Enzuko 15:1-21
15 Enyuma sy’aho, Yehova mwabwira Abramu omo nzoli ati: “Abramu, sighusaghe. Ngendikuteya.* Ukendisyahabwa ekihembo kinene.”
2 Abramu mwasubirya ati: “Yehova, Omukama Mukulu Oko Bosi, ukendisyambaki? Yono sindinayira oko mwana. Oyukendisyasighala n’ebindu byaghe ni Eliezeri, omulume we Damasko.”
3 Kandi Abramu mwabugha ati: “Sighuliwamba omwana, n’omughombe waghe* yukendisyasighalya ebindu byaghe.”
4 Aliwe Yehova mwamusubirya ati: “Omulume oyo yutendisyasighalya ebindu byaghu. Aliwe omwana oyo ukendisyabuta yukendisyasighalya ebindu byaghu.”
5 Neryo oMungu mwabwira Abramu ati aye ehihya, amamubwira ati: “Terilebya endata. Teripima erighanza esyongununu nga wanganatoka.” Neryo mwamubwira ati: “Abana baghu ko bakendisyabya bangaho.”
6 Neryo Abramu mwikirirya Yehova, naye mwaghanza* Abramu mo mutunganene.
7 Kandi oMungu mwabugha ati: “Niri Yehova, oyo wakulusaya e Uru y’Abakaldayo. Munakulusyayo busana n’erikuha ekihugho kino mo kyaghu.”
8 Abramu mwasubirya ati: “Yehova, Omukama Mukulu Oko Bosi, ngendisyaminya niti ngoko kikendisyabya kyaghe?”
9 OMungu mwamusubirya ati: “Wimaye ekyana ky’obukali eky’ende ky’emyaka isatu, embene y’obukali y’emyaka isatu, embangale y’emyaka isatu, akalikuku, n’akalikuku kake.”
10 Neryo mwimya esyonyama syosi esyo n’eritwasyo mo bihande bibiri-bibiri. Mwatondeka obuli kihande kitoke erilingirirana n’ekindi, aliwe mwatatwa esyonyunyu mo bihande-bihande.
11 Neryo ebinyunyu binene-binene mubyatsuka erikira oko syonyama esyo batwa mo bihande-bihande, aliwe Abramu mwabya akatibita kubyo.
12 Eryuba rikasonda erilenga, Abramu mwakwa ehighotseri hinene. Mwalangira omwirimya munene owakasaghisaya.
13 Neryo oMungu mwabwira Abramu ati: “Uminye ngoko abana baghu bakendisyikala omo kihugho ekite kyabo. N’abandu b’omo kihugho ekyo bakendisyabayira mo bakobe n’eryaghalyabo omo miaka 400.
14 Aliwe, ngendisyatswera ekihugho ekikendisyabayira mo bakobe, neryo bakendisyalwayo n’ebindu bingyi.
15 Aliwe iwe, ukendisyahola buholo n’eritabwa wabibugha emyaka mingyi.
16 Nikwa ekizazi* ky’akani ky’abana baghu kikendisyasuba hano, kundi omughulu ogho Abaamori batolere erihabwa amalipizi syalyahika.”*
17 Eryuba ry’abere ryabilenga n’omwirimya abikanyirira, eriko erikaluamo omuki muryalangirika, n’akati akaliko ekirimi* mukalaba omo kati-kati k’ebihande by’esyonyama.
18 Ekiro ekyo, Yehova mwakola endaghane na Abramu. Mwamubwira ati: “Ngendisyaha abana baghu b’ekihugho kino eritsuka oko lusi lwe Misri, eriyahika oko lusi lunene, ni bugha ambu, olusi lwe Efrati:
19 ekihugho ky’Abakeni, ky’Abakenizi, ky’Abakadmoni,
20 ky’Abahiti, ky’Abaperizi, ky’Abarefaimu,
21 ky’Abaamori, ky’Abakanana, ky’Abagirgashi, n’eky’Abayebusi.”
Amaelezo awehikwa
^ Kinywa kwa kinywa, “Ngendibya ngabo yaghu.”
^ Kinywa kwa kinywa, “n’omughala w’omo nyumba yaghe.”
^ Kutse “mwalangira.”
^ Kutse “olulengo.”
^ Kutse “kundi ekosa y’Abaamori siyiriyahika oko lulengo olughonere.”
^ Kutse “n’ekisosomole.”
