Enzuko 11:1-32
11 Oko mughulu oyo, abandu bosi b’oko kihugho* babya bakabugha omubughe mughuma, kandi babya n’ebinywa bighumerera.
2 Babere bakaya oko luhande lw’eyikasira eryuba, mubafumbula eribanda omo kihugho kye Shinari, neryo mubikala eyo.
3 Neryo mubabwirana bati: “Tukokotaye esyombiriki, tuhisayesyo omo muliro.” Neryo mubahimba omo syombiriki omo mwanya w’erihimba omo mabwe. Mubakolesya n’egudro omo mwanya w’esima.
4 Kandi mubabwirana bati: “Tuyihimbire omuyi n’enyumba nyiri-nyiri eyikendihika elubula. Tuyiyirire erina erikumayire, tukasyapanzwa-panzwa omo kihugho kyosi.”
5 Neryo Yehova mwandaghala eriyalebya omuyi n’enyumba nyiri-nyiri eyo abaghala b’abandu bahimba.
6 Yehova mwabugha ati: “Aba si ni kihanda kighuma, kandi si bakabugha omubughe mughuma, ibwa langira ebyo bakatsuka erikola! Eryo sibenditaluka erikola ebyo bakalengekanaya.
7 Tundaghale, n’eridunga omubughe wabo, oghundi akasyowa ebyo oghundi akabugha.”
8 Yehova mwapanza-panzabo omo kihugho kyosi, neryo mubaleka erihimba omuyi.
9 Kyo kyaleka omuyi munye iniahulwa mo Babeli,* kundi eyo yo Yehova adunga omubughe w’abandu b’omo kihugho kyosi, kandi eyo yo Yehova abapanza-panzira omo kihugho kyosi.
10 Eno ni historia ya Semu.
Emyaka ibiri eribwagha ry’amaghetse ryabilaba, Semu mwabuta Arpakshadi. Amubuta iniawite emyaka 100.
11 Semu abere abibuta Arpakshadi, mwatasyabugha eyindi myaka 500. Kandi mwabuta abana b’obulume n’ab’obukali.
12 Arpakshadi abere abiyira emyaka 35, mwabuta Shela.
13 Arpakshadi abere abibuta Shela, mwatasyabugha eyindi myaka 403. Kandi mwabuta abana b’obulume n’ab’obukali.
14 Shela abere abiyira emyaka 30, mwabuta Eberi.
15 Shela abere abibuta Eberi, mwatasyabugha eyindi myaka 403. Kandi mwabuta abana b’obulume n’ab’obukali.
16 Eberi abere abiyira emyaka 34, mwabuta Pelegi.
17 Eberi abere abibuta Pelegi, mwatasyabugha eyindi myaka 430. Kandi mwabuta abana b’obulume n’ab’obukali.
18 Pelegi abere abiyira emyaka 30, mwabuta Reu.
19 Pelegi abere abibuta Reu, mwatasyabugha eyindi myaka 209. Kandi mwabuta abana b’obulume n’ab’obukali.
20 Reu abere abiyira emyaka 32, mwabuta Serugu.
21 Reu abere abibuta Serugu, mwatasyabugha eyindi myaka 207. Kandi mwabuta abana b’obulume n’ab’obukali.
22 Serugu abere abiyira emyaka 30, mwabuta Nahori.
23 Serugu abere abibuta Nahori, mwatasyabugha eyindi myaka 200. Kandi mwabuta abana b’obulume n’ab’obukali.
24 Nahori abere abiyira emyaka 29, mwabuta Tera.
25 Nahori abere abibuta Tera, mwatasyabugha eyindi myaka 119. Kandi mwabuta abana b’obulume n’ab’obukali.
26 Tera abere abiyira emyaka 70, mwabuta Abramu, Nahori, na Harani.
27 Eno ni historia ya Tera:
Tera mwabuta Abramu, Nahori, na Harani; na Harani mwabuta Loti.
28 Harani mwaholera omo kihugho ekyo abutawamo, ni bugha ambu, e Uru y’Abakaldayo. Mwahola baba wiwe iniakineho.
29 Abramu na Nahori mubatahya abakali. Muka Abramu iniakahulawa mo Sarai, na muka Nahori iniakahulawa mo Milka. Milka abya mwali wa Harani, baba wa Milka na Iska.
30 Sarai abya mughumba; syabya n’omwana.
31 Enyuma sy’aho, Tera mwimya mughala wiwe Abramu, n’omwitsikulu wiwe Loti, mughala wa Harani, amimya n’omwalyana wiwe Sarai, omukali wa Abramu, amalua e Uru y’Abakaldayo haghuma nabo. Bamaya omo kihugho kye Kanana. Mubabya babihika e Harani, bamikalayo.
32 Tera mwaholera e Harani iniawite emyaka 205.
Amaelezo awehikwa
^ Kinywa kwa kinywa, “ekihugho kyosi.”
^ Ni bugha ambu “omuvurugo; eridunga; eribulungania.”
