleka ekihunzo ikyahikira abandu ba Yehova.
17 Neryo mwite obuli mwana w’obulume kandi mwite n’obuli mukali oyo wabirighotsera n’omulume.
18 Aliwe isimwita obuli mumbesa oyutewataghotsera n’omulume.
19 Kandi ritolere imwapanga ehihya w’ekambi omo biro 7. Owosi-wosi oyuliita omundu,* n’owosi-wosi oyulyatula oko kinda, ritolere iniayerya omo kiro ky’akasatu n’omo kiro kye 7, inywe n’abandu abalyanyeghawa.
20 Kandi mukendyerya obuli lukimba, obuli kindu ekikokotibwe omo ngobi, obuli kindu ekikokotibwe omo bweya bw’embene, n’obuli kindu ekikokotibwe omo muti busana n’erilusya kubyo kw’erilolo.”
21 Neryo omuhereri Eleazari mwabwira abalume abalua oko malwa ati: “Kino ky’ekyalayiro ekyo Yehova alyabwira Musa:
22 ‘Ehoro, efeza,* ekwivre, ekyuma, ekinzanza, erisasi,
23 n’obuli kindu ekikeribawa omo muliro, mukendilabyakyo omo muliro. Neryo kikendibya kindu eky’erire. Aliwe kandi ritolere ikyeribwa omo maghetse awakeraya. Aliwe obuli kindu ekitekyangeribwa omo muliro, mukendilabyakyo omo maghetse.
24 Mukendisyafula esyongyimba syenyu omo kiro kye 7 mutoke eribya abandu aberire, n’enyuma sy’aho imwasuba omo kambi.’”
25 Neryo Yehova mwabwira Musa ati:
26 “Ughanze abandu abalyanyeghawa n’ebindu ebiryanyeghawa. Ughanzebyo haghuma n’omuhereri Eleazari n’abakulu b’ebitunga bye Israeli.
27 Ughabe ebindu ebiryanyeghawa byo kabiri. Uhe abasuda abalyalwa b’enusu, n’eyindi nusu uheyo abandi Baisraeli.
28 Ukendimya enafsi* nguma omo buli syonafsi 500 esy’abandu, esy’esyonde, esy’esyopunda, n’esy’esyombuli, n’esyombene. Ekyo ni kitasi* kya Yehova.
29 Ukendimyakyo oko nusu yabo, n’erihakyo omuhereri Eleazari mo kihembo kya Yehova.
30 Oko nusu eyiryahabawa Abaisraeli, ukendimya enafsi nguma oko syonafsi 50 esy’abandu, esy’esyonde, esy’esyopunda, esy’esyombuli n’esy’esyombene, n’esy’obuli muhanda w’enyama eyikatungawa n’erihasyo Abalawi abakakola emibiiri y’oko hema ya Yehova.”
31 Neryo Musa n’omuhereri Eleazari mubakola ngoko Yehova anabwira Musa.
32 Ebindu ebyasaka oko ebyo abandu abaya omo malwa bapura, mubyabya esyombuli n’esyombene 675 000,
33 esyonde 72 000,
34 n’esyopunda 61 000.
35 Abakali ababya isibalibataghotsera n’omulume mubabya 32 000.
36 Enusu eyo babya batolere eriha abandu abaya oko malwa muyabya esyombuli n’esyombene 337 500.
37 Ekitasi* kya Yehova ekyalua oko syombuli n’esyombene mukyabya esyonyama 675.
38 Muhabya esyonde 36 000, n’ekitasi* kya Yehova ekyalua kusyo mukyabya esyonyama 72.
39 Kandi muhabya esyopunda 30 500, n’ekitasi* kya Yehova ekyalua kusyo mukyabya esyonyama 61.
40 Muhabya n’abandu 16 000, n’ekitasi kya Yehova ekyalua kubo mukyabya abandu 32.
41 Neryo Musa mwaha omuhereri Eleazari ekitasi* ekyo mo kihembo kya Yehova, ngoko Yehova anabwira Musa.
42 Enusu eyabya y’Abaisraeli, eyo Musa alusaya oko sehemu y’abandu abaya oko malwa
43 muyabya esyombuli n’esyombene 337 500,
44 esyonde 36 000,
45 esyopunda 30 500,
46 n’abandu* 16 000.
47 Musa mwakola ngoko Yehova anamubwira, mwimya oko nusu y’Abaisraeli kw’enafsi nguma oko syonafsi 50 sy’abandu, n’esy’esyonyama, amahasyo Abalawi ababya bakakola emibiiri oko hema ya Yehova.
48 Neryo ababya bakimanira abasuda, ni bughambu abakulu b’amaelfu, n’abakulu b’amamia, mubahika ahali Musa,
49 n’erimubwira bati: “Itwe baghombe baghu, twabirighanza abalume bosi abaya oko malwa, abo tukasondola. Sihali n’omughuma oyuteho.
50 Neryo ulighire obuli mughuma w’okw’itwe eriherera Yehova ekyo alyasunga, byangabya bindu by’ehoro, emiseghe y’oko bisando, ehibangila, esyombuka* esikakolesibawa erihira oko kindu kw’ekikumo, amaningita, n’ebindi bindu by’eriyipambamo, tutoke erikola obuhere obukendileka Yehova iniatughanyira.”*
51 Neryo Musa n’omuhereri Eleazari mubaligha ehoro eyo balume abo baleta, ni bugha ambu ebindu byosi by’eriyipambamo.
52 Ehoro yosi eyo baletera Yehova mo kihembo muyabya esyoshekeli* 16 750, abakulu b’amaelfu n’abakulu b’amamia bo baletayo.
53 Obuli mulume abya iniabirimya esehemu yiwe oko bindu ebiryanyeghawa.
54 Musa n’omuhereri Eleazari mubimya ehoro eyaletawa n’abakulu b’amaelfu n’abakulu b’amamia, mubatwalayo omo hema y’erihindanamo kusudi Abaisraeli babye bakibuka ebyo Yehova abakolera.
Amaelezo awehikwa
^ Ebi ni binywa by’ekisosekanio ebikamaanisaya erihola.
^ Kutse “esyokambi esiriko esyombimbo.”
^ Kutse “enafsi.”
^ Ni kindu ky’obughuli ekikalua omo kitaka.
^ Ulebaye Amaana w’ebinywa.
^ Kutse “musolo.”
^ Kutse “Omusolo.”
^ Kutse “n’omusolo.”
^ Kutse “n’omusolo.”
^ Kutse “omusolo.”
^ Kutse “n’esyonafsi sy’abandu.”
^ Kutse “esyobage; esyopeta.”
^ Kutse “iniaghanyira esyonafsi syetu.”
^ Eshekeli nguma ini syograme 11,4. Ulebaye Endomeko B14.
