Enzuko 19:1-38
19 Abamalaika babiri mubahika e Sodomo omw’igholo-gholo. Loti abya inianikere oko mulango w’omuyi we Sodomo. Mwabya abibalangira, mwahangana, amaya eyo bali. Mwabya abihika aho bali, mwakukama n’erihira obusu bwiwe oko kitaka.
2 Neryo mwababwira ati: “Kisi, bakama baghe, mwase oho w’omugombe wenyu, mughotsereho. Kandi babanabaye oko bisando, neryo omungya mwanganabuka omo tututu n’erighenda eyo mukaya.” Mubamusubirya bati: “Iyehe, tukendighotsera ahakabya abandu banene.”
3 Aliwe mwahatikanabo erihika oko kika bamaligha eriya ewiwe. Neryo mwabakolera efete. Mwabahukira emikati eyitemo levire,* nabo mubalya.
4 Embere bayaghotsere, abalume b’omo muyi we Sodomo, eritsuka oko mulwana erihika oko musyakulu, mubasa banene n’eritimba oko nyumba yiwe.
5 Mubabya bakabwira Loti omo mulenge muli bati: “Abalume abalyingira omwaghu omw’igholo-gholo bali hayi? Uhulukayebo tukaghotsera nabo.”
6 Loti mwahuluka, amakinga omulango, n’eriya eyo bali.
7 Mwababwira ati: “Kisi, baghala betu, isimwakola ekibi kingaho.
8 Kisi, ninawite oko bali baghe babiri abatebataghotsera n’omulume. Kisi, muleke ngabaleterabo, mukolerebo ngoko mwanzire. Aliwe, isimwakolera abalume aba omwatsi wosi-wosi, kundi balyasa ewaghe, neryo ritolere inabateya.”
9 Aliwe mubabugha bati: “Ulwaho!” Kandi mubabugha bati: “Langira, omugheni oyu oyulyasikala hano yukasonda eritubwira eky’erikola! Ibwa tukendikwaghalya kutsibu kubalenga.” Neryo mubakuna-kunanga Loti n’erilolera eyiri mulango bakasonda erikakulagho.
10 Neryo abalume ababya omo nyumba mubahulukya ebyala byabo, bamahamba Loti, n’erimwingirya omo nyumba, neryo bamakinga omulango.
11 Aliwe mubayira abalume ababya oko mulango w’enyumba mo syondime-time, eritsuka oko mulere erihika oko mukulu. Neryo abalume abo mubaluha bakasondya-sondya ahali omulango.
12 Neryo abalume babiri abo mubabwira Loti bati: “Hano hakine abandi batunga baghu? Abakwe baghu, abaghala baghu, abali baghu, ni bugha ambu, abosi b’omo kihanda kyaghu, ulusayebo omo muyi ono!
13 Kundi tukenditsandya omuyi ono, kusangwa omulenge w’abakayilungumula busana n’abandu b’omo muyi ono abirikanyirira, na Yehova abiryowa. Kyo kiryaleka Yehova iniatutuma erisyatsandya omuyi ono.”
14 Neryo Loti mwahuluka, amayabwira abakwe biwe, abenditahya abali biwe, ati: “Muhangane, mulue hano, kundi Yehova akenditsandya omuyi ono.” Aliwe mubalangira ng’akabaletako lutseghe-tseghe.
15 Bwabere bukasonda erikya, abamalaika mubabwira Loti bati ayire-yire. Mubamubwira bati: “Hangana, wimaye omukali waghu n’abali baghu babiri, mukasyatsandibwa omughulu oMungu akenditsandya omuyi ono busana n’obubi bwagho!”
16 Aliwe busana n’eriyitimba-timbako, kandi kundi Yehova mwamukwira obulighe, abalume babiri abo mubamuhamba oko byala, iye n’omukali wiwe, n’abali biwe babiri, bamabatwala ehihya w’omuyi.
17 Mubabya babibatwala ehihya w’omuyi, omughuma wa kubo mwababwira ati: “Mutibite mukasyatsandibwa! Isimwakebera enyuma, kandi isimwimana ahosi-hosi omo kiharo kino. Mutibitire oko bitwa, mukasyahola!”
18 Aliwe Loti mwababwira ati: “Kisi, Yehova, butsira eyo!
19 Wabiritsemera omughombe waghu, kandi wabirinikangania olukogho lunene omw’iteya engebe* yaghe. Aliwe sinenditibitira eyiri ebitwa, kundi ngasagha niti obuhanya bwangananihikira, neryo inaholerayo.
20 Omuyi ane hakuhi na hano, eyo nangatibitira. Kisi, leka ngayeyo, ni muyi muke. Eyo yo ngendighenda nitoke eribala.”*
21 Mwamusubirya ati: “Kyuwene, namakwowa, neryo sinenditsandya omuyi ogho wamahula.
22 Uyayo luba, kundi sinendikola ekyosi-kyosi utewahikayo.” Kyo kyaleka omuyi oyo iniahulwamo Zoari.*
23 Omughulu Loti ahika e Zoari, omwisi abya iniabirikola.
24 Neryo Yehova mwaleta esufre* n’omuliro, byamatoghongera oko Sodomo ne Gomora ng’embula. Byalua elubula oko Yehova.
25 Neryo mwatsandya emiyi eyo, ekiharo kyosi ekyo, n’abakalani bosi b’omo muyi oyo, n’ebiti.
26 Omukali wa Loti abya inianemumukwama, aliwe mwakebera enyuma, neryo amabya nduyi y’omunyu.
27 Abrahamu mwabuka omo tututu, amaya aho imana omughulu akanaya na Yehova.
28 Omughulu aghusa ameso eyiri e Sodomo ne Gomora n’ekiharo kyosi ekyo, mwalangira omuki munene inianemutumba. Abya ng’omuki munene owakalua omo riko.
29 Neryo omughulu oMungu atsandaya emiyi y’omo kiharo ekyo, mwibuka Abrahamu omw’ilusya Loti omo miyi eyatsandaya, emiyi y’omo kiharo ekyo Loti abya ikeremo.
30 Enyuma sy’aho, Loti n’abali biwe babiri mubalua e Zoari, bamayikala omo kiharo ky’ebitwa, kundi mubasagha erikala e Zoari. Loti mwikala omo mwangalu haghuma n’abali biwe babiri.
31 Kiro kighuma, mwali wiwe mukulu mwabwira omulere ati: “Baba abiribya musyakulu. Omo kihugho kino simuli oghundi mulume oyo wangatutahya ngoko abandu omo kihugho kyosi bakanakola.
32 Asa, tunywisaye baba wetu y’edivai, tughotsere naye, neryo tukendiyira oko bana erilabira iye.”
33 Omo kiro ekyo, mubanywisya baba wabo y’edivai nene. Omukulu mwingira n’erighotsera na baba wiwe. Aliwe baba wiwe mwataminya esaha aghotsera, n’esaha mwali wiwe abuka.
34 Ekiro ekikwamire, omukulu mwabwira omulere ati: “Omo kiro, mungaghotsera na baba. Tutasyamunywisaya edivai omo kiro kya munabwire, naghu uyaghotsere naye. Neryo tukendiyira oko bana erilabira iye.”
35 Neryo kandi omo kiro ekyo, mubaha baba wabo y’edivai nene, neryo omulere mwayaghotsera naye. Aliwe Loti mwataminya kindu. Mwataminya esaha alyaghotsera, n’esaha mwali wiwe alyabuka.
36 Neryo abali babiri ba Loti mubaheka amakule oko baba wabo.
37 Omukulu mwabuta omwana w’obulume, amamwahula mo Moabu. Yo tata-kulu w’Abamoabu ba munabwire.
38 Omulere naye mwabuta omwana w’obulume, amamwahula mo Benami. Yo tata-kulu w’Abaamoni ba munabwire.
Amaelezo awehikwa
^ Kutse “kihamya.”
^ Kutse “enafsi.”
^ Kutse “enafsi yaghe itoke eribyaho.”
^ Ni bugha ambu “obuke.”
^ Ni hibunga ehikaka luba kandi ehikakumba muhanda omughulu hikaka, ng’ehikabya oko musiku w’elimete.
