Emighanzo 6:1-27
6 Kandi Yehova mwabwira Musa ati:
2 “Ubwire Abaisraeli uti, ‘Omulume kutse omukali amayilagha erikola omwatsi owate ng’eyindi, ni bugha ambu, eribya Munaziri* wa Yehova,
3 siritolere akanywa edivai kutse obundi bwabu obukatamiraya. Siritolere akanywa edivai eyitsamba-tsambire, kutse obwabu bosi-bosi obukatamiraya obutsamba-tsambire. Siritolere akanywa amaghetse awakalua omo mizabibu, kutse erirya emizabibu, yangabya mibisi kutse eyumire.
4 Ebiro byosi ebyo akendisyabya iniane Munaziri, syendisyabya akalya ekindu kyosi-kyosi ekikalua omo mizabibu, yangabya mizabibu eyiterire, kutse ebiryahatawa oko ritunda ry’emizabibu.
5 “‘Ebiro byosi ebyo ayilagha ati akendibya Munaziri, ekitibo sikyendisyalaba oko mutwe wiwe. Akendisyakotya esyonzwiri siwe, n’ekyo kikendisyabya kikakangania ngoko ni mubuyirire erihika omughulu ebiro ebyo ayilagha eribya Munaziri wa Yehova bikendisyahwa.
6 Syatolere akahika hakuhi n’omundu* oyuholire omo biro byosi ebyo akandisyabya ini Munaziri wa Yehova.
7 Nomo baba wiwe, mama wiwe, mughala wabo, kutse mwali wabo angahola, siritolere akayitsandya, kundi ekikakanganaya ngoko ni Munaziri w’oMungu wiwe kine oko mutwe wiwe.
8 “‘Ni mubuyirire embere sya Yehova omo biro byosi by’Obunaziri bwiwe.
9 Aliwe omundu amahola kitsumbukirania hakuhi naye, neryo iniatsandya esyonzwiri esikakanganaya ngoko ni Munaziri w’oMungu, ritolere iniatwa esyonzwiri esyo omo kiro ky’eryeribwamo, ritolere iniatwasyo omo kiro kye 7.
10 Omo kiro kye 8, ritolere inialetera omuhereri ehilikuku hibiri kutse ehipijo hibiri ehikine hilere oko mulango w’ehema y’erihindanamo.
11 Omuhereri akenditeghekania akaghuma mo buhere bw’erilolo n’akandi mo buhere bw’eryokererya, neryo iniamukolera obuhere bw’erihanula busana n’erilolo riwe ery’eribya hakuhi n’omundu oyulyahola.* Enyuma sy’aho, ritolere inierya omutwe wiwe ekiro ekyo.
12 Ritolere iniatasyatsuka buhya-buhya ebiro biwe by’Obunaziri ebyo alagha Yehova, kandi inialeta embangale eyikine nyilere ey’omwaka mughuma kutse biro bike okw’aho mo buhere bw’olubanza,* aliwe ebiro ebyo abya iniamatabugha embere, sibyendighanzwa kundi abiritsandya Obunaziri bwiwe.
13 “‘Omughambo ogho ritolere Omunaziri iniakwama w’ono: Akendisyabya abibugha ebiro ebyo abugha ati akendisyabya ini Munaziri, ibamuleta oko mulango w’ehema y’erihindanamo.
14 Abihika aho, ritolere iniaherera Yehova embangale eyikine nyilere eyiteko bulema ey’omwaka mughuma kutse biro bike okw’aho mo buhere bw’eryokererya, embuli y’obukali eyiteko bulema ey’omwaka mughuma kutse biro bike okw’aho mo buhere bw’erilolo, embangale eyiteko bulema mo buhere bw’obuholo,
15 ekibo ky’emikati eyitemo levire* ey’omuviringo eyiryahukawa omo farine eyuwene eyitswangenemo amaghuta, esyogalete esitemo levire esyo babirihakabyako amaghuta, n’ekihembo ky’akalyo ky’ebindu ebyo, n’ebihembo by’obwabu by’ebindu ebyo.
16 Omuhereri akendiletabyo embere sya Yehova n’eriherera obuhere bw’erilolo busana n’Omunaziri oyo, n’obuhere bw’eryokererya busana n’Omunaziri oyo.
17 Akendiherera Yehova embangale mo buhere bw’obuholo haghuma n’ekibo ekirimo emikati eyitemo levire,* kandi omuhereri akendiherera obuhere bw’akalyo n’obuhere bw’obwabu eby’oko mbangale eyo.
18 “‘Neryo Omunaziri iniatwira oko mulango w’ehema y’erihindanamo kw’esyonzwiri esyabya isyabirikotera oko mutwe wiwe. Neryo inimya esyonzwiri esyalasa oko mutwe wiwe omughulu abya ini Munaziri, iniahirasyo oko muliro w’obuhere bw’obuholo.
19 Kandi ritolere omuhereri inimya ekitigho ky’embangale ekyo balyaberaya, inialusya omo kibo m’omukati mughuma w’omuviringo owatemo levire,* n’egalete nguma eyitemo levire, n’erihirabyo omo byala by’Omunaziri. Akendikola atya Omunaziri abitwa esyonzwiri esikakanganaya ngoko ni Munaziri.
20 Kandi ritolere omuhereri iniahungya-hungyabyo embere sya Yehova mo buhere bw’erihungya-hungya. Ni kindu kibuyirire ky’omuhereri haghuma n’ekikuba ky’obuhere bw’erihungya-hungya n’okughulu okukahererawa mo righabo ribuyirire. Enyuma sy’aho, Omunaziri angananywa oko divai.
21 “‘Omughambo ogho Omunaziri oyukayilagha atolere iniakwama w’ono: Amayilagha kandi amabya inianganatoka eriherera Yehova y’ebinene oko ebyo asabirwe busana n’eribya Munaziri, atolere iniaberererya ebyo abiriyilagha erikwamana n’omughambo w’Obunaziri bwiwe.’”
22 Kandi Yehova mwabwira Musa ati:
23 “Ubwire Haruni n’abaghala biwe uti, ‘Bino by’ebinywa ebyo mukendisyabya mukabugha mukatsumula Abaisraeli. Ubabwire uti bakendisyabya bakabugha bati:
24 “Yehova akutsumule n’erikuteya.
25 Obusu bwa Yehova bukukoleraye, kandi akukanganaye olukogho.
26 Yehova akukanganaye obusu bwiwe, kandi akuhe obuholo.”’
27 Batolere ibahira erina ryaghe oko bandu be Israeli, nitoke eribatsumula.”
Amaelezo awehikwa
^ Omo Kiebrania ni na·zirʹ, ekikamaanisaya “oyulusibwe omo bandi; oyo babiriherera; oyuhirirwe eluhande.”
^ Kutse “enafsi.” Ulebaye Amaana w’ebinywa.
^ Kutse “enafsi.” Ulebaye Amaana w’ebinywa.
^ Kutse “bw’omusango.”
^ Kutse “kihamya.”
^ Kutse “kihamya.”
^ Kutse “kihamya.”
