Enzuko 13:1-18
13 Abramu mwalua e Misri, amaya e Negebu. Mwaghenda n’omukali wiwe n’ebindu biwe byosi, mwaghenda na Loti.
2 Abramu abya muteke, iniawite esyonyama nene, efeza* nene, n’ehoro nene.
3 Omughulu alua e Negebu akaya e Beteli, abya akapanga omo biharo mbiriri-mbiriri, erihika omughulu ahika ahabya iniabirihira ehema yiwe, ni bugha ambu, omo kiharo ekiri omo kati-kati ke Beteli ne Ai.
4 Eyo yo abya iniabirihimba ekiherero. Abramu iniane eyo, mwapipa* erina rya Yehova.
5 Loti oyo wabya akaghenda na Abramu, naye abya n’esyombuli, esyonde, n’amahema.
6 Ekiharo ekyo babya bikeremo kyabya kike, neryo abosi mubatasyatoka erikala haghuma. Babya ibabiriyira oko bindu bingyi, neryo isibangasyatoka erikala haghuma.
7 Neryo abalisya ba Abramu n’abalisya ba Loti mubalwa. (Oko mughulu oyo, Abakanana, Abaperezi babya bikere omo kihugho ekyo.)
8 Neryo Abramu mwabwira Loti ati: “Kisi, siritolere hakabya amalwa omo kati-kati kaghe naghu, n’omo kati-kati k’abalisya baghe n’abalisya baghu, kundi tuli baghuma.*
9 Wanganasombola aho wanzire erikala omo kihugho kino. Kisi, tughabane. Wamabiya oko luhande lw’amalembe, ingendiya oko luhande lw’amali. Aliwe wamabiya oko luhande lw’amali, ingendiya oko luhande lw’amalembe.”
10 Neryo Loti abere abisumba ameso wiwe, mwalangira ngoko ekiharo kyosi kye Yordani kyuswiremo amaghetse, (kyabya kitya embere Yehova atoghotaye e Sodomo ne Gomora), kyabya ng’eririma rya Yehova, ng’ekihugho kye Misri, erihika e Zoari.
11 Neryo Loti mwayisombolera ekiharo kyosi kye Yordani. Kandi mwahumisirya ekambi yiwe oko luhande lw’eyo ryuba rikasira. Ko baghabana batya.
12 Abramu mwikala omo kihugho kye Kanana, aliwe Loti mwikala omo miyi y’ekiharo kye Yordani. Oko mwiso, mwahimba ehema yiwe hakuhi ne Sodomo.
13 Nikwa abandu be Sodomo babya babi, ibakakosera Yehova yo kutsibu.
14 Loti abere abilua ahali Abramu, Yehova mwabwira Abramu ati: “Kisi, usumbe ameso waghu, ulebaye ekiharo ekyo ulimo. Ulebaye oko luhande lw’endata, olw’eyikwa, olw’eyo ryuba rikasira, n’olw’eyo ryuba rikalengera,
15 kusangwa ekihugho kyosi ekyo wamalangira, ngendisyahakyo abana baghu. Kikendisyabya kyabo kera na kera.
16 Kandi ngendisyayira abana baghu mo banene ng’olututu oluli oko kihugho. Omundu amabya inianganatoka erighanza olututu oluli oko kihugho, aho inianganatoka erighanza abana baghu.
17 Hangana, ulabe omo kihugho ekyo, ulebaye obuli bwakyo n’obughali bwakyo, kundi ngendikuhakyo.”
18 Neryo Abramu mwaendelea erikala omo mahema. Enyuma sy’aho, mwayikala omo miti minene-minene ye Mamre, eyiri e Hebroni, n’eyo mwahimbira Yehova ekiherero.
Amaelezo awehikwa
^ Ni kindu ky’obughuli ekikalua omo kitaka.
^ Kinywa kwa kinywa, “mwabirikira.”
^ Kutse “uli mughala wetu.”
