Emisyo 27:1-27
27 Isiwayihalamba busana n’eby’omungya,Kundi siwasi obuli kiro nga hakendibyaki.*
2 Oghundi mundu* yukupipe, butsira obuno bwaghu;Abandi* bo bakupipe, butsira eminywa yaghu.
3 Eribwe rilitohire, n’omutsanga nagho alitohire,Aliwe erihitanibwa n’omukiru rilitohire kulenga ebibiri ebyo.
4 Erihitana kutsibu ni ritsibu n’ekinigha kikatsandaya ng’eribwagha ry’amaghetse,Aliwe eritsuro ni ribi kulenga ebibiri ebyo.
5 Kyuwene erikunga omundu yo burora-burora kulenga kw’erimwanza aliwe isighulimukanganaya ngoko umwanzire.
6 Nomo ryangakuhutalya, erihano eryo mwira waghu akakuha rikakanganaya ngoko ni mutaleghula;Aliwe esyobizu sy’enzighu ni sinene.*
7 Oyubendire* akaghana* obuki obukalua omo kisese,Aliwe oyukwire enzala,* nibya n’ebikalihire bikasiha.
8 Omundu oyukabula oho wiweAli ng’akanyunyu akalyahera* oko luto lwako.
9 Amaghuta n’obukwa bikatsemesaya omutima;N’obwira obuwene obukaluira omo rihano eryuwene bukatsemesaya omutima.
10 Isiwalekeranaya omwira waghu kutse omwira w’ababa waghu,Kandi isiwingira omo nyumba y’omughala wenyu omughulu uli omo buhanya;Omuhimbani oyuli hakuhi alengire mughala wenyu oyuli hali.
11 Mughala waghe, ubye n’amenge, kandi utsemesaye omutima waghe,Nitoke erisubirya oyukanipuma.*
12 Omundu w’amenge akalangira ehatari neryo iniayibisa,Aliwe oyutewatalola oko binene akalola embere, neryo iniahutala.
13 Omundu amabiyisinga eriliha edeni y’omundu oyo atasi, iwamwimyako olukimbwa lwiwe,Amabya inialyakolera atya omukali w’omo kindi kihugho, iwimya ekindu ekyo alyabikisaya.
14 Omundu amabitsumula omulikyabo omo mulenge muli omo tututu,Omulikyabo oyo iniakendilangira emiyisa eyo ng’eritakirwa.
15 Omukali w’omupepe* ali ng’olutwe olukabya ilunemutogha omughulu w’embula.
16 Oyo wangatoka erimukakirya anganatoka erikakirya ekihungaKandi anganatoka erihamba amaghuta omo byala biwe by’amali.
17 Ngoko ekyuma kikaghusungula ekyuma,N’omundu kw’akaghusungula atya omwira wiwe.*
18 Oyukasugha omuti w’esyotini akendisyalya oko matunda wagho,N’oyukasugha omukama wiwe akendisyasikibwa.
19 Ngoko mundu akalangirira obusu bwiwe b’omo maghetse,N’omundu kw’akalangirira omutima wiwe w’atya omo mutima w’oghundi.
20 Eyisinda n’aheritoghoterya abandu* sibiryughuta,Kutya n’ameso w’omundu syalyughuta.
21 Enyungu y’eryereryamo ni y’eryereryamo efeza,* n’eriko ni ry’eryereryamo ehoro,Kutya eripipa omundu ryo rikanganaya omundu oyo ng’ali ati.
22 Nomo wangatwanga omukiru y’omo mutwangiro,Ngoko bakatwanga engano y’omo kingyo.
Obukiru sibwangamuhwamo.
23 Litolere iwaminya ndeke esyonyama syaghu* nga siri siti.
Uteghaye ndeke* esyombuli syaghu.
24 Kundi obuteke bukahwa,N’embita si y’ebizazi* byosi.
25 Ebiti bikahwaho, ihalasa ebihya-bihya,Neryo abandu ibakuma-kuma ebiti by’oko bitwa.
26 Esyombangale esikine nyilere sikaluako ebyo ukambala,N’esyombaya sikaluako eririma.
27 Kandi ukendibana amaziwa w’embene awatosire ogho ukendibya ukanywa,Ogho ekihanda kikendibya kikanywa, n’aw’akendibya akawatikya abaghombe baghu b’obukali.
Amaelezo awehikwa
^ Kinywa kwa kinywa, “obuli kiro nga kikendibutaki.”
^ Kinywa kwa kinywa, “Oyo utasi.”
^ Kinywa kwa kinywa, “Omugheni.”
^ Kutse alinga, “sisirilua omo mutima; ni sy’erikaswa.”
^ Kutse “Enafsi eyibendire.”
^ Kinywa kwa kinywa, “akalyatangira.”
^ Kutse “enafsi eyikwire enzala.”
^ Kutse “akakatibita hali.”
^ Kutse “oyukanikara; oyukanitsokosa.”
^ Kutse “w’ameso.”
^ Kutse “kw’akawatikaya atya omwira wiwe eryuwania emibere yiwe.”
^ Kutse “Esheoli ne Abadoni.”
^ Ni kindu ky’obughuli ekikalua omo kitaka.
^ Kutse “ekihyo kyaghu.”
^ Kutse “Uhire omutima waghu oko; Ulande oko.”
^ Kutse “y’esyondengo.”
