Emighanzo 35:1-34
35 Kandi Yehova mwakania na Musa omo ribanda eriri ng’embwarara rye Moabu, hakuhi ne Yordani, e Yeriko. Mwamubwira ati:
2 “Ubwire Abaisraeli uti bahe Abalawi emiyi y’erikalamo. Emiyi eyo, Abaisraeli bakendilusyayo oko mwandu wabo, kandi bahe Abalawi ebiharo by’erilisiryamo ebitimbire oko miyi eyo.
3 Abalawi bakendisyikala omo miyi eyo n’ebiharo by’erilisiryamo byo bakendisyabya bakalisiryamo esyonyama syabo, erihiramo ebindu byabo, n’erilisiryamo esindi nyama syabo syosi.
4 Ebiharo by’erilisiryamo by’emiyi eyo mukendisyaha Abalawi bikendisyabya amaboko* 1 000 eritsuka oko luhimbo lw’omuyi eritimba oko muyi wosi.
5 Ehihya w’omuyi, mukendisyapima amaboko 2 000 oko luhande lw’eyo ryuba rikasira, amaboko 2 000 oko luhande lw’eyikwa, amaboko 2 000 oko luhande lw’eyo ryuba rikalengera, n’amaboko 2 000 oko luhande lw’endata, neryo omuyi iniabya omo kati-kati. Ebyo byo bikendisyabya biharo by’erilisiryamo by’emiyi y’Abalawi.
6 “Emiyi eyo mukendisyaha Abalawi ikendisyabya emiyi 6 y’eritibitiramo eyo omundu oyuliita oghundi angatibitira, n’eyindi miyi 42.
7 Emiyi yosi eyo mukendisyaha Abalawi ikendisyabya 48, erihirako n’ebiharo byayo by’erilisiryamo.
8 Emiyi eyo mukendisyaha Abalawi, mukendiyalusyayo oko bitaka by’Abaisraeli. Ekihanda kyamabya n’ekitaka kinene, imukendimya kukyo kw’ekinene; ekihanda kyamabya n’ekitaka kike, imukendimya kukyo ko kike. Obuli kihanda kikendisyaha Abalawi emiyi milebe erikwamana n’omwandu ogho kikendisyahabwa.”
9 Kandi Yehova mwabwira Musa ati:
10 “Ubwire Abaisraeli uti, ‘Mukasonda erisoka Olusi lwe Yordani n’eringira omo kihugho kye Kanana.
11 Mukendisyasombola emiyi eyiri ahuwene. Yo yikendisyabya miyi yenyu y’eritibitiramo. Eyo y’omundu oyuliita oghundi omw’itendiyiririra akendisyabya akatibitira.
12 Omo miyi eyo m’omundu akendisyabya akabisama oyo wangatuhulya omusasi w’oyulitibawa, omundu oyuliita oghundi akasyahola isyalyatondera embere sy’Abaisraeli.
13 Ekyo kyo kikendisyaleka ihabya emiyi eyo.
14 Mukendisyahira emiyi isatu y’eritibitiramo oko luhande luno lwe Yordani n’eyindi miyi isatu omo kihugho kye Kanana.
15 Omundu wosi-wosi oyukiita omundu* omw’itendiyiririra akendisyabya akatibitira omo miyi 6 eyo, angabya Mwisraeli, kutse oyute Mwisraeli, kutse oyukahumira omo kihugho kyenyu.
16 “‘Aliwe omundu amabihunza oghundi omo kyuma neryo iniahola, oyo ini mwiti. Ritolere omwiti initibwa.
17 Aliwe omundu amabimangura oghundi omo ribwe eryangaleka omundu oyo iniahola, neryo oko kwenene tu iniahola, oyo ini mwiti. Ritolere omwiti initibwa.
18 Aliwe omundu amabihunza oghundi omo muti owangaleka omundu iniahola, neryo oko kwenene tu iniahola, oyo ini mwiti. Ritolere omwiti initibwa.
19 “‘Oyukatuhulaya omusasi w’oyulitibawa y’ukendiita omwiti. Omughulu akendimubandana, iniamwita.
20 Omundu amiita oghundi kundi mwakamukuna busana n’erimupona, kutse kundi mwakamughusako ekindu kilebe busana n’omutima mubi,*
21 kutse omundu amamatula oghundi busana n’erimupona neryo iniahola, ritolere oyulyamumatula initibwa. Oyo ni mwiti. Oyukatuhulaya omusasi w’oyulitibawa akendisyabya abimubandana, iniamwita.
22 “‘Aliwe amabya inialyasisira iniamabimukuna, kutse erimughusako ekindu kilebe, ni bugha ambu isyetakola atya busana n’erimupona, kutse busana n’eribya n’omutima mubi,*
23 kutse amabya imwakamughusako eribwe isyamulangire, kandi isi nzighu yiwe, kutse isibugha ambu alue anzire erimuhutalya, neryo omundu oyo iniahola,
24 abandu bakendisyabya bakasoha oyulyamuhunza n’oyukatuhulaya omusasi w’oyulitibawa erikwamana n’ebyalayiro ebyo.
25 Abandu bakendisabula omwiti oyukatuhulaya omusasi w’oyulitibawa akasyamwita, neryo bakendimusubya omo muyi owatibitiramo. Naye ritolere inikala omo muyi oyo erihika omughulu omuhereri mukulu akendisyahola, omuhereri oyo wahirawako amaghuta abuyirire.
26 “‘Aliwe omwiti amabilua omo muyi owatibitiramo,
27 neryo oyukatuhulaya omusasi w’oyulitibawa iniamweya ehihya w’omuyi owatibitiramo, neryo iniamwita, aho isyali n’olubanza.
28 Kundi ritolere omundu oyuliita omundu inikala omo muyi owatibitiramo erihika mughulu omuhereri mukulu akendisyahola. Aliwe omuhereri mukulu amabihola, omundu oyo inianganasuba eyiri ekitaka kiwe.
29 Bino by’ebyalayiro ebyo mukendisyabya mukakwama omo bizazi* byenyu byosi n’ehosi-hosi eyo mukendisyikala omughulu mukasoha emyatsi eyo.
30 “‘Oyukiita oghundi, akenditibwa m’omwiti hamabya abimiri* abakahakikisaya ngoko mwakita omundu.* Aliwe omundu isyitibawa hamabya omwimiri* mughuma musa.
31 Isimwaligha embanulo eyikatekawa busana n’eribalya omwiti oyutolere erihola, kundi tu ritolere initibwa butsira buhaka.
32 Kandi isimwaligha embanulo eyikatekawa busana n’erilighira omundu oyulyatibita omo muyi w’eritibitiramo erisuba eyiri ekitaka kiwe omuhereri mukulu isyalyahola.
33 “‘Isimwatsandaya ekihugho ekyo mwikeremo, kusangwa omusasi akatsandaya ekihugho, kandi ekihugho sikyangeribwa busana n’omusasi owalyutawa kukyo ate iwo n’omusasi w’oyulyutagho.
34 Isimwatsandaya ekihugho ekyo mwikeremo, naghe ekyo nikeremo; kundi ingye Yehova, nikere omo kati-kati k’abandu be Israeli.’”
Amaelezo awehikwa
^ Okuboko kughuma ini syosantimetre 44,5. Ulebaye Endomeko B14.
^ Kutse “enafsi.”
^ Kinywa kwa kinywa, “inianemumulimbya.”
^ Kinywa kwa kinywa, “butsir’imulimbya.”
^ Kutse “syondengo.”
^ Kutse “abatemwe.”
^ Kutse “enafsi.”
^ Kinywa kwa kinywa, “oko buno bw’omwimiri; oko buno bw’omutemwe.”
