Emighanzo 32:1-42
-
Ebihanda by’amikala eluhande lw’eyo ryuba rikasira lwe Yordani (1-42)
32 Abaghala ba Rubeni n’abaghala ba Gadi babya n’esyonyama nene, mubalangira ngoko ekiharo kye Hazeri n’ekye Gileadi byuwene erilisirya mubyo.
2 Neryo Abaghala ba Gadi n’abaghala ba Rubeni mubasungana na Musa, omuhereri Eleazari, n’abakulu b’Abaisraeli. Mubababwira bati:
3 “Ataroti, Diboni, Yazeri, Nimra, Heshboni, Eleale, Sebamu, Nebo, na Beoni,
4 ebiharo ebyo Yehova asinga embere sy’Abaisraeli, ni biharo ebyuwene erilisirya mubyo. Abaghombe baghu bawite esyonyama nene.”
5 Mubatasyabugha bati: “Wamabya iwabiritusima, utuhe itwe baghombe baghu ekihugho ekyo mo kyetu. Isiwatusokaya e Yordani.”
6 Neryo Musa mwabwira abaghala ba Gadi n’abaghala ba Rubeni ati: “Abaghala benyu bakendisyaya oko malwa, aliwe inywe imunikere eno?
7 Simwasi ngoko aho mukendileka Abaisraeli ibasagha erisoka e Yordani batoke eringira omo kihugho ekyo Yehova akendibaha?
8 Ekyo kyo abobaba wenyu bakola omughulu nabatuma niti bayalebaye ekihugho nga kiri kiti itune e Kadeshi-barnea.
9 Babere bahika omo Musya* we Eshkoli n’erilangira ekihugho ekyo, mubaleka Abaisraeli ibasagha eringira omo kihugo ekyo Yehova abya akasonda eribaha.
10 Ekiro ekyo, Yehova mwahitana kutsibu. Mwalw’inialapa ati:
11 ‘Abandu bosi abalua e Misri abali n’emyaka eritsuka oko 20 sibendisyalola oko kihugho ekyo nalapa eriha Abrahamu, Isaka, na Yakobo, kundi mubatetanikwama n’omutima wosi.
12 Kalebu, mughala wa Yefune, Omukenizi, na Yosua, mughala wa Nuni, abo basa bo bakendisyalola kukyo, kundi mubakwama Yehova n’omutima wosi.’
13 Neryo Yehova mwahitana oko Baisraeli ko kutsibu. Mwaghangya-ghangyabo omo mbwarara omo myaka 40, akalinda ati ekizazi* kyosi ekyabya kikakola ebibi omo meso wa Yehova kihweho.
14 Inywe bakola-nabi, munemukola ngoko abobaba wenyu bakola. Mukendileka Yehova iniatasyahitana kutsibu oko Baisraeli.
15 Mwamaleka erimukwama, kandi iniakasigha Abaisraeli omo mbwarara. Kandi imwamabitwira abandu bosi aba b’olubanza.”
16 Enyuma sy’aho, mubayabwira Musa bati: “Uleke tuhimbe hano ehiluba hy’amabwe ehy’esyonyama syetu, n’erihimbira abana betu b’emiyi.
17 Aliwe tukendisyabya itune tayari eriyalwa, kandi tukendisyabya tukabera Abaisraeli b’embere erihika omughulu tukendisyabahikya omo mwanya wabo. Tukendisyabya tukakola tutya abana betu ibanikere omo miyi eyo mundu ateangahikamo bweghu-bweghu, eyo abandu b’ekihugho ekyo sibangabakenderya.
18 Sitwendisyasuba omo manyumba wetu obuli Mwisraeli isyalyasunga ekitaka ekikendibya mwandu wiwe.
19 Sitwendisyahabwa omwandu haghuma nabo oko lundi luhande lwe Yordani n’erilaba okw’aho, kundi tukendisyabya itwabirihabwa omwandu wetu oko luhande lw’eyo ryuba rikasira olwe Yordani.”
20 Musa mwabasubirya ati: “Mwamabimya ebindu by’amalwa embere sya Yehova n’eriyalwa,
21 kandi obuli mughuma w’okw’inywe amabimya ebindu by’amalwa n’erisoka e Yordani embere sya Yehova akayatibita oko syonzighu siwe, silue embere siwe
22 erihika omughulu ekihugho kikendisyahambwa embere sya Yehova, aho ibwa imwanganasubula, kandi isimwendibyako ekosa embere sya Yehova n’embere sya Israeli. Neryo ekiharo ekyo ikikendibya kyenyu embere sya Yehova.
23 Aliwe mwamatendikola ekyo, imwamabikolera Yehova y’erilolo, neryo muminye ngoko erilolo ryenyu irikendibakwama.
24 Neryo muyahimbire abana benyu b’emiyi n’ebihangulo byenyu ehiluba, aliwe isimwabula erikola ebyo mwamalagha erikola.”
25 Abaghala ba Gadi n’abaghala ba Rubeni mubabwira Musa bati: “Itwe baghombe baghu tukendikola ngoko iwe mukama wetu wamabugha.
26 Abana betu, abakali betu, ebihangulo byetu, n’esyonyama esyo tukatunga sikendisighala erya, omo miyi ye Gileadi.
27 Aliwe, itwe baghombe baghu tukendisyasoka, obuli mulume inianahekire ebindu by’amalwa kusudi tuyalwe embere sya Yehova ngoko iwe mukama wetu wamabugha.”
28 Neryo Musa mwahiraho ekyalayiro ekilebirye abaghala ba Gadi n’abaghala ba Rubeni. Mwabwirakyo omuhereri Eleazari, Yosua, mughala wa Nuni, n’abakulu b’ebitunga by’ebihanda bye Israeli.
29 Musa mwababwira ati: “Abaghala ba Gadi n’abaghala ba Rubeni bamabisoka e Yordani haghuma nenyu, obuli mulume inianahekire ebindu by’amalwa kusudi bayalwe embere sya Yehova, neryo imwatoka erihamba ekihugho ekyo, mukendisyabaha ekihugho kye Gileadi mo kyabo.
30 Aliwe bamatendimya ebindu byabo by’amalwa n’erisoka e Yordani haghuma nenyu, ibakendisyikala omo kati-kati kenyu omo kihugho kye Kanana.”
31 Abaghala ba Gadi n’abaghala ba Rubeni mubasubirya bati: “Ebyo Yehova alyatubwira itwe baghombe baghu byo tukendikola.
32 Tukendimya ebindu by’amalwa n’erisoka e Yordani n’eringira omo kihugho kye Kanana embere sya Yehova, aliwe ekihugho ekyo tukendisyahabwa m’omwandu kikendisyabya oko luhande luno lwe Yordani.”
33 Neryo Musa mwaha abaghala ba Gadi, abaghala ba Rubeni, n’enusu y’ekihanda kya Manase, omughala wa Yozefu, ekiharo ekyo Sihoni omwami w’Abaamori abya akatabala, ekiharo ekyo Ogu omwami we Bashani abya akatabala, ni bugha ambu ekitaka kyosi, emiyi yosi, n’emilongo yosi eyabya omo kihugho ekyo.
34 Neryo Abaghala ba Gadi mubahimba* omuyi we Diboni, Ataroti, Aroeri,
35 Atrot-shofani, Yazeri, Yogbeha,
36 Bete-nimra, ne Bete-harani. Yabya miyi eyo enzighu yiteyangahikamo bweghu-bweghu. Kandi mubahimbira n’ebihangulo byabo ehiluba hy’amabwe.
37 Abaghala ba Rubeni mubahimba omuyi we Heshboni, Eleale, Kiriataimu,
38 Nebo, ne Baali-meoni. Mubaha emiyi eyo y’awandi mena, mubahimba n’omuyi we Sibna. Emiyi eyo bahimba buhya-buhya mubahayo awandi mena.
39 Abaghala ba Makiri, mughala wa Manase, mubabambira ekiharo kye Gileadi. Mubahambakyo n’eritibita oko Baamori ababya bikeremo.
40 Neryo Musa mwaha Makiri, mughala wa Manase, ekiharo kye Gileadi. Makiri mwikala mukyo.
41 Yairi, mughala wa Manase, mwabambira n’erihamba emilongo y’Abaamori eyabya yihimbire omo mahema. Mwahula emilongo eyo mo Havote-yairi.*
42 Noba mwabambira n’erihamba omuyi we Kenati n’emiyi eyitimbire kugho, mwahagho erina riwe erya Noba.
Amaelezo awehikwa
^ Kutse “akusi akakuma.”
^ Kutse “olulengo.”
^ Kutse “erihimba buhya-buhya.”
^ Ni bugha ambu “emilongo y’amahema ya Yairi.”
