Enzuko 2:1-25
2 Olubula, ekihugho, n’ebyosi ebirimo ko byahwa eribumbwa bitya.
2 Ekiro kye 7 oMungu abya eniabiribugha omubiiri wiwe. Neryo omo kiro kye 7, mwatsuka eriluhuka abibugha emibiiri yiwe yosi.
3 Kandi oMungu mwatsumula ekiro kye 7, kandi mwabugha ati kibye kibuyirire, kundi oMungu mwaluhuka omo kiro ekyo abibugha omubiiri wiwe wosi w’erihangyika, abihangyika ebyosi ebyo abya anzire erihangyika.
4 Emyatsi ko yabya yitya omughulu olubula n’ekihugho byahangyikawa, omo kiro ekyo Yehova* Mungu abumba ekihugho n’olubula.
5 Oko kihugho kwabya isikulikwabya akasaka n’akaghuma, kutse ebiti byosi-byosi, kundi Yehova Mungu abya isyalyaleta embula oko kihugho. Kandi sihabya omundu oyo wangalima ekitaka.
6 Aliwe ekihohe ikikabya ikinemulua omo kitaka n’erihira oko kitaka kyosi kw’amaghetse.
7 Yehova Mungu mwabumba omundu omo lututu. Neryo mwabuhira omo mihuli y’omundu oyo m’omuka w’engebe, neryo omundu oyo mwabya mundu* oyuliho.
8 Kandi Yehova Mungu mwahera eririma e Edeni, oko luhande lw’eyo ryuba rikasira. Neryo mwahira muryo m’omundu oyo ahangyika.
9 Yehova Mungu mwalasya obuli muti owakatsemesaya ameso, n’owaliko amatunda awasihire. Kandi mwalasya omuti w’engebe omo kati-kati k’eririma n’omuti w’eriminya ekibuya n’ekibi.
10 Habya olusi olwabya lukalua e Edeni, neryo ilukuta amaghetse omo ririma eryo. Olusi olo ilukayighabamo syonyusi ini.*
11 Erina ry’olusi lw’erimbere ni Pishoni. Lutimbire oko kihugho kyosi kye Havila, eyiri ehoro.
12 Ehoro y’omo kihugho ekyo yuwene. Omo kihugho ekyo mukabya n’amatsitsi w’ebedola, n’eribwe rye oniksi.
13 Olusi lw’akabiri lukahulawa mo Gihoni. Lw’olusi olutimbire oko kihugho kyosi kye Kushi.
14 Olusi lw’akasatu lukahulawa mo Hidekeli.* Lo lukaya oko luhande lw’eyikasira eryuba lwe Asiria. N’olusi lw’akani lukahulawa mo Efrati.
15 Yehova Mungu mwimya omundu oyo, amamuhira omo ririma rye Edeni kusudi alimeryo n’erisugharyo.
16 Kandi Yehova Mungu mwaha omundu oyo y’ekyalayiro kino: “Wanganalya ngoko wanzire oko matunda w’emiti yosi eyiri omw’irima.
17 Aliwe isiwalya oko matunda w’oko muti w’eriminya ekibuya n’ekibi, kundi ekiro ukendisyalya oko matunda ayo, ukendisyahola.”
18 Kandi Yehova Mungu mwabugha ati: “Si kyuwene omundu eribya iniane iyuwene. Ngendimubumbira omuwatikya oyumutolere.”
19 Nikwa Yehova Mungu abya inianemubumba omo lututu esyonyama syosi sy’omoli n’ebihangyikwa byosi ebikaghuluka. Neryo mwabya akaleterasyo omundu oyo erilangira ng’akendihasyo amena wahi. Neryo iniakabya abiha enyama* y’erina rilebe, iyalw’iyabya ikahulwa yitya.
20 Neryo omundu mwaha amena esyonyama syosi esikatungawa, ebihangyikwa byosi ebikaghuluka, n’esyonyama syosi sy’omoli. Aliwe iye, abya isyawite omuwatikya oyumutolere.
21 Neryo Yehova Mungu mwaghotserya omundu y’otughotseri tunene. Neryo omughulu abya inianaghotsere, oMungu mwimya olukanga lughuma lw’omundu oyo n’eriliba ah’alusayalo.
22 Neryo Yehova Mungu mwabumba omukali omo lukanga olwalusaya omo mulume, n’erimuletera omulume oyo.
23 Neryo omulume mwabugha ati:
“Ibwa rero, oyu n’ikuha ry’amakuha waghe,N’omunyoku w’omunyoku waghe.
Akendihulwa mo mukali,Kundi alyalua omo mulume.”
24 Busana n’ekyo, omulume akendisyasigha baba wiwe na mama wiwe, naye akendisyamatana* na mukali wiwe, neryo bakendisyabya mubiri mughuma.
25 Abosi babiri, omulume n’omukali, babya isibambite; aliwe babya isibalikwa esisoni.
Amaelezo awehikwa
^ Hano ho rina ry’oMungu rikabanika engendo y’erimbere. Ulebaye Endomeko A4.
^ Kutse “enafsi.” Omo Kiebrania ni nèphèsh. Ekinywa ekyo kikamaanisaya ekihangyikwa ekikahumula. Ulebaye Amaana w’ebinywa (Enafsi).
^ Kinywa kwa kinywa, “ilukabya mitwe ini.”
^ Kutse “Tigre.”
^ Kutse “enafsi.”
^ Kutse “akendisyikala; akendisyasighala.”
