Enzuko 14:1-24
14 Oko mughulu oyo, Amrafeli, omwami we Shinari, Arioko, omwami we Elasari, Kedorlaomeri, omwami we Elamu, na Tidali, omwami we Goimu,
2 mubalwa na Bera, omwami we Sodomo, Birsha, omwami we Gomora, Shinabu, omwami we Adma, Shemeberi, omwami we Zeboimu, n’omwami we Bela, ni bugha ambu, Zoari.
3 Abosi abo mubahindania abasuda babo omo musya we Sidimu, ni bugha ambu, Engetse y’Omunyu.*
4 Mubakolera Kedorlaomeri omo myaka 12, aliwe omo mwaka we 13, mubaghana erimukolera.
5 Neryo oko mwaka we 14, Kedorlaomeri n’abami ababya haghuma naye mubasa n’erisinga Abarefaimu e Ashteroti-karnaimu, Abazuzimu e Hamu, Abaemimu e Shave-kiriataimu,
6 n’Abahori omo kitwa kyabo kye Seiri erihika e El-parani, ekiri omo mbwarara.
7 Enyuma sy’aho, mubasubula bamaya e En-mishpati, ni bugha ambu, Kadeshi, kandi bamahamba ekiharo kyosi ky’Abaamaleki. Mubasinga n’Abaamori ababya e Hazazoni-tamari.
8 Neryo omwami we Sodomo, omwami we Gomora, omwami we Adma, omwami we Zeboimu, n’omwami we Bela, ni bugha ambu Zoari, mubatsukalo n’eriyipanga busana n’amalwa omo musya we Sidimu,
9 batoke erilwa na Kedorlaomeri omwami we Elamu, Tidali omwami we Goimu, Amrafeli omwami we Shinari, na Arioki, omwami we Elasari—abami bani mubalwa n’abami batano.
10 Nikwa omusya we Sidimu abya iniaswiremo ebyuna ebirimo egudro. Neryo omwami we Sodomo n’omwami we Gomora mubasonda eritibita, aliwe mubayatoghera mubyo n’abasaka mubatibitira oko kitwa.
11 Neryo abasinga mubimya ebindu byosi omo muyi we Sodomo ne Gomora, mubimya n’akalyo kabo kosi, neryo bamayighendera.
12 Mubaheka na Loti, omwana w’omughala wabo Abramu oyo wabya ikere e Sodomo, mubaheka n’ebindu biwe n’eriyighendera.
13 Enyuma sy’aho, omulume mughuma oyo wabala mwasyabwira Abramu Omuebrania. Oko mughulu oyo, Abramu abya ikere* omo miti minene-minene ya Mamre Omuamori, mughala wabo Eshkoli na Aneri. Abo babya ibabirikola endaghane na Abramu, y’eribya bakawatikania.
14 Abramu kowa atya ngoko babiriheka omutunga wiwe, neryo mwahindania abalume biwe ababya basi erilwa, abaghombe 318 ababutawa omo nyumba yiwe, n’erikwamirirabo erihika e Dani.
15 Omo kiro, mwaghaba abalume biwe mo bikuto-bikuto, neryo iye n’abaghombe biwe bamalwa n’abami abo, n’eribasinga. Mwabakwamirira eriyahika e Hoba, ekiharo ekiri oko luhande lw’endata lwe Damasko.
16 Abramu mwasubulya ebindu byosi, mwasubulya n’omutunga wiwe, ye Loti, ebindu biwe, abakali, n’abandi bandu.
17 Abramu abere abisubula iniamabisinga omwami Kedorlaomeri n’abami ababya haghuma naye, omwami we Sodomo mwayahindana na Abramu omo musya we Shave, ni bugha ambu, omusya w’omwami.
18 Na Melkisedeki, omwami we Yerusalema, mwaleta omukati n’edivai; abya muhereri w’oMungu ow’endata kutsibu.
19 Neryo mwamutsumula n’eribugha ati:
“OMungu Ow’endata Kutsibu,Oyo wahangyika olubula n’ekihugho,Atsumule Abramu;
20 OMungu Ow’endata Kutsibu,Oyulyakuwatikaya erisinga esyonzighu syaghu, apipawe!”
Neryo Abramu mwamuha ekighuma ky’omw’ikumi ky’ebindu byosi.
21 Enyuma sy’aho, omwami we Sodomo mwabwira Abramu ati: “Wimaye ebindu, aliwe unisighire abandu.”*
22 Aliwe Abramu mwabwira omwami we Sodomo ati: “Namasumba ebyala byaghe n’erilapa embere sya Yehova oMungu Ow’endata Kutsibu oyo wahangyika olubula n’ekihugho,
23 niti sinendimya ekindu kyaghu n’ekighuma, sinendimya n’akauzi kutse akakamba k’ekiryato ukasyabugha uti, ‘Ingye niryaleka Abramu iniabya muteke.’
24 Ebyo ngendimya by’en’ebyo abalwana baghe balyalya bisa, nikwa abalume abalyaghenda naghe, ye Aneri, Eshkoli, na Mamre, uleke bimaye erighabo* ryabo.
Amaelezo awehikwa
^ Ni bugha ambu, Engetse Eyiholire.
^ Kutse “abya ikere omo mahema.”
^ Kutse “esyonafsi.”
^ Kutse “esehemu.”
