Enzuko 22:1-24
22 Enyuma sy’aho, oMungu w’ekwenene mwalenga oko Abrahamu. Mwamubwira ati: “Abrahamu!” Abrahamu mwasubirya ati: “Ingye yono!”
2 OMungu mwamubwira ati: “Kisi, imaya omughala waghu, ekyusa kyaghu, ekyo wanzire kutsibu, ye Isaka. Ughende omo kihugho kye Moria. Ukendibya wabihika eyo, iwamuherera mo buhere bw’eryokererya oko kitwa ekyo ngendikukangania.”
3 Neryo Abrahamu mwabuka omo tututu, amateghekania* epunda yiwe n’erimya abaghombe biwe babiri n’omughala wiwe Isaka. Mwatulanga esyongwe sy’obuhere bw’eryokererya. Enyuma sy’aho, amatsukalo, amaghenda eyo oMungu amubwira ati aghende.
4 Ekiro ky’akasatu, Abrahamu mwasumba ameso, amalangirira omwanya oyo w’ehali.
5 Neryo Abrahamu mwabwira abaghombe biwe ati: “Inywe, musighale hano n’epunda. Aliwe ingye na mughala waghe, tukaya erya. Tukayaramaya oMungu, neryo tukendibeya hano.”
6 Neryo Abrahamu mwimya esyongwe sy’obuhere bw’eryokererya, amahekyasyo Isaka. Naye mwaheka omuliro n’omuhamba.* Neryo ibo babiri mubaghenda kughuma.
7 Neryo Isaka mwabwira baba wiwe Abrahamu ati: “Baba!” Abrahamu mwamusubirya ati: “Utikino mughala waghe!” Kandi Isaka mwabugha ati: “Namalangira tuwite oko muliro n’esyongwe. Ibwa embuli eyikendibya buhere bw’eryokererya yiri hayi?”
8 Neryo Abrahamu mwamubwira ati: “Mughala waghe, oMungu akendituha embuli y’obuhere bw’eryokererya.” Neryo abosi babiri mubaendelea n’olughendo.
9 Mubabya babihika eyo oMungu w’ekwenene abya iniabirimukangania, Abrahamu mwahimba ekiherero, amatonda esyongwe sy’oko kiherero ekyo, n’enyuma sy’aho amaboha Isaka oko byala n’oko bisando, amamuhira oko kiherero endata oko syongwe.
10 Neryo Abrahamu mwimya omuhamba* atoke eriita mughala wiwe.
11 Aliwe omumalaika wa Yehova mwamubirikira iniane elubula, amamubwira ati: “Abrahamu, Abrahamu!” Abrahamu mwamusubirya ati: “Ingye y’ono.”
12 Neryo omumalaika mwamubwira ati: “Isiwahutalaya omulwana, isiwamukolako kindu, kundi lino namabiminya ngoko usaghire oMungu, kusangwa siwetanighanira omwana waghu, ekyusa.”
13 Neryo mwasumba ameso, amalangira ngoko hakuhi naye hane embangale. Amahembe w’embangale eyo abya iniabirighoba-ghoba omo kasaka. Neryo Abrahamu mwimyayo, amahererayo mo buhere bw’eryokererya omo mwanya w’eriherera mughala wiwe.
14 Neryo Abrahamu mwahula omwanya oyo mo Yehova-yire.* Kyo kikaleka erihika munabwire abandu bakinabugha bati: “Omo kitwa kiwe, Yehova akendituha ebyo tulaghireko.”
15 Kandi omumalaika wa Yehova mwabirikira Abrahamu engendo y’akabiri iniane elubula,
16 mwamubwira ati: “Yehova ati, ‘Namalapa omo rina ryaghe niti, ‘kundi mukakola eki, kandi kundi sutanighanira mughala waghu, ekyusa,
17 oko kwenene, ngendikutsumula. Ngendiyira abana baghu mo banene ng’esyongununu sy’omo kyanya, kandi bakendibya banene ng’omutsanga owakabya oko musike w’engetse. Kandi abana baghu bakendisyahamba emiyi* y’esyonzighu syabo.
18 N’erilabira olubuto lwaghu, ebihanda byosi by’oko kihugho bikendisyayibanira emiyisa, kundi mukahulikirira omulenge waghe.’”
19 Enyuma sy’aho, Abrahamu mwasuba eyiri abaghombe biwe. Neryo mubahangana, abosi bamasuba e Beeri-sheba. Abrahamu mwaendelea erikala e Beeri-sheba.
20 Enyuma sy’aho, mubasyabwira Abrahamu ambu: “Milka naye abiributira Nahori, mughala wenyu, abana b’obulwana:
21 Akambere kiwe ko Uzi. Mughala wabo naye yo Buzi, Kemueli, baba wa Aramu,
22 Kesedi, Hazo, Pildasi, Yidlafu, na Betueli.”
23 Betueli mwabuta Rebeka. Milka mwabutira Nahori, mughala wabo Abrahamu, abana 8 abo.
24 Oghundi mukali wiwe, oyukahulawa mo Reuma, naye mwabuta abana b’obulume. Mwabuta Teba, Gahamu, Tahasi, na Maaka.
Amaelezo awehikwa
^ Kutse “amasesa.”
^ Kutse “omuhamba w’erikeramo.”
^ Kutse “omuhamba w’erikeramo.”
^ Ni bugha ambu “Yehova akendituha ebyo tulaghireko; Yehova yukendiminya.”
^ Kinywa kwa kinywa, “emilango.”
