Emisyo 18:1-24
18 Oyukayihighula oko bandi akakwamirira ebyo anzire iyuwene-wene;Akaghana* amenge wosi.
2 Omukiru syalitsemera obutoki bw’eryowa emyatsi yo ndeke;Aliwe akanza erihulukya ebiri omo mutima wiwe.
3 Omubi akabya abikola ekibi, abandu bakamupokaya,N’omundu akabya abikola emyatsi eyikita esisoni, akahemuka.
4 Ebinywa ebikalua omo buno bw’omundu biri ng’amaghetse awalimo mutobero,Engununuko y’amenge ni kusi akakasenda.
5 Si kyuwene erimira omubiKutse eritendikolera omutunganene ngoko atolere erikolerwa.
6 Ebinywa by’omukiru bikaleka ihabya amalwa,N’obuno bwiwe bukaleka abandi ibanza erimuhunza.
7 Obuno bw’omukiru bo bukanamuletera obuhanya,N’eminywa yiwe ni kitegho ky’engebe* yiwe.
8 Ebinywa by’oyukalegha abandi biri ng’ebyalya ebisihire;*Ebyo omundu akamera neryo ibyalw’ibyandaghalira omo kihu.
9 Oyukakola omubiiri n’obughataNi mughala wab’oyukaleta obuhanya.
10 Erina rya Yehova ni nyumba nyiri-nyiri eyiwatire.
Omundu oyutunganene akatibitiramo n’eriteghibwa.*
11 Omuteke akalangira obuteke bwiwe ng’omuyi owawatire;Omo mutwe wiwe, obuteke bwiwe buli ng’oluhimbo olukamuteghaya.
12 Embere obuhanya buhikire omundu, omutima wiwe akatsuka abyamo emiyiheko,N’embere omundu ahabawe olukengerwa, akatsuka ayikehya.
13 Omughulu omundu akabugha oko mwatsi isyalyaminyagho ndeke,*Ni bukiru kandi ni hemuka.
14 Erisika omo mutima ryanganawatikya omundu omughulu alwere,Aliwe nindi yo wangavumilia eribunika mutima?*
15 Omutima w’omundu oyuli n’obutoki bw’eryowa emyatsi yo ndeke akaminya emyatsi mingyi,N’okutu k’omundu w’amenge kukasonda eriminya emyatsi mingyi.
16 Ekihembo ekyo mundu akateka kikamukingulira enzira,Kikaleka iniahika ahali esyoseghu-seghu.
17 Oyukatsuka eritonda akabya ng’asingene,Erihika omughulu oghundi akasa neryo iniamubwira ati akanganaye ebyo alyabugha nga nina kwenene.*
18 Obukanga bukabugha obuhaka,Kandi bukakanganaya oyusingene nga nindi omo kati-kati k’abandu babiri b’amaka abakalwa.
19 Omughala oyo balyakosera akalire kulenga omuyi owawatire,Hali obuhaka obuli ng’ehyuma ehiri oko milango y’enyumba eyiwatire.
20 Ebinywa ebikalua omo buno bw’omundu bikendyughutya enda yiwe;Akendyughuta ebikalua omo buno bwiwe.
21 Olulimi luli n’obutoki bw’eriita n’obw’eriha engebe;Abanzire erikolesyalo litolere ibaligha ebikendiluiramo.
22 Oyukabana omukali oyuwene akabya iniamasunga ekindu ekyuwene,Kandi akabana olukogho lwa Yehova.
23 Omwera akabugha omo mulenge w’erilemba-lemba,Aliwe omuteke akasubiraya omo butsibu.
24 Hane abira abali tayari erihutalania,Aliwe hane omwira oyukamatana oko mundu kulenga na mughala wabo.
Amaelezo awehikwa
^ Kutse “Akapokaya.”
^ Kutse “ky’enafsi.”
^ Kutse “ng’ebindu ebyo mundu akamera n’omururu.”
^ Kinywa kwa kinywa, “n’erisumbirwa endata,” ni bugha ambu, aho batebangamuhikako, ahali obuholo.
^ Kutse “embere sy’erihulikirira emyatsi ngoko yiri.”
^ Kutse “eribula amaha wo losi?”
^ Kutse “iniamubulirirya.”
