Emighanzo 5:1-31
5 Kandi Yehova mwabwira Musa ati:
2 “Ubwire Abaisraeli uti balusaye omo kambi omuhagha wosi-wosi, omundu oyo kitsuko kiwe ky’olubuto kikaluamo omutsafu, n’obuli mundu oyuterire busana n’eritula oko kinda ky’omundu.*
3 Abye mulume kutse mukali, mumulusayemo. Mumutwale ehihya w’ekambi, akasyatsandya ekambi yosi eyo nikeremo.”*
4 Neryo Abaisraeli mubakola batya, mubatwalabo ehihya w’ekambi. Mubakola ngoko Yehova anabwira Musa.
5 Kandi Yehova mwatasyabwira Musa ati:
6 “Ubwire Abaisraeli uti, ‘Omulume kutse omukali amakola erilolo eryo abandu babeghere erikola, kandi amaleghula oko Yehova, omundu oyo* iniamabibyako ekosa.
7 Ritolere inyaghungama* erilolo eryo alyakola n’eriliha ebilingene n’ekosa eyo alyakola, n’eritomekako ekighuma ky’ebitano ky’ebyo alyaliha. Akendihabyo oyo alyakosera.
8 Aliwe omundu oyulyakoserawa amabya isyawite omutunga w’ahakuhi omo kihanda oyukendimya ebyo oyulyamukosera alyaliha, ibikendihabwa Yehova, neryo ibyabya by’omuhereri, erilusyako embangale y’obuhere bw’erihanula eyo omuhereri akendimukoleramo buhere bw’erihanula busana n’oyulyakola erilolo.
9 “‘Obuli kihembo kibuyirire ekyo Baisraeli bakaletera omuhereri ni kiwe.
10 Ebindu bibuyirire by’obuli mundu ni biwe. Obuli kindu ekyo omundu akaha omuhereri kikendibya ky’omuhereri.’”
11 Yehova mwatasyabwira Musa ati:
12 “Ubwire Abaisraeli uti, ‘Kino kyo mutolere imwakola omukali w’omulume mulebe amabikosa n’erileghula oko mulume wiwe,
13 neryo oghundi mulume iniaghotsera naye, aliwe omulume wiwe iniataminya omwatsi oyo, n’omwatsi oyo iniatafumbulwa nomo omukali oyo anganabya iniabiritsandya omubiri wiwe, kandi isihali oyulyamulangira kutse nomo angabya isyetahambwa:
14 Omulume wiwe amabihitana n’erilengekania ati omukali wiwe anganabya iniabirighotsera n’oghundi mulume, nomo angabya iniabiritsandya omubiri wiwe kutse iyehe,
15 ritolere omulume oyo inialeta omukali wiwe ahali omuhereri iniane n’obuhere obukendihererwa busana n’omukali wiwe, ni bugha ambu, ekighuma ky’omw’ikumi kye efa* y’efarine y’ekisusu. Isyutako amaghuta kutse erihira muyo mo obubani, kundi ni buhere bw’akalyo obulyahererawa busana n’obumbanda, ni buhere bw’akalyo obukibukaya ekibi.
16 “‘Omuhereri akendisegherya omukali oyo y’embere n’erimwimania embere sya Yehova.
17 Omuhereri akendihira amaghetse abuyirire omo kindu ky’eribumba, kandi inimya oko lututu oluli ahisi omo hema, iniahiralo omo maghetse ayo.
18 Neryo omuhereri inimania omukali oyo embere sya Yehova, iniabohola esyonzwiri sy’omukali oyo, n’erihira omo byala by’omukali oyo mw’ekihembo ky’akalyo ky’eribukya, ni bugha ambu, ekihembo ky’akalyo ky’obumbanda, kandi omuhereri akendibya iniane n’amaghetse omo byala biwe awakalihire awakaleta eritakirwa.
19 “‘Neryo omuhereri akendilapisya omukali oyo omw’imubwira ati: “Oghundi mulume amabya isyataghotsera naghu ighunawite omulume waghu, kandi wamabya isighulitakola ekibi n’eritsandya omubiri waghu, amaghetse ano awakalihire kandi awakaleta eritakirwa isyakuyira kindu.
20 Aliwe wamabya imukakola ekibi n’eriyitsandya ighunawite omulume, wamabya imughukaghotsera n’oghundi mulume oyute mulume waghu ...”
21 Neryo omuhereri akendibugha ebinywa bino by’eritakira akalapisya omukali, akendibwira omukali oyo ati: “Yehova akuyire mo kindu ekyo bandu bakendibya bakahula omughulu bakatakira n’erilapa omw’ihondya* ekihinga* kyaghu n’eribimbya enda yaghu.”
22 Amaghetse ano awakaleta eritakirwa akendindaghalira omo nda yaghu, iniabimbyayo, n’erihondya* ekihinga* kyaghu. Neryo omukali iniabugha ati: “Amina! Amina!”
23 “‘Enyuma sy’aho, omuhereri akendihandika ebinywa ebyo eby’eritakira omo kitabu, neryo iniazimabyo omo maghetse ayo awakalihire.
24 Enyuma sy’aho, inianywisya omukali oyo y’amaghetse awakalihire awakaleta eritakirwa, neryo amaghetse ayo awakaleta eritakirwa iniandaghalira omo nda y’omukali oyo n’erilumyayo.*
25 Neryo omuhereri inimya obuhere bw’akalyo k’obumbanda obuli omo byala by’omukali oyo, iniatsingya-tsingya obuhere obo embere sya Yehova, n’eriletabyo hakuhi n’ekiherero.
26 Neryo omuhereri akendimya oko buhere bw’akalyo obo kw’ebyala bighuma ebyuswire, ebyala bighuma ebyo ebyuswire bikasosekanaya ekihembo kyosi, n’eritimiryabyo oko kiherero mutoke erilua omuki, n’enyuma sy’aho inianywisya omukali oyo y’amaghetse ayo.
27 Omughulu akanywisaya omukali oyo y’amaghetse ayo, amabya iniabiritsandya omubiri wiwe n’erikola obusingiri, amaghetse awakaleta eritakirwa iniakendindaghalira omo nda yiwe n’erilumamo,* neryo enda yiwe iyabimba n’ekihinga* kiwe ikyahonda,* n’abandu ibabya bakamwahula omughulu bakatakira.
28 Aliwe omukali oyo amabya isyetayitsandya, ni bugha ambu inianerire, emyatsi eyo isiyendimuhikako, neryo inianganatasyabya mukule n’eributa abana.
29 “‘Oyo w’omughambo owalebirye obumbanda, omughulu omukali akakola ekibi n’eriyitsandya inianawite oko mulume oyo wabirimutahya,
30 kutse omughulu omulume abirihitana neryo inialengekania ati alinga omukali wiwe abirighotsera n’oghundi mulume, akendimania omukali wiwe embere sya Yehova, n’omuhereri iniakola ebyosi ebiri omo mughambo oyo.
31 Omulume syendibyako lubanza, aliwe omukali wiwe yukendihikirwa n’ebitsibu busana n’erilolo eryo alyakola.’”
Amaelezo awehikwa
^ Kutse “busana n’enafsi.” Ulebaye Amaana w’ebinywa.
^ Kutse “nipangiremo.”
^ Kutse “enafsi eyo.”
^ Kinywa kwa kinywa, “ibaghungama.”
^ Ekighuma ky’omw’ikumi kye efa ini syolitre 2,2. Ulebaye Endomeko B14.
^ Kutse “omw’itsandya.” Alinga ekyo kikamaanisaya eribya mughumba.
^ Alinga kikamaanisaya ebitsuko by’olubuto.
^ Kutse “n’eritsandya.” Alinga kikamaanisaya eribya mughumba.
^ Alinga kikamaanisaya ebitsuko by’olubuto.
^ Kutse “n’erikalihyayo.”
^ Kutse “n’eribya ekindu ekikalihire.”
^ Alinga kikamaanisaya ebitsuko by’olubuto.
^ Kutse “ikyatsanda.” Alinga kikamaanisaya eribya mughumba.
