Enzuko 18:1-33
18 Enyuma sy’aho, Yehova mwahulukira Abrahamu hakuhi n’emiti minene-minene ye Mamre. Abrahamu abya inianikere oko lukyo lw’ehema, eryuba iryabirikola kutsibu.
2 Abrahamu mwasumba ameso, amalangira abalume basatu, ibanimene oko bika bilebe. Mwabya abilangirabo, mwalua oko lukyo lw’ehema inianemutibita atoke eriyahindana nabo. Abere ahika aho bali, mwakukama n’erihira obusu bwiwe b’oko kitaka.
3 Neryo mwabugha ati: “Yehova, wamabya iwabirinisima, kisi isiwalaba isiwetahika oho w’omughombe waghu.
4 Muleke babaletere amaghetse batoke eribanabya oko bisando, neryo muluhukire omo ndina y’omuti.
5 Kundi hano ho mulyasa, oho w’omughombe wenyu, muleke tubaletere ekihande ky’omukati, mutoke eritasyabana akaghala,* neryo imo mwatasyaghenda.” Abere abibabwira atya, mubamusubirya bati: “Sawa. Kola ngoko wamabibugha.”
6 Neryo Abrahamu mwatibita omo hema ahali Sara, amamubwira ati: “Yira luba! Wimaye ebipimo* bisatu by’efarine eyuwene, uponde-pondeyo n’erihuka emikati.”
7 Enyuma sy’aho, Abrahamu mwatibita eyiri ekihangulo, amasombola enume y’ende eyikine nyilere kandi eyoloberere. Mwahayo omughombe wiwe, neryo omughombe oyo amahukayo luba-luba.
8 Neryo Abrahamu mwimya amateka, amaziwa, n’enume y’ende eyikine nyilere eyo balyahuka, amasesabyo embere syabo. Neryo mwimana hakuhi nabo, omo ndina y’omuti ibanemulya.
9 Mubamubulya bati: “Omukali waghu, ye Sara, ali hayi?” Mwabasubirya ati: “Ane omo hema mwaha.”
10 Omughuma wa kubo mwatasyabugha ati: “Oko mwaka owakasa, oko ndambi eyiri ng’eno, ngendisyasyakubana, n’omukali waghu, ye Sara, akendisyayira oko mwana w’obulume.” Sara abya inianemuhulikirira oko lukyo lw’ehema olwabya enyuma sy’omulume oyo.
11 Abrahamu na Sara babya ibabirikekeluha. Sara abya iniabirilaba omo myaka y’eributa.*
12 Neryo Sara mwayisekako, amabugha ati: “Kwe rero, kanabirikekeluha, n’omukama waghe naye k’abirikekeluha! Kwenene-kwenene, ninemwendibana obutseme bw’eribya n’omwana?”
13 Neryo Yehova mwabwira Abrahamu ati: “Busanaki Sara mwakaseka n’eribugha ati, ‘Kwenene-kwenene ninemwendibuta omwana inabirikekeluha?’
14 Hane omwatsi ogho Yehova angatalukako kwe? Oko mwaka owakasa, oko ndambi eyiri ng’eno, ngendisyasyakubana, na Sara akendisyayira oko mwana w’obulume.”
15 Aliwe Sara mwaghana, mwabugha ati, “Ko sinditaseka!” kundi mwasagha. Neryo omumalaika mwamubwira ati: “Haa! Simukaseka.”
16 Abalume abo babere babihangana bakasonda erighenda, mubaghusa ameso we Sodomo, na Abrahamu abya inianemubakwamanisya.
17 Yehova mwabugha ati: “Nanganabisa Abrahamu ekyo ngendikola?
18 Oko kwenene, Abrahamu akendisyabya kihanda kinene kandi eky’amaka, n’ebihanda byosi ebiri oko kihugho bikendisyatsumulwa* erilabira iye.
19 Kusangwa nabirimusombola* atoke eribwira abana biwe n’abitsukulu biwe erikwama enzira ya Yehova omw’ikola ebitunganene n’ebyuwene kusudi Yehova aberereraye ekyo abirilagha Abrahamu.”
20 Neryo Yehova mwabugha ati: “Amalolo we Sodomo ne Gomora ni manene kutsibu. Nabiryowa abandu banene bakayilungumula kutsibu busana ne Sodomo ne Gomora.
21 Ngendindaghalirayo nitoke eriyalebya nga banemukola obubi bungaha n’obo nabiribya ngowa abandu bakayilungumulako. Yamabya isi kwenene, ingendiminya.”
22 Neryo abalume abo mubaghenda, bamalolera e Sodomo. Aliwe Yehova mwasighala na Abrahamu.
23 Neryo Abrahamu mwaseghera hakuhi, n’eribugha ati: “Eryo tu ukendiita omutunganene haghuma n’omubi?
24 Tubughe tuti omo muyi imwasungika abandu 50 abatunganene. Ighukendiita abandu b’omo muyi oyo? Isiwendighanyirabo busana n’abandu 50 abatunganene abali mugho?
25 Siwangakola ekiri ng’ekyo. Siwangita omutunganene n’omubi, neryo omutunganene iniahabwa amalipizi ng’omubi! Iyehe, siwangakola ekyo. Omutsweri w’ekihugho kyosi anganakola ekitatunganene?”
26 Neryo Yehova mwabugha ati: “Namabisunga e Sodomo abandu 50 abatunganene, ingendighanyira abandu b’omo muyi oyo, busana n’abandu 50 abo.”
27 Aliwe Abrahamu mwatasyabugha ati: “Basi Yehova, unighanyire. Niri lututu kandi niri ribu, aliwe nabiriyitswa erikania naghu.
28 Tubughe tuti oko bandu 50 abo abatunganene ikwabula abatano. Abatano abo banganaleka iwatsandya omuyi wosi?” OMungu mwamusubirya ati: “Namabisungamo abandu 45, isinenditsandyagho.”
29 Aliwe kandi Abrahamu mwamubwira ati: “Tubughe tuti imwasungika abandu 40.” OMungu mwamubwira ati: “Isinenditsandyagho busana n’abandu 40 abo.”
30 Aliwe Abrahamu mwatasyabugha ati: “Kisi, Yehova, isiwahitana. Leka nitasyabugha: Tubughe tuti imwasungika abandu 30.” OMungu mwabugha ati: “Namabisungamo abandu 30, isinenditsandyagho.”
31 Aliwe Abrahamu mwatasyabugha ati: “Unighanyire Yehova. Nabiriyitswa erikania naghu. Tubughe tuti imwasungika abandu 20 basa.” OMungu mwabugha ati: “Isinenditsandyagho busana n’abandu 20 abo.”
32 Oko mwiso, Abrahamu mwabugha ati: “Kisi, Yehova, isiwahitana. Rero ngabugha engendo y’omwiso: Tubughe tuti imwasungika abandu 10 basa.” OMungu mwabugha ati: “Isinenditsandyagho busana n’abandu 10 abo.”
33 Yehova mwabya abibugha eribugha na Abrahamu, amayighendera. Na Abrahamu amasuba ewiwe.
Amaelezo awehikwa
^ Kinywa kwa kinywa, “eriha omutima wenyu w’akaghala.”
^ Kinywa kwa kinywa, “ebipimo by’esea.” Esea nguma ni syolitre 7,33. Ulebaye Endomeko B14.
^ Kinywa kwa kinywa, “enzira y’abakali yabya iyabirimana oko Sara.”
^ Kutse “bikendisyayibanira emiyisa.”
^ Kinywa kwa kinywa, “nabirimuminya.”
