Emighanzo 34:1-29
34 Kandi Yehova mwabwira Musa ati:
2 “Ubwire Abaisraeli uti, ‘Mukendibya mwabingira omo kihugho kye Kanana, eno y’emipaka y’ekihugho ekyo mukendihabwamo mwandu:
3 “‘Omupaka w’oko luhande lw’eyikwa w’ekiharo kyenyu akendisyatsukira oko mbwarara ye Zini, oko musike-sike we Edomu. Oko luhande lw’eyo ryuba rikasira, omupaka w’oko luhande lw’eyikwa akendisyatsuka oko musike w’Engetse y’Omunyu.*
4 Akendisyabinduka, inialaba oko luhande lw’eyikwa lw’obweruka bwe Akrabimu, n’eriyahika e Zini. Akendisyandaghala erihika oko luhande lw’eyikwa lwe Kadeshi-barnea, kandi inialua aho iniayahika e Hazar-Adari n’eriyalaba e Azmoni.
5 E Azmoni, omupaka oyo akendisyalolera eyiri akusi akakuma ke Misri, n’eriyatwirya oko Ngetse.*
6 “‘Omupaka wenyu w’oko luhande lw’eyo ryuba rikalengera akendisyabya Engetse Nene n’ekiharo kyoko musike-sike w’engetse. Oyo w’akendisyabya mupaka wenyu oko luhande lw’eyo ryuba rikalengera.
7 “‘Omupaka wenyu w’oko luhande lw’endata w’ono: Mukendisyalabya omupaka eritsuka oko Ngetse Nene eriyahika oko Kitwa kye Hori.
8 Mukendisyalabyagho eritsuka oko Kitwa kye Hori, imwaloleryagho e Lebo-hamati, kandi akendisyayahika e Zedadi.
9 Kandi omupaka oyo akendisyahika e Zifroni, n’eriyahwera e Hazar-enani. Oyo w’akendisyabya mupaka wenyu w’oko luhande lw’endata.
10 “‘Omupaka wenyu w’oko luhande lw’eyo ryuba rikasira, mukendisyalabyagho eritsuka e Hasari-enani eriyahika e Shefamu.
11 Omupaka oyo akendisyalua e Shefamu, iniaya e Ribla oko luhande lw’eyo ryuba rikasira lwe Aini, kandi akendisyandaghala n’eriyalaba omo bwandaghala obuli oko luhande lw’eyo ryuba rikasira lw’Engetse ye Kinereti.*
12 Omupaka oyo akendisyahika eyiri Yordani, n’eriyatwirya oko Ngetse y’Omunyu. Ekyo kyo kihugho kyenyu n’emipaka yakyo.’”
13 Neryo Musa mwabwira Abaisraeli ati: “Ekyo kyo kihugho ekyo mukendisyaghaba omw’ikola obukanga, ekihugho ekyo Yehova abugha ati kihabawe ebihanda 9 n’enusu.
14 Kundi ekihanda ky’Abarubeni erikwamana n’ebitunga byabo, ekihanda ky’Abagadi erikwamana n’ebitunga byabo, n’enusu y’ekihanda kya Manase babirimya omwandu wabo.
15 Ebihanda bibiri ebyo n’enusu byabirimya omwandu wabyo oko luhande lw’eyo ryuba rikasira lw’ekiharo kye Yordani, e Yeriko.”
16 Kandi Yehova mwabwira Musa ati:
17 “Aya w’amena w’abalume abakendisyabaghabira ekihugho: Omuhereri Eleazari na Yosua mughala wa Nuni.
18 Mukendisyimya n’omukulu mughuma omo buli kihanda abawatikaye erighaba ekihugho.
19 Aya w’amena w’abalume abo: Omo kihanda kya Yuda, Kalebu, mughala wa Yefune;
20 omo kihanda ky’abaghala ba Simeoni, Shemueli, mughala wa Amihudi;
21 omo kihanda kya Benyamini, Eldadi, mughala wa Kisloni;
22 omo kihanda ky’abaghala ba Dani, omukulu mughuma, ye Buki, mughala wa Yogli;
23 omo baghala ba Yozefu, erilua omo kihanda ky’abaghala ba Manase, omukulu mughuma, ye Hanieli, mughala wa Efodi;
24 erilua omo kihanda ky’abaghala ba Efraimu, omukulu mughuma, ye Kemueli, mughala wa Shiftani;
25 omo kihanda ky’abaghala ba Zabuloni, omukulu mughuma, ye Elizafani, mughala wa Parnaki;
26 omo kihanda ky’abaghala ba Isakari, omukulu mughuma, ye Paltieli, mughala wa Azani;
27 omo kihanda ky’abaghala ba Asheri, omukulu mughuma, ye Ahihudi, mughala wa Shelomi;
28 omo kihanda ky’abaghala ba Naftali, omukulu mughuma, ye Pedaheli, mughala wa Amihudi.
29 Abo b’abakulu abo Yehova abugha ati bakendighabira Abaisraeli b’ekihugho kye Kanana.
Amaelezo awehikwa
^ Ni bugha ambu, Engetse Eyiholire.
^ Ni bugha ambu, Engetse Nene, Engetse ye Mediterania.
^ Ni bugha ambu, Engetse ye Genezareti, kutse Engetse ye Galilaya.
