Emighanzo 9:1-23
9 Omwisi w’erimbere w’omwaka w’akabiri Abaisraeli babilua e Misri, Yehova mwakania na Musa omo mbwarara ye Sinai. Mwamubwira ati:
2 “Abaisraeli bakenditeghekania obuhere bw’Epasaka oko mughulu owabirihirwaho.
3 Mukenditeghekaniabo oko mughulu owabirihirwaho, ni bugha ambu, ekiro 14 ky’omwisi ono, omo kagholo-gholo.* Mukenditeghekaniabo erikwamana n’emighambo yosi n’ebyalayiro byosi ebilebiryebo.”
4 Neryo Musa mwabwira Abaisraeli ati bateghekanaye obuhere bw’Epasaka.
5 Neryo Abaisraeli mubateghekania obuhere bw’Epasaka oko mwisi w’erimbere, ekiro 14 ky’omwisi oyo, omo kagholo-gholo,* ibane omo mbwarara ye Sinai. Abaisraeli mubakola ebyosi ebyo Yehova abwira Musa.
6 Aliwe Abaisraeli mubasungikamo abalume abaterire kundi mubakatula oko kinda.* Neryo babya isibangatoka eriteghekania obuhere bw’Epasaka omo kiro ekyo. Mubasa embere sya Musa na Haruni ekiro ekyo.
7 Mubabwira Musa bati: “Itwe sitwerire kundi mutukatula oko kinda.* Ekyo kyanganaleka itutaherera Yehova y’obuhere haghuma n’Abaisraeli oko mughulu owabirihirwaho?”
8 Musa mwabasubirya ati: “Mubye aho, nibulaye Yehova ngakendibugha atiki oko mwatsi wenyu.”
9 Neryo Yehova mwabwira Musa ati:
10 “Ubwire Abaisraeli uti, ‘Omo kati-kati kenyu kutse omo bana benyu abakendisyabutwa mwamasungika omundu oyuterire kundi mwakatula oko kinda,* kutse kundi mwakaghenda hali, ritolere tu iniateghekanirya Yehova y’obuhere bw’Epasaka.
11 Ritolere iniateghekaniabo ekiro 14, omwisi w’akabiri, omo kagholo-gholo.* Bakendiryabo n’omukati owatemo levire* n’emboka y’ebiti ebikalihire.
12 Isyasakaya, isiyahika tututu ibikineho, kandi isyabuna erikuha ryosi-ryosi ry’enyama y’obuhere obo. Ritolere iniateghekaniabo erikwamana n’ebyalayiro byosi ebilebirye Epasaka.
13 Aliwe omundu oyo werire kutse oyutalue oko lughendo amabighana eriteghekania obuhere bw’Epasaka, ritolere omundu oyo initibwa, kundi syataherera Yehova obuhere oko mughulu owabirihirwaho. Omundu* oyo akendihabwa amalipizi busana n’erilolo riwe.
14 “‘Omundu w’ehandi oyo wikere omo kati-kati kenyu, naye ritolere iniateghekanirya Yehova y’obuhere bw’Epasaka. Ritolere iniakwama ebyalayiro ebikakanganaya ngoko Epasaka ikateghekanibawa. Omundu w’ehandi n’Omwisraeli ghere-ghere, abosi bakendibya bakakwama ekyalayiro kighumerera.’”
15 Aliwe ekiro ehema yahimbawa, ekitu mukyaswika ehema, ehema y’endaghane. Aliwe omw’igholo, ekindu ekiri ng’omuliro mukyabya endata oko hema, erihika omo tututu.
16 Omwatsi owabya akabya w’ono: Ekitu ekikaswika ehema eyo omw’itungyi, n’ekindu ekyabya ng’omuliro ikikaswikayo omo kiro.
17 Ekitu ikikabya kyabilua oko hema, Abaisraeli ibakatsuka olughendo, n’aho ekitu kikendimana iho bakapanga.
18 Abaisraeli ibakatsuka olughendo omughulu Yehova amabugha ati baghende, kandi ibakapanga omughulu Yehova amababwira ati bapange. Babya isibangaghenda ekitu kitekyalua oko hema.
19 Ekitu ikikabya kyabibugha ebiro binene oko hema, Abaisraeli ibakasikaya Yehova, neryo isibangaghenda.
20 Ihakanabya omughulu ekitu ikyabugha oko hema ko biro bike. Ibakapanga omughulu Yehova amababwira ati bapange, kandi ibakatsuka olughendo omughulu Yehova amababwira ati baghende.
21 Ihakanabya omughulu ekitu ikyasighalaho eritsuka omw’igholo erihika omo tututu. Neryo ikikabya kyabiluaho omo tututu, ibakatsuka olughendo, nomo ryangabya ritungyi kutse ekiro, ekitu kyamabiyisumba, ibakaghenda.
22 Nomo byangabya biro bibiri, omwisi mughuma, kutse binene okw’aho, ekitu kyamabya tu ikikine endata w’ehema, Abaisraeli ibakendibya ibanapangire aho, isibangabanduka. Aliwe ikikabya kyabiyisumba, ibaghenda.
23 Ibakapanga omughulu Yehova amababwira ati bapange, kandi ibakatsuka olughendo omughulu Yehova amababwira ati baghende. Ibakasikaya ebyo Yehova akababwira erilabira Musa.
Amaelezo awehikwa
^ Kinywa kwa kinywa, “omo kati-kati k’amagholo abiri.”
^ Kinywa kwa kinywa, “omo kati-kati k’amagholo abiri.”
^ Kutse “nafsi y’omundu.”
^ Kutse “nafsi y’omundu.”
^ Kutse “nafsi.”
^ Kinywa kwa kinywa, “omo kati-kati k’amagholo abiri.”
^ Kutse “kihamya.”
^ Kutse “Enafsi.”
