Enzuko 23:1-20
-
Sara amahola n’eritabwa (1-20)
23 Sara mwahola iniawite emyaka 127.
2 Sara mwaholera e Kiriati-arba, ni bugha ambu, e Hebroni, omo kihugho kye Kanana. Neryo Abrahamu mwakola ekiriro, mwalira Sara.
3 Neryo Abrahamu mwalua ahali ekinda ky’omukali wiwe, amayabwira abaghala ba Heti ati:
4 “Niri mugheni, kandi nalua omo kindi kihugho. Mumbe ekitaka omo kiharo kyenyu aho ngendita omukali waghe.”
5 Neryo abaghala ba Heti mubasubirya Abrahamu bati:
6 “Mukama wetu, tuhulikirire. Uli mukulu* oyo wahirawaho n’oMungu omo kati-kati ketu. Wanganata omukali waghu omo kimbaseke ekyuwene kutsibu ky’oko bimbaseke byetu. Omw’itwe simuli oyo wangakughanira ah’erita mukali waghu.”
7 Neryo Abrahamu munama embere sy’abandu b’omo kihugho ekyo, ni bugha ambu, abaghala ba Heti.
8 Kandi mwababwira ati: “Mwamabya imwamaligha muti nite mukali waghe, munihulikirire. Mukanaye na Efroni, mughala wa Zoari,
9 muti anighulaye omwangalu wiwe we Makpela, owali oko musike w’eririma riwe. Anighulayegho embere syenyu. Anitsweregho omo feza,* neryo ngendibya n’ah’erita omukali waghe.”
10 Efroni abya ikere omo kati-kati k’abana ba Heti. Neryo Efroni, Omuhiti, mwasubirya Abrahamu embere sy’abaghala ba Heti n’embere sy’abosi ababya bakingira omo mulango w’omuyi, ati:
11 “Iyehe, mukama waghe! Unihulikirire. Ngakuha eririma n’omwangalu owali muryo, ngakuhabyo embere sy’abandu b’ewetu eno. Ute omukali waghu.”
12 Neryo Abrahamu munama embere sy’abandu b’omo kihugho ekyo.
13 Mwabwira Efroni embere syabo ati: “Kisi, unihulikirire! Ngendikuliha esyofranga syosi sy’eririma. Wimayesyo, nitoke erita mukali waghe.”
14 Neryo Efroni mwasubirya Abrahamu ati:
15 “Hulikirira, mukama waghe. Ebeyi y’eririma eryo ni syoshekeli* 400 sy’efeza.* Aliwe esyo siki. Ute mukali waghu.”
16 Neryo Abrahamu mwaligha ebyo Efroni abugha. Neryo Abrahamu mwamupimira esyoshekeli esyo amutswera embere sy’abaghala ba Heti, ni bugha ambu, esyoshekeli* 400 sy’efeza,* erikwamana n’emipimire y’abakomersa.
17 Neryo abandu mubaminya ngoko eririma rye Efroni, eryabya e Makpela, hakuhi ne Mamre, ni bugha ambu, eririma n’omwangalu owabya muryo, n’emiti yosi eyabya muryo,
18 Abrahamu abirighularyo embere sy’abaghala ba Heti, embere sy’abandu bosi ababya bakingira omo mulango w’omuyi.
19 Neryo Abrahamu mwata mukali wiwe Sara omo mwangalu, omo ririma rye Makpela, eryabya rihererenie ne Mamre, ni bugha ambu, e Hebroni, omo kihugho kye Kanana.
20 Abaghala ba Heti mubaligha bati eririma n’omwangalu owabya muryo bibye bya Abrahamu, atoke eritamo mukali wiwe.
Amaelezo awehikwa
^ Kutse alinga, “seghu-seghu.”
^ Ni kindu ky’obughuli ekikalua omo kitaka.
^ Eshekeli nguma ni syograme 11,4. Ulebaye Endomeko B14.
^ Ni kindu ky’obughuli ekikalua omo kitaka.
^ Eshekeli nguma ni syograme 11,4. Ulebaye Endomeko B14.
^ Ni kindu ky’obughuli ekikalua omo kitaka.
