Emisyo 14:1-35
14 Omukali oyo kwenene-kwenene awite amenge akahimba enyumba yiwe,Aliwe omukali mukiru akahimbulayo omo byala biwe-biwe.
2 Oyukayighendaya ndeke akubaha Yehova,Aliwe oyukakola emyatsi eyihengemire akamupokaya.
3 Ebinywa by’emiyiheko by’abakiru biri ng’efimbo,Aliwe eminywa y’abandu b’amenge ikabateghaya.
4 Ahate esyonyama, ekindu ky’erihiriramo esyonyama akalyo kikabya ikinerire,Aliwe akaghala k’enume y’ende kakeraya ebyalya binene.
5 Omwimiri* mutaleghula syalibugha amabehi,Aliwe omwimiri mubehi akabugha amabehi w’obuli ndambi.*
6 Omundu oyukasekereraya akarondaya amenge, aliwe syalisungagho,Aliwe omundu oyuwite obutoki bw’eryowa emyatsi yo ndeke akaminya myatsi mingyi yo bweghu-bweghu.
7 Isiwabya hakuhi n’omukiru,Kundi isiwendiminya emyatsi wamabimuhulikirira.
8 Amenge akawatikaya omundu w’amenge eriminya enzira eyo akalabamo nga yiri yiti,Aliwe obukiru bw’abakiru bukabateba.*
9 Abakiru bakanza babikola ekosa,*Aliwe abandu abatunganene bakanza erisubyaho obughuma omo katika-kati kabo.
10 Omutima musa wakaminya obuligho* bwagho,Sihali omundu oyo wangasangira oko butseme bwagho.
11 Enyumba y’ababi ikendisyatsandibwa,Aliwe ehema y’abandu abatunganene siyendisyalusibwaho.
12 Hali enzira eyo mundu akalangira nga yuwene,Aliwe omwiso wayo ini luholo.
13 Omundu anganabya iniane museka, aliwe omutima wiwe inianemwaghalwa,N’obutseme bwanganabinduka mo bulighe.
14 Omundu w’omutima owatuwene akendisyahikirwa n’ebikaluira omo ebyo akakola,Aliwe omundu oyuwene akahembawa busana n’emikolere yiwe.
15 Omundu oyutewatalola oko binene akikiriraya obuli mwatsi,Aliwe omundu w’amenge akayilandako.
16 Omundu w’amenge akayilandako n’eriyihighula oko bubi,Aliwe omukiru syalitsomana* kandi akabya inianayilighire.
17 Oyukahitana luba-luba akakola omo bukiru,Aliwe omundu oyukatsopolaya emyatsi yo ndeke* akaponawa.
18 Abandu abatebatalola oko binene bakendisyahabwa obukiru mo mwandu,Aliwe abandu b’amenge bakendisyambalibwa embita y’eriminya emyatsi.
19 Abandu babi bakendisyunama embere sy’abandu abuwene,N’abandu babi bakendisyakukama embere sy’emilango y’abatunganene.
20 Omwera aponirwe nibya n’abahimbani biwe,Aliwe omuteke awite abira banene.
21 Oyukapokaya mulikyabo akakola erilolo.
Aliwe oyukakwira abandu b’ahisi b’obulighe atsemire.
22 Siwasi ngoko abakapanga erikola ebituwene bakendisyahera?
Aliwe abanzire erikola ebyuwene bakendisyabana olukogho* n’obutaleghula.
23 Omubiiri wosi-wosi ogho mundu akakola n’omuhwa akaletera endundi,Aliwe eribugha-bugha risa rikaleka omundu iniabulirwa.
24 Embita y’abandu b’amenge b’obuteke bwabo;Aliwe obukiru bw’abakiru ni bukiru busa-busa.
25 Omwimiri* oyukabugha ekwenene akasabula engebe y’abandu,Aliwe omwimiri oyukabugha amabehi akabugha amabehi w’obuli ndambi.*
26 Omundu oyukubaha Yehova akayiketera iye yo kutsibu,N’erimubaha rikendisyabya busayiro bw’abana biwe.
27 Eryubaha Yehova ni ngununuko y’engebe,Rikalusaya omundu omo bitegho by’oluholo.
28 Omwami akabya n’olukengerwa omughulu awite oko bandu bangyi,Aliwe omutabali oyutawite abandu abo akatabala obutoki bwiwe bukahwa.
29 Oyutehitana luba-luba ali n’obutoki bungyi bw’eriyiteghererya,Aliwe oyukahumayira akakanganaya obukiru bwiwe.
30 Omutima owatulere akaleka omubiri iniuwana,*Aliwe eritsuro ni bukoni obukahondaya amakuha.
31 Oyukiba ebindu by’omundu w’ahisi akatsamba Omuhangyiki w’omundu oyo,Aliwe oyukakwira omwera y’obulighe akaha Omuhangyiki w’omwera oyo y’olukengerwa.
32 Obubi bw’omubi bo bunemwendisyamuterya,Aliwe omundu oyutunganene akendisyabana obusayiro omo mighendere yiwe eyiluyirirene.
33 Amenge atekene omo mutima w’omundu oyuli n’obutoki bw’eryowa emyatsi yo ndeke,Aliwe syalibula eriyikangania omo kati-kati k’abakiru.
34 Eritunganene rikaleka ekihugho ikyasikibwa,Aliwe erilolo rikahemula abandu.
35 Omwami akatsemera omughombe oyukakola n’amenge,Aliwe akahitana kutsibu oko oyukakola emyatsi eyikita esisoni.
Amaelezo awehikwa
^ Kutse “Omutemwe.”
^ Kutse “ngoko akahumula.”
^ Kutse alinga, “abakiru bakateba abandi.”
^ Kutse “sibalyanza erikokotya emyatsi eyo balyatsandaya.”
^ Kutse “obulumi.”
^ Kutse “ahitene kutsibu.”
^ Kutse “oyuwite obutoki bw’erilengekania ndeke.”
^ Kutse “olwanzo oluteleghula.”
^ Kutse “Omutemwe.”
^ Kutse “ngoko akahumula.”
^ Kinywa kwa kinywa, “akaha omubiri w’engebe.”
