Emisyo 13:1-25
13 Omwana w’amenge akakwama ebinywa by’erikunga bya baba wiwe,Aliwe omundu oyukasekereraya syalihulikirira ebinywa by’erikunga.
2 Omundu akalya ebyuwene busana n’ebinywa biwe,Aliwe ekyo mutebya anzire kutsibu bo n’obutsururu.
3 Oyukalengekanaya embere sy’eribugha akateghaya engebe yiwe,Aliwe oyukatanda obuno bwiwe akendihikirwa n’obuhanya.
4 Omughata akayitsutsa bindu bingyi, aliwe isyawite ekindu,Nikwa oyukakola n’omuhwa akendisyughutibwa.*
5 Omundu oyutunganene aponire amabehi,Aliwe ebyo mubi akakola bikaluiramo erihemuka n’esisoni.
6 Eritunganene rikateghaya omundu oyute n’ekosa,Aliwe obubi bukatoghaya omukoli w’amalolo.
7 Hane omundu oyukayiwata nga ni muteke, aliwe isyawite oko kindu,Ihabya n’oyukayiwata nga ni mwera, aliwe ini muteke kutsibu.
8 Obuteke bw’omundu yo mbanulo y’engebe* yiwe,Aliwe abera sibalisagha kindu.*
9 Ekyakakala ky’abandu abatunganene kikakoleraya kutsibu,*Aliwe etala y’ababi ikendisyalima.
10 Eriyilabirirya rikaleka ihabya obuhaka,Aliwe abandu abakaronda amahano* bo bawite n’amenge.
11 Obuteke obo mundu akabana luba-luba* bukendisyahwerekerera,Aliwe obuteke obo mundu akabana bolo-bolo* bukendisyakanya.
12 Omughulu omwatsi ogho mundu akalindirira* akatseleghawa, ekyo kikaleka omutima wiwe inialwala,Aliwe omughulu omwatsi ogho mundu anzire akabererera, ekyo ni muti w’engebe.
13 Oyukapokaya obusondoli* akendisyaghalwa,Aliwe oyukasikaya omughambo akendisyahembwa.
14 Amakangirirya* w’omundu w’amenge ni ngununuko y’engebeEyikalusaya omundu omo bitegho by’oluholo.
15 Amenge manene akaleka ibatsemera omundu,Aliwe enzira y’abatebya yiswiremo amaligho.
16 Omundu w’amenge akakola n’amenge,Aliwe omukiru akakanganaya obukiru bwiwe.
17 Omutumwa mubi akahikirawa n’obuhanya,Aliwe omutumwa mutaleghula akalamaya.
18 Oyukapokaya ebinywa by’erikunga akabya mwera kandi akahemuka,Aliwe oyukaligha ebinywa by’erikunga akendisyapipwa.
19 Omundu akatsema akalangira ekyo anzire kikabererera,Aliwe abakiru sibalyanza erileka ebibi.
20 Oyukatamba n’abandu b’amenge akendibya mundu w’amenge,Aliwe oyukasiba n’abakiru akendihutala.
21 Obuhanya bukakwamirira abakoli b’amalolo,Aliwe emiyisa ikahemba abandu abatunganene.
22 Omundu oyuwene akasighira abitsikulu biwe b’omwandu,Aliwe obuteke bw’omukoli w’amalolo bukendisyabikirwa omundu oyutunganene.
23 Eririma eryo omwera alyalima rikeramo akalyo kangyi,Aliwe ryanganabulirana* busana n’eritatunganene.
24 Oyutehunza omwana wiwe y’omo fimbo* iniamuponire,Aliwe oyo wanzire omwana wiwe syalibula erimukunga.*
25 Omundu oyutunganene akalya n’eryughuta,Aliwe enda y’omubi ikabya isiyirimo kindu.
Amaelezo awehikwa
^ Kinywa kwa kinywa, “akendisyanenehibwa.”
^ Kutse “enafsi.”
^ Kinywa kwa kinywa, “sibalihulikirira ebinywa by’erikunga.”
^ Kinywa kwa kinywa, “kikatsema.”
^ Kutse “abakakola akasyakulu.”
^ Kutse “obukalua omo bindu ebite na mughaso.”
^ Kinywa kwa kinywa, “akakuma-kuma omo byala.”
^ Kutse “amaha.”
^ Kutse “ekinywa.”
^ Kutse “Emighambo.”
^ Kutse “eririma eryo ryanganabulirana.”
^ Kutse “Oyutekunga omwana wiwe; Oyuteha omwana wiwe y’amalipizi.”
^ Kutse alinga, “akalw’iniamukunga.”
