Emighanzo 8:1-26
8 Kandi Yehova mwabwira Musa ati:
2 “Ubwire Haruni uti, ‘Omughulu ukakaya esyotala, esyotala 7 sikendikolerya omwanya owali embere sy’ekindu ky’erihirako esyotala.’”
3 Neryo Haruni mwakola atya. Mwakya esyotala sitoke erikolerya omwanya owali embere sy’ekindu ky’erihirako esyotala, ngoko Yehova abwira Musa.
4 Ekindu ky’erihirako esyotala kyabya kikokotibwe kitya: Kyabya ky’ehoro eyiryabandawako omo hama; eritsuka oko ndina yakyo erihika oko mawa wakyo, kyabya kindu ekiryabandawako omo hama. Ekindu ky’erihirako esyotala kyakokotibawa ngoko Yehova anakanganaya Musa omo nzoli.
5 Kandi Yehova mwabwira Musa ati:
6 “Wimaye Abalawi omo kati-kati k’Abaisraeli, werayebo.
7 Ko ukendyeryabo utya: Utsatsange kubo kw’amaghetse awakalusaya oko mundu kw’erilolo, kandi batolere ibatwa esyonzwiri n’obweya obuli oko mubiri wabo wosi omo kitibo, erifula esyongyimba syabo, n’eriyerya.
8 Enyuma sy’aho, ibimya ende y’obulume eyikine nyilere, kandi bakendimya efarine eyuwene eyitswangenemo amaghuta mo kihembo ky’akalyo, kandi ukendimya eyindi nume y’ende eyikine nyilere mo buhere bw’erilolo.
9 Neryo ukendileta Abalawi embere sy’ehema y’erihindanamo, n’erihindania Abaisraeli bosi.
10 Omughulu ukendileta Abalawi embere sya Yehova, Abaisraeli bakendihira ebyala byabo oko Balawi.
11 Neryo ritolere Haruni iniaherera* Abalawi embere sya Yehova mo buhere bw’erihungya-hungya bw’Abaisraeli, neryo bakendibya bakakola omubiiri wa Yehova.
12 “Enyuma sy’aho, Abalawi bakendihira ebyala byabo oko mutwe w’esyonume sy’esyonde, neryo enume nguma y’ende iyahererwa Yehova mo buhere bw’erilolo, n’eyindi mo buhere bw’eryokererya, amalolo w’Abalawi atoke erihanulirwa.
13 Kandi ukendimania Abalawi embere sya Haruni n’abaghala biwe n’eribaherera Yehova mo buhere bw’erihungya-hungya.
14 Ritolere iwalusya Abalawi omo bandi Baisraeli. Abalawi ni baghe.
15 Enyuma sy’aho, Abalawi bakendingira n’erikola omubiiri omo hema y’erihindanamo. Ebyo byo ukendikola eryeryabo n’eribaherera* mo buhere bw’erihungya-hungya.
16 Kundi ni bandu abo nahabawa omo Israeli. Ngendiyimiryabo omo mwanya w’ehimbere hyosi* hy’Abaisraeli.
17 Kundi obuli kambere k’Abaisraeli ni kaghe, kangabya kambere k’omundu kutse k’enyama. Munayiyirirahyo mo hibuyirire omughulu niita ehimbere hyosi hy’omo kihugho kye Misri.
18 Ngendimya Abalawi omo mwanya w’ehimbere hyosi hy’Abaisraeli.
19 Ngendiha Abalawi bo Haruni n’abaghala biwe mo bandu abahererawa omo kati-kati k’Abaisraeli, batoke erikolera Abaisraeli b’omubiiri omo hema y’erihindanamo n’eriwatikya Abaisraeli erighanyirwa. Bamabikola batya, isihendibya ekihunzo omo kati-kati k’Abaisraeli kundi mubakahika hakuhi n’ahabuyirire.”
20 Musa na Haruni n’Abaisraeli bosi mubakolera Abalawi bo batya. Mubakolera Abalawi b’ebyosi ebyo Yehova abwira Musa, ebyo byo Baisraeli babakolera.
21 Neryo Abalawi muberya n’erifula esyongyimba syabo. Babere babikola ekyo, Haruni mwahererabo mo buhere bw’erihungya-hungya embere sya Yehova. Enyuma sy’aho, mwakola obuhere batoke erighanyirwa amalolo wabo n’eryera.
22 N’enyuma sy’aho, Abalawi mubingira omo hema y’erihindanamo batoke erikola omubiiri wabo embere sya Haruni n’abaghala biwe. Mubakolera Abalawi ngoko Yehova anabwira Musa, ko banabakolera batya.
23 Neryo Yehova mwabwira Musa ati:
24 “Omwatsi ono alebirye Abalawi: Omulume akendibya akingira omo kikuto ky’abakakolera eyiri ehema y’erihindanamo abiyira emyaka 25.
25 Aliwe abilaba omo myaka 50, inialua omo kikuto ekyo ky’abakakola omubiiri. Iye syangasyakola omubiiri.
26 Anganawatikya abaghala babo abakakola emibiiri eyiri ehema y’erihindanamo, aliwe syangakola omubiiri w’aho. Ebyo byo ukendikola, ebilebirye Abalawi n’emibiiri yabo.”
Amaelezo awehikwa
^ Kinywa kwa kinywa, “iniahungya-hungya,” ni bugha ambu, eribalolya embere n’eribasubya enyuma ngendo-ngendo.
^ Kinywa kwa kinywa, “n’eribahungya-hungya,” ni bugha ambu, eribalolya embere n’eribasubya enyuma ngendo-ngendo.
^ Kutse “ehimbere hyosi ehikakingula amabunda.”
