Emisyo 26:1-28
26 Siritolere omukiru akahabwa olukengerwa,Kutya siritolere enzururu iyatogha omughulu w’ekipwa,* n’embula iyawa omughulu w’erighesa.
2 Ngoko akanyunyu sikalitibita isihali ekikaleka kandi ngoko akasinimbira sikalighuluka isihali ekikaleka,Kutya eritakirwa siriryasa isihali ekikaleka.*
3 Efimbo yiriho busana n’erihunza esabayiri,* n’akuma k’erisondola mo punda ni busana n’erisondola epunda,N’omuti busana n’erihunza emighongo y’abakiru.
4 Isiwasubiraya omukiru omo bukiru bwiwe.
Ukasyabya mukiru nga ye.*
5 Usubiraye omukiru erikwamana n’obukiru bwiwe,Akasyayilangira mo w’amenge.
6 Omundu oyukabwira emyatsi yiwe y’omukiru,Ali ng’omundu oyukalehemaya amaghulu wiwe n’eriyihutalya iyuwene-wene.*
7 Omusyo owakalua omo buno bw’abakiruAli ng’amaghulu w’ekirema awakabya inianemutsinga-tsinga.
8 Eriha omukiru y’olukengerwa,Riri ng’eribohera eribwe ry’oko mujeledi.
9 Omusyo owakalua omo buno bw’abakiru,Ali ng’ekiti ekiriko amahwa ekiri omo byala by’omutamiri.
10 Oyukaha omukiru y’omubiiri kutse oyukahagho abalabi,Ali ng’omundu oyukaghusa emisali neryo iniasisira iniamabihutalya abandu.
11 Ngoko embwa ikasubira ebisalo byayo,N’omukiru akasubirira omo bukiru bwiwe.
12 Unewatalola oko mundu oyukayilangira mo w’amenge?
Hane amaha oko mukiru kulenga oko omundu oyo.
13 Omughata akabugha ati: “Esimba nyilere yine omo ndaki!
Esimba yine omo mwanya w’abandu bosi!”
14 Omulango akabya inianemutimbira oko syosernyere* syagho,N’omughata akabya inianemuyibindingula omo ngyingo yiwe.
15 Omughata akatoberaya ebyala biwe omo kibakuli ky’efete,Aliwe iniataluka n’erikolyabyo n’oko buno bwiwe.
16 Omughata akalengekanaya ati ali n’amenge kulengaAbandu 7 abakasubiraya n’obwenge.
17 Omulabi oyukahitana busana n’amalwa* awatamulebirye,Ali ng’omundu oyukahamba amatwi w’embwa.
18 Omusire oyukaghusa ebindu by’amalwa ebiriko omuliro, oyukaghusa emisali, n’oluholo,*
19 Ali ng’omundu oyukatsanga omo mulikyabo neryo iniabugha ati: “Nilue ngatenya!”
20 Omuliro akalima ahate esyongwe,N’obuhaka bukahwa ahate oyukalegha abandi.
21 Ngoko eriongezya amakala w’oko makala awakire rikaleka iniatasyaka kutsibuKandi ngoko esyongwe sikaleka omuliro iniatasyaka kutsibuKutya n’omundu w’omwagha akakanyaya obuhaka.
22 Ebinywa by’omundu oyukalegha abandi biri ng’ebyalya ebisihire;*Ebyo mundu akamera neryo, ibyalw’ibyandaghalira omo kihu.
23 Ebinywa by’olwanzo ebikalua omo mutima mubi,Biri ng’efeza* eyo babirihaka oko kindu ky’eribumba.
24 Oyuponire abandi akabisa omwatsi oyo omo minywa yiwe,Aliwe emwisi siwe inianemupanga eribateba.
25 Nomo omundu oyo angabugha ebinywa ebyuwene, isiwayiketera iye,Kundi omo mutima wiwe muli emyatsi 7 eyikita esyonye.*
26 Nomo akakolesaya amabehi akabisa ngoko aponire abandi,Obubi bwiwe bukendisyakanganibwa embere sy’abandu banene.*
27 Oyukatakula ekyuna akendisyatoghera mukyo,N’oyukakumbaghalaya eribwe rikendisyamusubako n’erimuhutalya.
28 Olulimi olukabugha amabehi luponire abo lukahutalaya,N’obuno obukapipa-pipa bukakolaya oko buhanya.
Amaelezo awehikwa
^ Kutse “w’omwisi.”
^ Kutse alinga, “eritakirwa eryo mundu atatolere siryangakola kindu.”
^ Kutse “efarasi; eshevale.”
^ Kutse “Ukasyamusosa.”
^ Kinywa kwa kinywa, “n’erinywa obutsururu.”
^ Kutse “syonzeghuliro.”
^ Kutse alinga, “oyukayingiraya omo malwa.”
^ Kutse “emisali eyikaholaya.”
^ Kutse “ng’ebindu ebyo mundu akamera n’omururu.”
^ Ni kindu ky’obughuli ekikalua omo kitaka.
^ Kutse “Kundi ebyosi ebiri omo mutima wiwe bikita esyonye.”
^ Kutse “omo ndeko.”
