Emisyo 24:1-34
24 Isiwanza eribya ng’ababi,Kandi isiwanza eribya mwira wabo.
2 Kundi emitima yabo ikalengekanaya oko butsururu,N’eminywa yabo ikabugha emyatsi mibi.
3 Enyumba* ikahimbawa omo menge,N’obutoki bw’eriyiteghererya bukaleka iyasika.
4 Eriminya emyatsi mingyi ryo rikusulaya omo byumba byayoMw’emihanda yosi y’ebindu by’obughuli n’ebyuwene.
5 Omundu w’amenge awite amaka,N’eriminya emyatsi mingyi rikaleka omundu iniatasyabya n’akaghala kanene.
6 Omughulu ukayalwa, ukalagha oko busondoli obuwene,N’abandu bakasinga* omughulu abahani ni bangyi.
7 Omukiru syangasunga amenge w’ekwenene;Syawite ekyo angabughira oko mulango w’omuyi.
8 Oyukapanga erikola ekibi,Akendisyahulwa mo mukama w’amayele mabi.
9 Amayele w’omukiru ni rilolo,Abandu bakapona oyukasekereraya abandi.
10 Wamabibunika mutima omughulu w’obuhanya,*Isiwendibya n’akaghala kanene.
11 Usabule abakayahola,Kandi usabule abakatsinga-tsinga bakayakerwa.
12 Wamabibugha uti, “Aliwe itwe tulue isitwasi oko mwatsi oyo,”Ukalengekanaya uti oyukalebaya ebiri omo mitima syasi ebirimo?
Oko kwenene, oyukakusamalira* akendiminyabyoKandi akendisyaliha obuli mundu erikwamana n’ebyo akakola.
13 Mughala waghe, ulya obuki kundi buwene;Obuki obukalua omo kisese bukasiha.
14 Kutya, uminye ngoko amenge uwene okw’iwe.*
Wamabisungagho, ighukendisyabya omo maisa aghuwene omo biro ebikasa.
N’amaha waghu isyendisyahwaho.
15 Omo bubi, isiwalimbiraya omundu hakuhi n’enyumba y’omundu oyutunganene;Isiwatsandaya ah’akaluhukira.
16 Kundi omundu oyutunganene anganawa ahisi ho ngendo 7, aliwe iniakendisyahangana.
Nikwa omubi akendisyatwikala busana n’obuhanya.
17 Omughulu enzighu yaghu ikatera, isiwayisyandira,N’omughulu ikatwikala, isiwatsema omo mutima waghu;
18 Wamabitsema, Yehova iniakendilangira neryo iniapona,Kandi iniakendileka erimuhitanako.*
19 Isiwahitana busana n’abandu* babi;Isiwanza eribya ng’ababi.
20 Kundi ababi sibendisyabya n’amaisa aghuwene omo biro ebikasa;Etala y’ababi ikendisyalima.
21 Mughala waghe, ubahe Yehova n’omwami;Isiwabya mwira w’abatekwama obusondoli.*
22 Kundi obuhanya bw’abandu abo bukendisyasa kitsumbukirania.
Nindi yo wasi obuhanya obo ibo babiri bosi* bakendisyabaletera?
23 Ebinwya bino nabyo ni by’abandu b’amenge:
Sikyuwene eribya n’akasololo ukasoha olubanza.
24 Oyukabwira omubi ati, “Utunganene,”Abandu bakendisyamutakira n’ebihanda bikendisyamutsweba.
25 Aliwe emyatsi ikendisyaghendera ndeke abakamukunga;Bakendisyabana ebindu ebyuwene mo miyisa.
26 Abandu bakendisyaha ebizu y’eminywa y’omundu oyukasubiraya omo kwenene.*
27 Utsuke wapanga ndeke emibiiri yaghu y’ehihya, n’eriteghekania obuli mwatsi omo ririma ryaghu;Wabikola utya, neryo ibwa iwahimba enyumba* yaghu.
28 Isiwashitaka mulikyenyu isihali ekikaleka,Isiwakolesaya eminywa yaghu busana n’eriteba abandi.
29 Isiwabugha uti: “Ngendimukolera ngoko analyanikolera;Ngendimuliha ekyo atolere busana n’ekyo alyakola.”
30 Munalaba hakuhi n’eririma ry’omughata,Hakuhi n’eririma ry’emizabibu ry’omundu oyutawite bwenge.*
31 Munalangira iryabirisuna kutsibu.
Ekitaka ikyabiryusulako ebyatsinge.
N’oluba lw’amabwe oluli oko ririma eryo ilwabiritera.
32 Munalangira omwatsi oyo, n’amabikagho omo mutima;Munalola kugho, neryo mwanighisya omwatsi ono:*
33 Ughotsere hike, uyitsingireko hake,Upatsike ebyala byo hake ukaluhuka,
34 Neryo obwera bwaghu bukendyasa ng’omwibi,N’eribulirwa ryaghu rikendyasa ng’omundu oyuli n’ebindu by’amalwa.
Amaelezo awehikwa
^ Kutse “Ekihanda.”
^ Kutse “bakatoka.”
^ Kutse “w’amaligho.”
^ Kutse “Oyukasamalira enafsi yaghu.”
^ Kutse “bukasihira enafsi yaghu.”
^ Ni bugha ambu, erihitana oko nzighu yaghu.
^ Kutse “Isiwakanganaya ngoko wabirihitana oko bandu.”
^ Kutse “w’abanzire eribindula emyatsi.”
^ Ni bugha ambu, Yehova n’omwami.
^ Kutse “Erisubirya oko ribulyo butsir’itimbya-timbya omundu riri ng’eriha omundu y’ebizu.”
^ Kutse “ekihanda.”
^ Kinywa kwa kinywa, “oyubulire omutima.”
^ Kinywa kwa kinywa, “namakungwa.”
