Enzuko 12:1-20
12 Yehova mwabwira Abramu ati: “Ulue omo kihugho kyaghu, eyiri abatunga baghu, n’eyiri ekihanda kya baba waghu, ughende omo kihugho ekyo ngendikukangania.
2 Ngendikuyira mo kihanda kinene, ngendikutsumula, kandi ngendiyira erina ryaghu mo rikulu, kandi ukendibya muyisa oko bandi.
3 Ngendisyatsumula abakakutsumula, ngendisyatakira abakakutakira, n’abandu b’ebihanda byosi bakendisyatsumulwa* erilabira iwe.”
4 Neryo Abramu mwaghenda ngoko Yehova amubwira. Loti naye mwaghenda haghuma naye. Omughulu Abramu alua e Harani abya n’emyaka 75.
5 Abramu mwimya Sarai, omukali wiwe, na Loti, omwana wa mughala wabo, amimya n’ebindu byosi ebyo babya ibabiritunda, abaghombe* abo babya nabo e Harani, neryo bamaya omo kihugho kye Kanana. Mubabya babihika e Kanana,
6 Abramu mwalaba omo kihugho, amayahika omo kiharo kye Shekemu, hakuhi n’emiti minene-minene ye More. Oko mughulu oyo, Abakanana babya ibikere omo kihugho ekyo.
7 Kandi Yehova mwahulukira Abramu n’erimubwira ati: “Ngendiha abana baghu b’ekihugho eki.” Neryo mwahimbira Yehova oyo wamuhulukira ekiherero. Mwamuhimbira ky’aho.
8 Enyuma sy’aho, mwahuma aho, amaya omo kiharo ky’ebitwa ekiri oko luhande lw’eyo ryuba rikasira lwe Beteli, mwahimbayo ehema yiwe. E Beteli yabya oko luhande lw’eyo ryuba rikalengera, ne Ai oko luhande lw’eyo ryuba rikasira. Eyo nayo mwahimbira Yehova y’ekiherero, kandi mwatsuka eripipa* erina rya Yehova.
9 Enyuma sy’aho, Abramu mwahimbula ekambi yiwe, amaya e Negebu. Iniakahuma-huma.
10 Neryo enzala muyabya oko kihugho. Abramu mwandaghalira e Misri, amayikalayo omo mughulu muke, kundi enzala yabya yikalire.
11 Akasonda erihika e Misri, mwabwira Sarai omukali wiwe ati: “Unihulikirire kisi! Ninasi ngoko uli mubuya kutsibu.
12 Omughulu Abamisri bakendikulangira, bakendibugha bati, ‘Oyu yo mukali wiwe.’ Neryo bakendiniita, iwe ibakuleka.
13 Kisi-kisi, ukendibabwira uti uli mwali wetu, bakasyanikolera muhanda busana naghu, kandi bakasyaniita.”*
14 Abramu abere anabingira e Misri, Abamisri mubalangira ngoko omukali wiwe ni mubuya kutsibu.
15 Abakulu b’omwami Farao mubamulangira, mubatsuka erimupipa embere sya Farao, mubaleta Sarai omo nyumba ya Farao.
16 Mwakolera Abramu y’ebyuwene busana na Sarai, mwamuha esyombuli, esyonde, esyopunda syobukali n’esyobulume, abaghombe b’obukali n’ab’obulume, n’esyongamia.
17 Neryo Yehova mwaletera Farao n’abosi ababya bikere omo nyumba yiwe obuhanya obukalire busana na Sarai, omukali wa Abramu.
18 Neryo Farao mwabirikira Abramu n’erimubwira ati: “Langira ekyo wamanikolera! Busanaki mutitabugha uti ni mukali waghu?
19 Busanaki ulyabugha uti ni mwali wenyu? Nilwe ingasonda erimuyira mo mukali waghe. Omukali waghu y’oyu, muheke, mughende!”
20 Farao mwabwira abaghombe biwe ati bamusubulaye, iye na mukali wiwe, n’ebyosi ebyo abya awiteko.
Amaelezo awehikwa
^ Kutse “bakendisyayibanira emiyisa.”
^ Kutse “esyonafsi.”
^ Kinywa kwa kinywa, “eribirikira.”
^ Kutse “bakasyiita enafsi yaghe.”
