Emighanzo 4:1-49
4 Yehova mwabwira Musa na Haruni ati:
2 “Omo baghala ba Lawi, ughanzemo abaghala ba Kohati erikwamana n’ebihanda byabo n’ebitunga byabo.
3 Ughanze abalume bosi b’emyaka 30 erihika oko 50 abali omo kikuto ky’abakakolera omo hema y’erihindanamo.
4 “Ono w’omubiiri ogho baghala ba Kohati bakendibya bakakola omo hema y’erihindanamo. Ni mubiiri ow’alebirye ebindu ebibuyirire kutsibu:
5 Omughulu w’erihongoka, Haruni n’abaghala biwe bakendisyabya bakingira n’erikimya erido n’eriswika erisanduku ry’endaghane omo rido eyo.
6 Kandi ibatasyaswikako engobi y’epombolo, n’endata oko ngobi eyo ibahirako olukimba lw’erangyi ye ble n’erihira oko sanduku kw’emighamba* y’eriwatikya erihekayo.
7 “Kandi bakendisyabya bakasesa olukimba lw’erangyi ye ble oko meza y’emikati y’erikangania, n’erihira kuyo kw’esyosahani, ebikombe,* ebibakuli,* esyobinika sy’ekihembo ky’obwabu, n’emikati eyikabya iyinemuhererwa siyendisyabya ikalua oko meza eyo.
8 Bakendisyabya bakahira oko bindu ebyo kw’olukimba lw’erangyi y’omusasi eyihenirye,* n’eriswika emeza omo ngobi y’epombolo, n’erihira oko meza eyo kw’emighamba* eyikawatikaya erihekayo.
9 Enyuma sy’aho, bakendisyabya bakimya olukimba lw’erangyi ye ble, ibaswika ekindu ky’erihirako esyotala sy’erikolerya n’esyotala esiri kukyo, ebindu byakyo by’erihambamo orutambi, ebindu byakyo by’erihekamo omuliro, n’ebindu byosi ebirimo amaghuta w’esyotala esyo.
10 Bakendisyabya bakaswikayo haghuma n’ebindu byayo byosi omo ngobi y’epombolo, n’erihirayo oko mughamba* owakawatikaya erihekayo.
11 Bakendisyabya bakasesa olukimba lw’erangyi ye ble oko kiherero ky’ehoro, n’eriswikakyo omo ngobi y’epombolo, n’erihirako emighamba* eyikawatikaya erihekayo.
12 N’enyuma sy’aho, bakendisyabya bakimya ebindu byosi ebikakolesibawa omo mubiiri w’ahabuyirire, n’erihirabyo omo lukimba lw’erangyi ye ble, neryo ibaswikabyo omo ngobi y’epombolo, n’erihirabyo oko mughamba* owakawatikaya erihekayo.
13 “Bakendisyabya bakalusya eribu* oko kiherero n’eriswikako olukimba lw’erangyi y’olubono-bono,* olukokotibwe omo bweya bw’embuli.
14 Bakendisyabya bakahirako ebindu byosi ebyo balyakolesaya oko kiherero, ni bugha ambu, ebindu by’erihekamo omuliro, esyokanya, ebipao, ebibakuli,* n’ebindi bindu byosi ebikakolesibawa oko kiherero; bakendisyabya bakaswikakyo omo ngobi y’epombolo n’erihirako emighamba* eyikawatikaya erihekakyo.
15 “Omughulu Abaisraeli bakendisyabya bakahongoka, Haruni n’abaghala biwe bakendisyabya bakaswika ahabuyirire n’ebindu byosi ebikakolesibawa ahabuyirire. Babibugha, abaghala ba Kohati bakendisyabya bakingira n’erihekabyo. Aliwe isibatula ahabuyirire, kundi bamabitulaho, ibakendihola. Ebindu ebyo ebilebirye ehema y’erihindanamo biri omo mutwe* w’abaghala ba Kohati.
16 “Eleazari, mughala w’omuhereri Haruni, iye omubiiri wiwe n’ibya akalebya amaghuta w’erihira omo syotala sy’erikoleryamo, obukwa obukakumba ndeke, obuhere bw’akalyo obukahererawa ebiro byosi, n’amaghuta abuyirire. Akendisyabya akimanira ehema y’erihindanamo n’ebindu byosi ebirimo, ahabuyirire, n’ebindu ebikakolesibawa ahabuyirire.”
17 Yehova mwatasyabwira Musa na Haruni ati:
18 “Mulebaye ndeke ebihanda by’Abakohati bikasyahwa omo Balawi.
19 Aliwe ekyo kyo mukole bakasyahola busana n’eriseghera hakuhi n’ebindu ebibuyirire kutsibu. Haruni n’abaghala biwe bakendisyabya bakingira omo hema y’erihindanamo n’eriha obuli Mukohati omubiiri wiwe n’erimubwira ebyo akendiheka.
20 Abakohati sibatolere eryingiramo n’erilebya ebindu ebibuyirire, nibya n’omo katambi kake, bakasyahola.”
21 Kandi Yehova mwabwira Musa ati:
22 “Ughanze abaghala ba Gershoni erikwamana n’ebitunga byabo n’ebihanda byabo.
23 Uhandike abalume bosi b’emyaka 30 erihika oko 50 abali omo kikuto ky’abakakolera omo hema y’erihindanamo.
24 Omubiiri ogho ebihanda by’Abagershoni bikendisyabya bikakola n’ebindu ebyo bakendisyabya bakaheka bya bino:
25 Bakendisyabya bakaheka amahema, ehema y’erihindanamo, ekindu ekikaswikayo, engobi y’epombolo eyikabya endata kuyo, erido ry’oko mulango w’ehema y’erihindanamo,
26 esyorido esitimbire oko kibugha, erido eyiri oko mulango w’ekibugha ekitimbire oko hema, ekiherero, esyokamba sy’ehema, ebindu byosi ebikakolesibawa omo hema, n’obuli kindu ekikakolesibawa omo mubiiri w’oko hema. Oyo w’omubiiri wabo.
27 Haruni n’abaghala biwe bo bakendisyabya bakimanira emibiri yosi y’Abagershoni n’ebindu byosi ebyo bakendisyabya bakaheka; ebyo byo bakendisyabya bakaheka.
28 Oyo w’omubiiri ogho ebihanda by’Abagershoni bikendisyabya bikakola omo hema y’erihindanamo, n’oyukendisyabya akimanira omubiiri wabo ni Itamari, mughala w’omuhereri Haruni.
29 “Abaghala ba Merari, ukendihandikabo erikwamana n’ekihanda kyabo n’ekitunga kyabo.
30 Uhandike abalume b’emyaka 30 erihika oko 50, abosi abali omo kitunga ky’erikola omubiiri owalebirye ehema y’erihindanamo.
31 Ebyo bakendisyabya bakaheka ebihambene n’omubiiri owakakolawa eyiri ehema y’erihindanamo bya bino: Ehikadre hy’ehema, ebibatsi byayo, esyonduyi syayo, ebindu by’erimaniako esyonduyi;
32 esyonduyi esitimbire oko kibugha, ebindu by’erimaniako esyonduyi esyo, emisumari y’erihanda ehema y’omo kitaka, esyokamba sy’ehema, haghuma n’ebindu byosi by’ehema n’obuli kindu ekikakolesibawa omo mibiiri y’ebindu ebyo. Mubye mukatondogholerabo obuli kindu ekyo bakendiheka.
33 Oyo w’omubiiri ogho ebihanda bya Merari bikendisyabya bikakolera oko hema y’erihindanamo. Itamari mughala w’omuhereri Haruni yukendisyabya akimaniragho.”
34 Neryo Musa, Haruni, n’abakulu b’omo kihanda kye Israeli mubahandika abaghala ba Kohati erikwamana n’ebihanda byabyo n’ebitunga byabyo.
35 Mubahandika abosi b’emyaka 30 erihika oko myaka 50 ababya omo kikuto ky’abakakolera eyiri ehema y’erihindanamo.
36 Abosi abahandikawa erikwamana n’ebihanda byabo babya 2 750.
37 Abo bo bahandikawa ab’omo bihanda by’Abakohati, abosi ababya bakakolera eyiri ehema y’erihindanamo. Musa na Haruni mubahandikabo ngoko Yehova abwira Musa.
38 Abaghala ba Gershoni mubahandikwa erikwamana n’ebihanda byabo n’ebitunga byabo.
39 Abalume bosi b’emyaka 30 erihika oko myaka 50 ababya omo kikuto ky’abakakolera eyiri ehema y’erihindanamo mubahandikwa.
40 Abosi abahandikawa erikwamana n’ebihanda byabo n’ebitunga byabo babya 2 630.
41 Abo bo bahandikawa omo bihanda by’abaghala ba Gershoni, abosi ababya bakakolera eyiri ehema y’erihindanamo. Musa na Haruni mubahandikabo ngoko Yehova anabugha.
42 Abaghala ba Merari mubahandikwa erikwamana n’ebihanda byabo n’ebitunga byabo.
43 Abalume bosi b’emyaka 30 erihika oko myaka 50 ab’omo kikuto ky’abakakolera eyiri ehema y’erihindanamo mubahandikwa.
44 Abosi abahandikawa erikwamana n’ebihanda byabo babya 3 200.
45 Abo bo bahandikawa omo bihanda by’abaghala ba Merari. Musa na Haruni mubahandikabo ngoko Yehova anabwira Musa.
46 Musa, Haruni, n’abakulu b’omo kihanda kye Israeli mubahandika Abalawi bosi erikwamana n’ebihanda byabyo n’ebitunga byabyo.
47 Abahandikawa babya n’emyaka 30 erihika oko 50. Mubahabwa omubiiri w’erikolera eyiri ehema y’erihindanamo n’eriheka ebindu ebikakolesibawamo.
48 Abosi abahandikawa mubabya 8 580.
49 Mubahandikwa ngoko Yehova anabugha, obuli mundu erikwamana n’omubiiri ogho ahabawa n’erikwamana n’ebyo abya atolere eriheka; abosi mubahandikwa ngoko Yehova anabwira Musa.
Amaelezo awehikwa
^ Kutse “kw’emiraba; kw’emiti.”
^ Kutse “esyondehi.”
^ Kutse “ebibindi.”
^ Kutse “y’olukula-kula; ye écarlate.”
^ Kutse “kw’emiraba; kw’emiti.”
^ Kutse “muraba; muti.”
^ Kutse “emiraba; emiti.”
^ Kutse “muraba; muti.”
^ Kutse “eribu eririmo ebisabu,” ni bughambu, eribu eririmo ebisabu by’esyonyama esikahererawa.
^ Kutse “y’omunyama, ye pourpre.”
^ Kutse “ebibindi.”
^ Kutse “emiraba; emiti.”
^ Kinywa kwa kinywa, “ni muheke.”
