Emisyo 11:1-31
11 Yehova aponire ekilo ekitaleghire ndeke,*Aliwe akatsemera ekindu ky’erilengamo* eky’ekwenene.
2 Omundu amabiyilabirirya, ekyo kikaleka iniahemuka,Aliwe abandu abayasi lulengo bali n’amenge.
3 Eriluyirirana ry’abandu abatunganene rikabasondola,Aliwe emikolere eyitalungukere y’abatebya ikendisyaleka ibahera.
4 Obuteke sibwendisyabya na mughaso omo kiro ky’erihitana rinene,Aliwe eritunganene ryo rikendisyabalya abandu oko luholo.
5 Eritunganene ry’omundu oyuluyirirene rikalungula enzira yiwe,Aliwe omubi akendisyatera busana n’obubi bwiwe.
6 Eritunganene ry’abandu abaluyirirene rikendisyababalya,Aliwe abatebya bakendisyahambwa omo syongumbu syabo-syabo.
7 Omubi akabya abihola, amaha wiwe akahweraho;N’ebyo abya akalindirira busana n’obutoki bwiwe nabyo bikahweraho.
8 Omundu oyutunganene akasabulawa omo buhanya,N’omubi akimaya omwanya wiwe.
9 Omundu oyutasikirye oMungu akaheraya mulikyabo omo binywa ebikalua omo buno bwiwe,Aliwe emyatsi eyo bandu abatunganene basi ikabasabula.
10 Emyatsi eyuwene eyo bandu abatunganene bakakola ikaleka omo muyi imwabya obutseme,N’omughulu ababi bakahola, abandu bakatsema kutsibu.
11 Omuyi akuwana busana n’omuyisa w’abandu abatunganene,Aliwe obuno bw’ababi bukahimbulagho.
12 Oyutawite obwenge* akapokaya mulikyabo,Aliwe omundu oyuli n’obutoki bunene bw’eriyiteghererya akabya bukutu.
13 Oyukalegha abandi akalaba-laba akabisula ekumbo,*Aliwe omundu w’eriyiketerwa* akabika ekumbo.*
14 Abandu bakaghalawa omughulu hate obusondoli obuwene,*Aliwe emyatsi ikatokekana omughulu hali abahani bangyi.
15 Oyukayisinga erilihira omundu oyo atasi y’edeni aminye ngoko ekyo kikendimuletera olubanza,Aliwe oyukaghana* eriha oghundi y’ebyala akayisinga erimulihira edeni, iye syendibyako lubanza.
16 Omukali oyuwene akabana olukengerwa,Aliwe abandu abatekwa obulighe bakapura obuteke.
17 Omundu oyuwene* akayiletera endundi,Aliwe omutsibu akayiletera amaligho.*
18 Omubi akabana omusahara owate w’ekwenene,Aliwe oyukahera eritunganene akabana ekihembo ky’ekwenene.
19 Omundu oyukimira eritunganene akendisyabana engebe,Aliwe oyukakwamirira ekibi akendisyahola.
20 Yehova aponire abawite omutima mubi,Aliwe akatsemera abandu abaluyirirene.
21 Ulighe kino: Omundu mubi syendisyabula erihabwa amalipizi,Aliwe abana b’abandu abatunganene bakendisyabala.
22 Omukali mubuya oyute n’obwenge,Ali ng’embuka y’ehoro eyiri omo nindo y’engulube.
23 Engumbu y’abandu abatunganene ikabatwala oko ekyuwene,Aliwe ebyo babi bakahiramo amaha bikakolaya okw’ihitana rinene.
24 Hane oyukahitaya butsira buhemu,* aliwe oko mwiso iniabya n’ebindu binene kutsibu,Ihabya oyukabika ebyo angahere abandi, aliwe iniabya mwera.
25 Oyukahitaya akendisyabya n’ebindu binene,N’oyukaha abandi b’eky’erinywa* naye akendisyahabwa eky’erinywa.
26 Abandu bakendisyatakira oyukabika engano,Aliwe bakendisyatsumula oyukaghulayayo.
27 Oyukasondekanaya obuli kanya k’erikola ekyuwene akarondaya olukogho,Aliwe oyukasondekanaya obuli kanya k’erikola mw’ekibi, ekibi kyo kinemwendisyamuhikira.
28 Oyukayiketera obuteke bwiwe akendisyatera,Aliwe omundu oyutunganene akendisyabogha ng’ebiti.
29 Oyukaletera ekihanda kiwe ky’amaligho,* ekihunga kyo kikendisyabya mwandu wiwe,N’omukiru akendisyabya akakolera omundu w’amenge.
30 Ebikaluira omo mikolere* y’omundu oyutunganene ni muti w’engebe,N’omundu oyukawatikaya abandi erikola ebyuwene* awite amenge.
31 Omundu oyutunganene amabya iniakahabawa ekyo atolere,Bikendisyabya biti oko mubi n’omukoli w’amalolo?
Amaelezo awehikwa
^ Kutse “ky’amabehi.”
^ Kutse “eribwe ry’erilengamo erighonere.”
^ Kinywa kwa kinywa, “Oyubulire omutima.”
^ Kutse “esiri.”
^ Kinywa kwa kinywa, “omundu mutaleghula omo kirimu.”
^ Kinywa kwa kinywa, “akaswika omwatsi.”
^ Kutse “obusondoli bw’amenge.”
^ Kinywa kwa kinywa, “oyukapona.”
^ Kutse “Omundu oyuli n’olwanzo oluteleghula.”
^ Kutse “erihemuka.”
^ Kinywa kwa kinywa, “oyukapanza-panza.”
^ Kinywa kwa kinywa, “b’amaghetse.”
^ Kutse “ky’erihemuka.”
^ Kinywa kwa kinywa, “Eritunda.”
^ Kinywa kwa kinywa, “oyukabana esyonafsi.” Ulebaye Amaana w’ebinywa.
