Emisyo 12:1-28
12 Oyo wanzire erikungwa anzire erigha emyatsi,Aliwe oyuponire erikungwa syawite obwenge.
2 Yehova akatsemera omundu oyuwene,Aliwe akalangira omundu oyukapanga erikola ebibi mo mubi.
3 Omundu syangabya buholo omw’ikola obubi,Aliwe omundu oyutunganene syendisyakulangwa n’ahake.
4 Omukali oyuwene* ni mbita y’omwira wiwe,Aliwe omukali oyukakola emyatsi eyikita esisoni ali ng’obukoni obukahondaya amakuha w’omulume wiwe.
5 Amalengekania w’abatunganene uwene,Aliwe amahano w’ababi akateba abandu.
6 Ebinywa by’ababi biri ng’abandu abakalimbaya abandi batoke eribita,*Aliwe obuno bw’abandu abatunganene bukasabulabo.
7 Omughulu ababi bakatoghotibawa, sibalisyabyaho,Aliwe enyumba y’abandu abatunganene ikendisyabya iyinimene.
8 Omundu akapipawa busana n’ebinywa by’amenge ebikalua omo buno bwiwe,Aliwe oyuli n’omutima owahengemire akapokibawa.
9 Kyuwene erisikibwa hake, aliwe ighunawite omughombe,Kulenga kw’eriyihalamba isighuwite eky’erirya.*
10 Omundu oyutunganene akatsomana esyonyama siwe sy’eritunga,*Aliwe omubi ni mutsibu nibya n’omughulu akalengekanaya ati amaghanyira.
11 Oyukalima eririma riwe akendisyughuta akalyo,Aliwe oyukakwamirira emyatsi mitya-mitya syawite obwenge.*
12 Omubi akayitsutsa ebyo bandu babi balyahamba,Aliwe omulihi w’abandu abatunganene akasako amatunda.
13 Omundu mubi akahambawa omo kitegho ky’ebinywa biwe ebituwene,Aliwe omundu oyutunganene akayilusaya omo buhanya.
14 Omundu akughuta ebyuwene busana n’ebinywa biwe,N’omubiiri ogho akakola akamuhemba.
15 Omukiru akalangira ebyo akakola nga byuwene,Aliwe omundu w’amenge akahulikirira amahano.
16 Omukiru akalw’iniakangania* ngoko abirihitana,Aliwe omundu w’amenge syalitsomana bakamutsamba.
17 Omwimiri* mutaleghula akabugha ekwenene,Aliwe omwimiri w’amabehi akabugha amabehi.
18 Eribugha ebinywa butsir’ilengekania riri ng’eritsimita omundu y’omo muyali,Aliwe olulimi lw’abandu b’amenge lukalamaya.
19 Eminywa eyikabugha ekwenene ikendisyabyaho kera na kera,Aliwe olulimi olukabugha amabehi lukendisyabyaho katambi kake.
20 Abakapanga erikola ebibi bali m’omutima owaswiremo amabehi,Aliwe abakahiraho obuholo batsemire.
21 Omundu oyutunganene syendisyahikirwa n’omwatsi mubi,Aliwe omubi akendisyahikira n’amaligho manene.
22 Yehova aponire eminywa eyikabugha amabehi,Aliwe akatsemera abakakola omo butaleghula.
23 Omundu w’amenge akabisa ebyo asi,Aliwe omutima w’abakiru akatububukamo bukiru.
24 Ebyala by’abakola kutsibu bikendisyatabala,Aliwe ebyala by’abaghata bikendisyahabwa omubiiri w’erikaswa.
25 Erihangya-hangya omo mutima rikaghalaya omundu,Aliwe ebinywa ebyuwene bikatsemesaya.
26 Omundu oyutunganene akasombola ahuwene ah’erilisirya,Aliwe ebyo bandu babi bakakola bikabaheraya.
27 Omughata syalikwamirira akanyama akahigha,Aliwe omuhwa ni w’omughaso munene oko mundu.
28 Enzira y’omundu oyutunganene ikatwala oko ngebe;Omo nzira eyo simuli luholo.
Amaelezo awehikwa
^ Kutse “w’obutoki.”
^ Kinywa kwa kinywa, “bikalimbaya busana n’omusasi.”
^ Kinywa kwa kinywa, “omukati.”
^ Kutse “enafsi y’enyama yiwe y’eritunga.”
^ Kinywa kwa kinywa, “abulire omutima.”
^ Kutse “akakanganaya ekiro ekyo kisa-kisa.”
^ Kutse “Omutemwe.”
