Emisyo 17:1-28
17 Kyuwene eribya n’ekihande ky’omukati oghumire ahali obuholo,*Kulenga kw’eribya omo nyumba eyikabya iyinaswiremo akalyo,* aliwe imuli erikura-kurana.
2 Omughombe w’amenge akendisyatabala omwana oyukakola emyatsi eyikit’isoni;Akendisyahabwa omwandu ng’abaghala b’omukama wiwe.
3 Enyungu y’eryereryamo ni y’eryereryamo efeza,* n’eriko ni ry’eryereryamo ehoro,Aliwe Yehova yukalebaya ebiri omo mitima.
4 Omubi akahulikirira ebinywa ebikahutalaya,N’omundu oyukateba akahulikirira olulimi olutuwene.
5 Omundu oyukasekereraya omwera akabya iniakatsamba Omuhangyiki w’omwera oyo,N’omundu oyukatsemera amaligho w’abandi syendisyabula erihabwa amalipizi.
6 Abitsikulu ni mbita y’abandu abakulire,N’abobaba* ni lukengerwa lw’abana babo.
7 Kikaswekaya omukiru amabugha ebinywa ebilungukere.
Kikatasyaswekaya kutsibu omutabali* amabugha ebinywa by’amabehi.
8 Ekihembo kiri ng’eribwe* ry’obughuli oko mwinyekyo,Ahosi-hosi aho akabindukira, kikamuletera emiyisa.
9 Oyukaghanyira* ekosa akarondaya olwanzo,Aliwe oyukabya inianemubugha-bugha oko mwatsi mulebe akaleka abira ibaghabana.
10 Ebinywa by’erihayira bikawatikaya kutsibu omundu oyuli n’obutoki bw’eryowa emyatsi yo ndekeKulenga kw’erihunza omukiru y’esyofimbo 100.
11 Ekyo mundu mubi akanarondaya w’ono mulele,Aliwe omutumwa mutsibu akendisyatumwa busana n’eriha omubi oyo y’amalipizi.
12 Kamwanya iwahindana n’edubu eyabirilusibwako ebyanaKulenga kw’erihindana n’omukiru oyuyiketere obukiru bwiwe.
13 Omundu amabikolera ekibi oyulyamukolera ekyuwene,Obubi isibwendisyalua omo nyumba yiwe.
14 Eritsukisya amalwa riri ng’eriturisya amaghetse;Embere amalwa atsuke, ulueho.
15 Oyukabugha ati omubi syali n’ekosa n’oyukabugha ati omundu oyutunganene ali n’ekosa,Yehova aponire abosi babiri abo.
16 Kiri na ndundi yahi omukiru iniabya n’ebyangamuwatikya eribana amengeAliwe isyanzire n’eribanagho?*
17 Omwira w’ekwenene akakanganaya olwanzo mughulu wosi,Kandi ni mughala oyo wabutawa busana n’emighulu y’obuhanya.
18 Omundu oyutawite obwenge* akaha oghundi y’ebyala n’erilighaAti akendimulihira edeni embere sya mulikyabo.
19 Omundu oyo wanzire obuhaka anzire ekosa.
Oyukayira omulango wiwe mo muli akayibirikirira obuhanya.
20 Omundu oyuli n’omutima owakondomire syendisyabana kibuya,N’oyukabugha ebinywa by’amabehi akendisyahikirwa n’obuhanya.
21 Oyukabuta omwana mukiru akendisyabya omo bulighe;Na baba w’omwana oyutawite obwenge syalibya n’obutseme.
22 Omutima owatsemire ni dawa eyuwene.
Aliwe ekirimu ekipondekene kikabugha omo mundu mw’akaghala.*
23 Omundu mubi akimaya ekyutuliro omo bubiso-biso,*Atoke eritswera emyatsi yo muhanda.
24 Amenge akabya iniane embere sy’omundu oyukayiteghereraya,Aliwe omukiru akamara-maraya ameso eriyahika oko mipaka y’ekihugho.
25 Omwana mukiru akaletera baba wiwe y’obuligheKandi akaluhaya omutima w’oyo wamubuta.
26 Eriha omundu oyutunganene y’amalipizi si kyuwene,N’erihunza abandu abasikibwe sikitolere.
27 Omundu oyo wasi myatsi minene akakakiraya olulimi lwiwe,N’omundu oyukayiteghereraya akatulera.
28 Nibya n’omukiru amabibya bukutu, akalangirawa mo w’amenge,N’oyukamuma eminywa yiwe akalangirawa mo mundu oyuwite obwenge.
Amaelezo awehikwa
^ Kutse “eritulera.”
^ Kinywa kwa kinywa, “amahere.”
^ Ni kindu ky’obughuli ekikalua omo kitaka.
^ Kutse “N’ababuti.”
^ Kutse “eseghu-seghu.”
^ Kutse “ng’eribwe erikaleta olukogho.”
^ Kinywa kwa kinywa, “Oyukaswika.”
^ Kutse “isyawite obwenge?”
^ Kinywa kwa kinywa, “oyubulire omutima.”
^ Kutse “kikumaya amakuha.”
^ Kinywa kwa kinywa, “akimirayakyo oko kikuba.”
