Enzuko 1:1-31
-
OMungu amahangyika olubula n’ekihugho (1, 2)
-
OMungu amateghekania ekihugho omo biro 6 (3-31)
-
Ekiro kye 1: amahiraho ekyakakala; eritungyi n’ekiro (3-5)
-
Ekiro kye 2: amabumba ekyanya (6-8)
-
Ekiro kye 3: amabumba ekitaka, ebiti, n’emiti (9-13)
-
Ekiro kye 4: amabumba ebindu ebikakoleraya (14-19)
-
Ekiro kye 5: amabumba esyosamaki n’esyonyunyu (20-23)
-
Ekiro kye 6: amabumba esyonyama esikaghenda oko kitaka, n’abandu (24-31)
-
1 Oko mwanzo, oMungu mwahangyika olubula n’ekihugho.
2 Nikwa ekihugho kyabya kitya-kitya, kandi sikyabyamo kindu, n’omwirimya abya endata oko maghetse mangyi,* n’akaghala* k’oMungu akakakola kabya kakalaba-laba oko maghetse.
3 Neryo oMungu mwabugha ati: “Habye ekyakakala.” Neryo ekyakakala mukyabya.
4 Enyuma sy’aho, oMungu mwalangira ngoko ekyakakala kyuwene, neryo mwahiraho endambi y’ekyakakala n’endambi y’omwirimya.
5 Neryo oMungu mwahula endambi y’ekyakakala mo Ritungyi. Aliwe endambi y’omwirimya, amahulayo mo Kiro. Neryo mubwabya igholo-gholo kandi mubwabya tututu. Ekiro ky’erimbere mukyahweraho.
6 Kandi oMungu mwabugha ati: “Habye kyanya omo kati-kati k’amaghetse, neryo kighabe amaghetse n’amaghetse.”
7 Neryo oMungu mwahangyika ekyanya, kandi mwaghaba amaghetse awabya endata oko kyanya n’amaghetse awabya eyikwa oko kyanya. Neryo mubyabya bitya.
8 OMungu mwahula ekyanya mo Lubula. Neryo mubwabya igholo-gholo kandi mubwabya tututu. Ekiro ky’akabiri mukyahweraho.
9 Kandi oMungu mwabugha ati: “Amaghetse awali eyikwa w’elubula ayikuma-kumire haghuma, kandi habye ekitaka ekyumire.” Neryo mubyabya bitya.
10 OMungu mwahula ekitaka ekyumire mo Kihugho, aliwe amaghetse awayikuma-kumira haghuma mwahulagho mo Syongetse. Neryo oMungu mwalangira ngoko ekyo alyakola kyuwene.
11 Kandi oMungu mwabugha ati: “Ekitaka kilasaye ebiti n’ebiti ebikasako esyombuto, kandi kilasaye emihanda mbiriri-mbiriri y’emiti eyikasako amatunda, n’embuto.” Neryo mubyabya bitya.
12 Neryo ekitaka mukyatsuka erilasya emihanda mbiriri-mbiriri y’ebiti, ebiti ebikasako esyombuto, n’emiti eyikasako amatunda n’esyombuto. Neryo oMungu mwalangira ngoko ekyo alyakola kyuwene.
13 Neryo mubwabya igho-gholo kandi mubwabya tututu. Ekiro ky’akasatu mukyahweraho.
14 Kandi oMungu mwabugha ati: “Omo lubula mubye ebindu ebikakoleraya kusudi habye endambi y’eritungyi n’ey’ekiro. Kandi bikendisyabya bikawatikya abandu eriminya ebirimo, ebiro, n’emyaka.
15 Bikendibya bikakolerya ekihugho ibine omo kyanya.” Neryo mubyabya bitya.
16 OMungu mwabumba ebindu bibiri binene-binene ebikakoleraya, ekinene kutsibu kibye kikakolerya omw’itungyi, n’ekike kibye kikakolerya omo kiro. Kandi mwahangyika n’esyongununu.
17 Neryo oMungu mwahirabyo omo kyanya bitoke eribya bikakolerya ekihugho,
18 bitoke eribya bikakolerya* omw’itungyi n’omo kiro, kandi bitoke erighaba endambi y’ekyakakala n’ey’omwirimya. Neryo oMungu mwalangira ngoko ekyo alyakola kyuwene.
19 Neryo mubwabya igholo-gholo kandi mubwabya tututu. Ekiro ky’akani mukyahweraho.
20 Kandi oMungu mwabugha ati: “Amaghetse asulemo esyonyama* kandi ebihangyikwa ebikaghuluka bighuluke omo kyanya endata oko kihugho.”
21 Neryo oMungu mwahangyika emihanda mbiriri-mbiriri y’esyonyama nene-nene sy’omo ngetse, n’emihanda mbiriri-mbiriri y’esyonyama syosi* esikaghenda, n’esiswire omo maghetse, n’emihanda mbiriri-mbiriri y’ebihangyikwa ebikaghuluka. Neryo oMungu mwalangira ngoko ekyo alyakola kyuwene.
22 Enyuma sy’aho, oMungu mwatsumula ebihangyikwa ebyo, mwabugha ati: “Mubute, mukanyirire kandi musulaye amaghetse w’engetse. Kandi ebihangyikwa ebikaghuluka bibye binene oko kihugho.”
23 Neryo mubwabya igholo-gholo kandi mubwabya tututu. Ekiro ky’akatano mukyahweraho.
24 Kandi oMungu mwabugha ati: “Ekihugho kibyemo emihanda mbiriri-mbiriri y’esyonyama,* emihanda mbiriri-mbiriri y’esyonyama sy’eritunga, y’esyonyama sy’omoli, n’ey’esyonyama esikayikura.”* Neryo mubyabya bitya.
25 Neryo oMungu mwabumba emihanda mbiriri-mbiriri y’esyonyama sy’omoli, emihanda mbiriri-mbiriri y’esyonyama sy’eritunga, n’emihanda mbiriri-mbirirri y’esyonyama esikayikura. Neryo oMungu mwalangira ngoko ekyo alyakola kyuwene.
26 Kandi oMungu mwabugha ati: “Tubumbe omundu omo kisosekanio kyetu, atusose, kandi atabale esyosamaki sy’omo ngetse, ebihangyikwa ebikaghuluka omo kyanya, esyonyama sy’eritunga, ekihugho kyosi, n’esyonyama syosi esikayikura oko kihugho.”
27 Neryo oMungu mwahangyika omundu omo kisosekanio kiwe, mwamuhangyika omo kisosekanio kiwe; mwahangyika omulume n’omukali.
28 Enyuma sy’aho, oMungu mwatsumulabo n’eribabwira ati: “Mubute, mubye banene, musulaye ekihugho, n’eritabalakyo, kandi mutabale esyosamaki sy’omo ngetse, ebihangyikwa ebikaghuluka omo kyanya, n’esyonyama syosi esikaghenda oko kihugho.”
29 Kandi oMungu mwabugha ati: “Nabiribaha ebiti byosi ebikasako embuto ebiri oko kihugho n’emiti yosi eyikasako amatunda awalimo embuto. Mubye mukalyabyo.
30 N’esyonyama syosi sy’omoli* esiri oko kihugho, ebihangyikwa byosi ebikaghuluka omo kyanya, n’esyonyama syosi esiriho esikaghenda oko kihugho, nabiribugha niti sibye sikalya ebiti.” Neryo mubyabya bitya.
31 Enyuma sy’aho, oMungu mwalangira ngoko obuli kindu ekyo ahangyika kyabya kyuwene kutsibu. Neryo mubwabya igholo-gholo kandi mubwabya tututu. Ekiro kye 6 mukyahweraho.
Amaelezo awehikwa
^ Kutse “amaghetse awaghungire.”
^ Kutse “ekirimu.”
^ Kutse “bikatabala.”
^ Kutse “esyonafsi esiriho.”
^ Kutse “n’esyonafsi syosi esiriho.”
^ Kutse “y’esyonafsi.”
^ Kutse “esyonyama esikaghenda.” Alinga omo syonyama esyo muli esyonyama esiri ng’esyonzoka, emisiribaba, n’eyindi mihanda y’esyonyama eyite omo bihanda ebyabiryahulwa.
^ Kutse “N’esyonafsi syosi sy’omoli esiriho.”
