Enzuko 17:1-27
17 Omughulu Abramu abya n’emyaka 99, Yehova mwamuhulukira n’erimubwira ati: “Niri Mungu, Omutoki w’Ebyosi. Ubye ukaniowa* n’eribya mutaleghula.*
2 Ngendisyakola endaghane haghuma naghu, kandi ngendisyakuha abana banene, abanene kutsibu.”
3 Neryo Abramu mwakukama n’erihira obusu bwiwe oko kitaka, n’oMungu mwalola embere erikania naye ati:
4 “Nabirikola endaghane naghu, kandi ukendibya tata w’ebihanda bingyi.
5 Siwendisyahulwa mo Abramu,* aliwe ukendibya ukahulwa mo Abrahamu,* kundi ngendikuyira mo baba w’ebihanda bingyi.
6 Ngendisyayira abana baghu mo banene, mo banene kutsibu. Ngendisyakuyira mo bihanda, kandi ukendisyabuta abami.
7 “Ngendisyasikya endaghane eyo nabirikola naghu kandi eyilebirye ebizazi* byosi by’abana baghu. Ni ndagahane ya kera na kera y’ingye eribya oMungu waghu, n’oMungu w’abana baghu.
8 Ngendisyakuha iwe n’abana baghu ekihugho ekyo wikalamo ng’omugheni, ni bugha ambu, ekihugho kyosi kye Kanana. Kikendisyabya kyenyu kera na kera, kandi ngendisyabya Mungu wabo.”
9 Kandi oMungu mwabwira Abrahamu ati: “Iwe n’abana baghu n’ebizazi* byabo byosi, ritolere imwasikya endaghane yaghe.
10 Endaghane eyo ngakola naghu n’abana baghu, eyo ritolere imwasikya, y’eno: Obuli mulume omo kati-kati kenyu, ritolere iniabanibwa.
11 Ritolere imwabya mukatwa engobi eyiswikire obusoni bwenyu, n’ekyo kyo kikendisyabya kikakangania ngoko nabirikola endaghane haghuma nenyu.
12 Omo bizazi* byenyu byosi, obuli mwana w’obulume ow’ebiro munani ritolere iniabanibwa, angabya oyulyabutirawa omo nyumba yaghu, kutse oyute mughala waghu, oyo ulyaghula oko mundu w’omo kindi kihugho.
13 Obuli mwana w’obulume oyukabutirawa omo nyumba yaghu, n’obuli mwana w’obulume oyo ukaghula, ritolere iniabanibwa. N’endaghane yaghe y’eribania abana b’obulume* ikendisyabya ya kera na kera.
14 Hamabya omulume oyukaghana eribanibwa, ritolere initibwa. Syetasikya endaghane yaghe.”
15 Kandi oMungu mwabwira Abrahamu ati: “Sarai,* omukali waghu, syendisyahulwamo Sarai, kundi eritsuka lino akendihulwa mo Sara.*
16 Ngendimutsumula, kandi ngendikuha omwana, kandi akendikubutira omwana w’obulume. Ngendimutsumula, kandi akendisyabya bihanda, akendisyabuta abami.”
17 Neryo Abrahamu mwakukama n’erihira obusu bwiwe oko kitaka, amatsuka eriseka n’eribugha omo mutima ati: “Omulume w’emyaka 100, anganabuta omwana, na Sara, omukali w’emyaka 90, anganabuta?”
18 Neryo Abrahamu mwabwira oMungu w’ekwenene ati: “Utsumule Ismaeli.”
19 Neryo oMungu mwamubwira ati: “Sara, omukali waghu, akendibuta omwana w’obulume. Ukendisyamwahula mo Isaka.* Ngendisyakola endaghane haghuma naye. Ikendisyabya ndaghane ya kera na kera n’abana biwe.
20 Aliwe nabiryowa ebyo ulyasabira Ismaeli. Ngendisyamutsumula, kandi ngendisyamuha abana banene. Akendisyabuta abana banene, banene kutsibu. Akendisyabuta abakulu 12, kandi ngendisyamuyira mo kihanda kinene.
21 Aliwe, ngendisyakola endaghane yaghe na Isaka, oyo Sara akendikubutira oko mwaka owakasa, oko ndambi eyiri ng’eno.”
22 OMungu abere ebibugha erikania na Abrahamu, amalua ahali Abrahamu.
23 Neryo ekiro ekyo kisa-kisa, Abrahamu mwimya Ismaeli, mughala wiwe, abalume bosi ababutawa omo nyumba yiwe, n’obuli mulume oyo aghula, ni bugha ambu, obuli mulume omo nyumba ya Abrahamu, amatwa engobi eyiswikire obusoni bwabo, ngoko oMungu anamubwira.
24 Abrahamu mwabanibwa iniawite emyaka 99.
25 Na Ismaeli, mughala wiwe, mwabanibwa n’emyaka 13.
26 Ekiro ekyo kisa-kisa, Abrahamu na mughala wiwe mubabanibwa.
27 Abalume bosi b’omo nyumba yiwe, omulume wosi-wosi oyo wabutawa omo nyumba yiwe, n’omulume wosi-wosi oyo Abrahamu aghula oko mundu w’omo kindi kihugho, n’abo mubabanibwa haghuma naye.
Amaelezo awehikwa
^ Kinywa kwa kinywa, “Lendera embere syaghe.”
^ Kutse “n’eriyighendya butsira ekosa; kandi subyeko hinywa-hinywa; kandi subyeko bulema.”
^ Ni bugha ambu “baba ali omo mwanya w’endata (abirihamibwa).”
^ Ni bugha ambu “baba w’ekikumula; baba w’abandu bangyi.”
^ Kutse “esyondengo.”
^ Kutse “n’esyondengo.”
^ Kutse “syondengo.”
^ Kinywa kwa kinywa, “eyiri omo mibiri yenyu.”
^ Alinga ni bugha ambu “oyo wanzire obuhaka.”
^ Ni bugha ambu “omughole.”
^ Ni bugha ambu “amaseka.”
