Enzuko 21:1-34
21 Yehova mwibuka Sara ngoko abya iniabiribugha, kandi Yehova mwakolera Sara ekyo amulagha.
2 Neryo Sara mwaheka obukule, amabutira Abrahamu omwana w’obulume, oko mughulu ogho Mungu abalagha. Abrahamu abya iniabirikekeluha.
3 Abrahamu mwaha omughala wiwe, oyo Sara amubutira, erina rya Isaka.
4 Isaka, mughala wa Abrahamu, abere abibugha ebiro 8, Abrahamu mwamubania, ngoko oMungu amubwira.
5 Abrahamu abya n’emyaka 100 omughulu Isaka, mughala wiwe, abutawa.
6 Neryo Sara mwabugha ati: “OMungu abirinikolera ekyangaleka inaseka. Abosi abakendyowa omwatsi oyu bakendibya bakaseka naghe.”*
7 Kandi mwabugha ati: “Nindi yo wangabwirire Abrahamu ati, ‘Sara akendinyonyesya omwana?’ Aliwe, namabibutira Abrahamu y’omwana w’obulume iniamabikekeluha.”
8 Neryo omwana oyo mwakula, bamamutsirisya amabere. Ekiro bamutsirisaya amabere, Abrahamu mwateghekania efete nene.
9 Aliwe Sara mwalangira ngoko mughala wa Hagari, oyo Omumisri abutira Abrahamu, abya akasekererya Isaka.
10 Neryo Sara mwabwira Abrahamu ati: “Higha omughombe mukali n’omughala wiwe, kundi omughala w’omughombe mukali oyo syendisyahabwa omwandu n’ahake haghuma n’omughala waghe Isaka.”
11 Ebyo Sara abugha oko mughala wiwe mubitatsemesya Abrahamu.
12 Neryo oMungu mwabwira Abrahamu ati: “Ebyo Sara alyakubwira oko mulwana n’oko mughombe waghu w’obukali isibyaleka ukahitana. Umuhulikirire, kundi olukendisyahulwa mo lubuto lwaghu lukendisyasa erilabira Isaka.
13 N’omughala w’omughombe mukali, naye ngendisyamuyira mo kihanda kinene, kundi ni mughala waghu.”
14 Neryo Abrahamu mwabuka omo tututu, amimya emikati n’etsupa y’engobi eyirimo amaghetse, amahabyo Hagari. Mwahirabyo oko kitigho kya Hagari, n’erimuleka aghende n’omulwana. Neryo Hagari mwaghenda n’eriyaghanga-ghanga omo mbwarara ye Beeri-sheba.
15 Amaghetse awabya omo tsupa y’engobi abere abihwa, Hagari mwasigha omwana omo ndina y’omuti muke.
16 Neryo mwaghenda haraha n’aho omusali angahika amabighuswa, n’erikala ahisi iyuwene, kundi mwayibwira ati: “Sinanzire ngalangira omwana akahola.” Neryo mwikala hali hake, amatsuka erilaka kutsibu, n’erilira.
17 Neryo oMungu mwowa omulenge w’omulwana, n’omumalaika w’oMungu mwabirikira Hagari erilua elubula n’erimubwira ati: “Hagari, hamabyaki kwe? Isiwasagha, kundi oMungu abiryowa omulenge w’omulwana aho ali.
18 Hangana, uyahanganaye omwana, umuhambe oko byala, kundi ngendimuyira mo kihanda kinene.”
19 Neryo oMungu mwakingula ameso wa Hagari. Neryo Hagari mwalangira eribulu, amaghenda, n’eryusulya amaghetse omo tsupa y’engobi, n’eriha omwana y’amaghetse w’erinywa.
20 Omulwana oyo akakula, oMungu abya haghuma naye. Mwikala omo mbwarara, amabya mulasi w’emisali.
21 Mwayikala omo mbwarara ye Parani, na mama wiwe mwamutahirya omukali we Misri.
22 Oko mughulu oyo, Abimeleki na Fikoli, omukulu w’abasuda biwe, mubabwira Abrahamu bati: “OMungu ane haghuma naghu omo myatsi yosi eyo ukakola.
23 Neryo ulape embere sy’oMungu ngoko siwendinikolera muhanda, ingye, abana baghe, n’abitsikulu baghe, kandi ngoko ukendinikangania olwanzo oluteleghula, ingye n’ekihugho ekyo wikeremo, ngoko naghe nakukanganaya olwanzo oluteleghula.”
24 Neryo Abrahamu mwabugha ati: “Namalapa.”
25 Aliwe Abrahamu mwabwira Abimeleki ngoko abaghombe biwe babirimupurako eribulu.
26 Abimeleki mwasubirya ati: “Sinasi oyulyakola atya nga nindi. Suliwatambwira. Munabwire mo namasala nowa.”
27 Neryo Abrahamu mwimya esyombuli n’esyonde, amahabyo Abimeleki. N’abosi babiri mubakola endaghane.
28 Omughulu Abrahamu alusaya esyombuli 7 sy’obukali omo kihangulo kiwe,
29 Abimeleki mwamubulya ati: “Busanaki mukalusaya esyombuli 7 sy’obukali sino omo kihangulo?”
30 Mwamusubirya ati: “Isiwaghana erimya esyombuli 7 sino sy’obukali. Erilighasyo kikendikangania ngoko n’ingye natakula eribulu eri.”
31 Ekyo kyo kyaleka inahulaho mo Beeri-sheba,* kundi aho ho bosi babiri balapira.
32 Neryo mubakola endaghane e Beeri-sheba. Enyuma sy’aho, Abimeleki na Fikoli, omukulu w’abasuda biwe, mubasuba omo kihugho ky’Abafilistini.
33 Enyuma sy’aho, Abrahamu mwahera e Beeri-sheba y’omuti w’omwesheli. Iniane eyo, mwapipa* erina rya Yehova, oMungu oyuliho kera na kera.
34 Abrahamu mwabugha* ebiro binene omo kihugho ky’Abafilistini.
Amaelezo awehikwa
^ Kutse alinga, “bakaniseka.”
^ Alinga ni bugha ambu “eribulu ry’erilapa” kutse “eribulu ry’esyombuli 7.”
^ Kinywa kwa kinywa, “mwabirikira.”
^ Kutse “mwikala ng’omugheni.”
