Enzuko 20:1-18
-
Abimeleki amasubulirya Abrahamu yo Sara (1-18)
20 Abrahamu mwahumisirya ekambi yiwe omo kihugho kye Negebu, amikala omo kati-kati ke Kadeshi ne Shuri. Omughulu abya ikere* e Gerari,
2 kandi mwabugha ati Sara, mukali wiwe, ni mwali wabo. Neryo Abimeleki, omwami we Gerari, mwatuma abandu bayende Sara n’erimutwala ewiwe.
3 Omo kiro, oMungu mwakania na Abimeleki omo nzoli. Mwamubwira ati: “Ukendihola, kundi wabirimya omukali oyu, oyutahibwe, kandi ni mukali wabene.”
4 Aliwe Abimeleki mwataghotsera naye. Neryo mwabugha ati: “Yehova, ukenditsandya abandu abate n’ekosa?*
5 Yutalyambwira ati ni mwali wabo? Na Sara yutalyambwira ati Abrahamu ni mughala wabo? Mungakola nitya n’omutima ow’erire n’ebyala ebite n’ekosa.”
6 Neryo oMungu w’ekwenene mwamubwira omo nzoli ati: “Ninasi kulyakola utya n’omutima ow’erire. Kyo kiryaleka inakukakirya erinikosera, kandi kyo kiryaleka initakulighira erimutulako.
7 Neryo usubuliraye omulume oyo y’omukali wiwe, kundi omulume oyo ni muminyereri. Akendikusabira, neryo siwendihola. Aliwe utitamusubulya, uminye ngoko ukendihola, iwe n’abandu baghu bosi.”
8 Omo tututu, Abimeleki mwabuka luba, amabirikira abaghombe biwe bosi n’eribakanirya ebyosi. Mubasagha kutsibu.
9 Neryo Abimeleki mwabirikira Abrahamu n’erimubwira ati: “Ulyatukolera utya kundiki? Ingye n’abandu b’omo bwami bwaghe tulyendikola erilolo rinene busana naghu. Ulyatukolera utya busanaki? Mungakukolera erilolo ryahi? Ekyo ulyanikolera si kyuwene.”
10 Mwatasyabugha ati: “Ulue ukalengekania okuki omughulu ulyakola utya?”
11 Abrahamu mwamusubirya ati: “Ni kundi mungayibwira niti, ‘Abandu b’eno sibasaghire oMungu, kandi bakendiniita busana n’omukali waghe.’
12 Aliwe tu oko kwenene, ni mwali wetu, ni mwali wa baba, aliwe situbutirwe omo nda nguma. Neryo munamutahya.
13 Omughulu oMungu anibwira ati niye hali oko kihanda kya baba waghe, munabwira Sara niti: ‘Kino kyo ukendisyabya ukakola erikangania ngoko unianzire kandi ngoko uli mutaleghula okw’ingye: Ahosi-hosi aho tukendisyaya, ukendisyabya ukabugha uti niri mughala wenyu.’”
14 Neryo Abimeleki mwimya esyombuli, esyonde, abaghombe b’obulume n’abaghombe b’obukali, amahabyo Abrahamu. Mwamusubulirya n’omukali wiwe, ye Sara.
15 Kandi Abimeleki mwabugha ati: “Ekyosi kino ni kihugho kyaghe. Wanganikala aho wanzire.”
16 Mwabwira na Sara ati: “Ngaha mughala wenyu y’ebihande 1 000 by’efeza.* Ekyo kikakanganaya abosi abali naghu n’abandi bosi ngoko mututitakola ekindu,* neryo sighuliko kosa.”
17 Neryo Abrahamu mwalemba-lemba oMungu w’ekwenene, neryo oMungu mwalamya Abimeleki, omukali wiwe, n’abaghombe biwe b’obukali, bamatsuka eritasyabuta;
18 kundi Yehova abya iniabiriyira abakali bosi b’omo nyumba ya Abimeleki mo baghumba* busana na Sara, muka Abrahamu.
Amaelezo awehikwa
^ Kutse “ikere ng’omugheni.”
^ Kutse “abatunganene.”
^ Ni kindu ky’obughuli ekikalua omo kitaka.
^ Kinywa kwa kinywa, “Lebaya bikendibya kindu ky’eriswika ameso waghu.”
^ Kutse “abya iniabiriliba olosi amabunda wosi w’omo nyumba ya Abimeleki.”
