Enzuko 16:1-16
-
Hagari na Ismaeli (1-16)
16 Sarai, muka Abramu, abya isyalyatayira oko mwana, aliwe Sarai abya n’omughombe Mumisri oyukahulawa mo Hagari.
2 Neryo Sarai mwabwira Abramu ati: “Unihulikirire kisi! Yehova syalyanilighira eriyira oko bana. Kisi, ghotsera n’omughombe waghe. Kwa muhwa akendileka naghe inabya n’omwana.” Neryo Abramu mwahulikirira Sarai.
3 Abramu abere abibugha emyaka 10 omo kihugho kye Kanana, Sarai, mukali wiwe, mwamuha Hagari, omughombe wiwe, Omumisri, abye mukali wiwe.
4 Neryo Abramu mwaghotsera na Hagari, na Hagari amabya mukule. Omughulu Hagari aminya ngoko abiribya mukule, mwatsuka erighonera Sarai, omubose wiwe.
5 Neryo Sarai mwabwira Abramu ati: “Niwe wamaleka inianikolera muhanda. N’ingye nakuha omughombe oyo, aliwe abiritsuka erinighonera abiminya ngoko ni mukule. Yehova atutswere, ingye naghu.”
6 Neryo Abramu mwabwira Sarai ati: “Indi mbino ni mughombe waghu! Umukolere ngoko wanzire.” Neryo Sarai mwaghalya omughombe wiwe, n’omughombe oyo amatibita.
7 Enyuma sy’aho, omumalaika wa Yehova mweya Hagari omo mbwarara hakuhi n’engununuko y’amaghetse, engununuko eyiri omo nzira eyikalola e Shuri.
8 Omumalaika mwamubwira ati: “Hagari, mughombe wa Sarai, ukaluahi, kandi ukayahi?” Hagari mwamusubirya ati: “Ngatibita, ngasagha Sarai, omubose waghe.”
9 Neryo omumalaika wa Yehova mwamubwira ati: “Suba eyiri omubose waghu, uyayikehaye embere siwe.”
10 Kandi omumalaika wa Yehova mwamubwira ati: “Ngendisyayira abana baghu mo banene. Bakendisyabya butaghanzika.”
11 Kandi omumalaika wa Yehova mwabugha ati: “Uli mukule. Ukendibuta omwana w’obulume. Neryo ukendimwahula mo Ismaeli, kundi Yehova abiryowa ekiriro kyaghu.
12 Akendisyabya ng’epunda y’omoli.* Akendisyabya akalwa n’obuli mundu, n’obuli mundu akendisyabya akalwa naye. Kandi akendisyikala hakuhi n’abaghala babo bosi.”*
13 Neryo Hagari mwapipa* erina rya Yehova, oyo wakanaya naye. Mwabugha ati: “Uli Mungu oyukalangira.” Kandi mwabugha ati: “Kwenene-kwenene nabirilangira oyukanilangira?”
14 Kyo kyaleka eribulu eryo iryahulwa mo Beeri-lahai-roi.* (Riri omo kati-kati ke Kadeshi ne Beredi.)
15 Neryo Hagari mwabutira Abramu yo mwana w’obulume, na Abramu mwaha omwana oyo erina rya Ismaeli.
16 Abramu abya n’emyaka 86 omughulu Hagari amubutira Ismaeli.
Amaelezo awehikwa
^ Kutse “onagre,”ni muhanda w’epunda y’omoli. Abandi bakalengekanaya bati ni zebre. Alinga ekyo kikamaanisaya omutima w’eryanza eriyitabala.
^ Kutse alinga, “syendisyahulikirirana n’abaghala babo bosi.”
^ Kinywa kwa kinywa, “mwabirikira.”
^ Ni bugha ambu “eribulu ry’oyuliho oyukanilangira.”
