Enzuko 25:1-34
25 Abrahamu mwatahya oghundi mukali, oyukahulawa mo Ketura.
2 Ketura mwamubutira Zimrani, Yokshani, Medani, Midiani, Ishbaki, na Shua.
3 Yokshani mwabuta Sheba na Dedani.
Abaghala ba Dedani babya Ashurimu, Letushimu, na Leumimu.
4 Abaghala ba Midiani babya Efa, Eferi, Hanoki, Abida, na Elda.
Abosi abo babya bitsikulu ba Ketura.
5 Enyuma sy’aho, Abrahamu mwaha Isaka ebindu byosi ebyo abya awiteko.
6 Aliwe abaghala b’abandi bakali biwe, mwabaha ebihembo. N’ekindi, omughulu abya iniakineho, mwatumabo bayikale hali na mughala wiwe Isaka, omo kihugho ky’oko luhande lw’eyo ryuba rikasira.
7 Abrahamu mwabugha emyaka 175.
8 Neryo mwatwa omutima n’erihola, iniamabibugha emyaka minene kandi iniali omo ngebe eyuwene. Abya iniabiribya musyakulu, kandi iniabiribughaho ebiro binene, neryo mwahindanibwa n’abandu biwe.*
9 Abaghala biwe ye Isaka na Ismaeli mubamuta omo mwangalu we Makpela, omo ririma rya Efroni, mughala wa Zoari, Omuhiti, erihererenie ne Mamre,
10 eryo Abrahamu aghula oko baghala ba Heti. Aho ho bata Abrahamu na mukali wiwe, Sara.
11 Abrahamu abere abihola, oMungu mwalola embere eritsumula mughala wiwe Isaka, oyo wabya ikere hakuhi ne Beeri-lahai-roi.
12 Eno y’ehistoria ya Ismaeli, mughala wa Abrahamu, oyo Hagari, Omumisri, omughombe wa Sara, amubutira.
13 Aya w’amena w’abaghala ba Ismaeli, erikwamana n’ebihanda byabo: Akambere kiwe kabya Nebayoti, n’abakwamire ni Kedari, Adbeeli, Mibsamu,
14 Mishma, Duma, Masa,
15 Hadadi, Tema, Yeturi, Nafishi, na Kedema.
16 Abo b’abaghala ba Ismaeli, n’ayo w’amena wabo erikwamana n’emilongo yabo n’erikwamana n’esyokambi syabo,* abakulu 12 erikwamana n’ebihanda byabo.
17 Ismaeli mwabugha emyaka 137, neryo amatwa omutima. Mwahola n’erihindanibwa n’abandu biwe.*
18 Abana biwe babya bikere eritsuka e Havila, hakuhi ne Shuri, eyiri hakuhi ne Misri, eriyahika e Asiria. Mubikala hakuhi n’abaghala babo bosi.*
19 Eno y’ehistoria ya Isaka mughala wa Abrahamu.
Abrahamu mwabuta Isaka.
20 Isaka abya n’emyaka 40 omughulu atahaya Rebeka, mwali wa Betueli, Omuaramu we Padani-aramu, kandi mwali wabo Labani, Omuaramu.
21 Isaka mwalemba-lemba Yehova ati awatikaye mukali wiwe, kundi abya mughumba. Yehova mwahulikirira omusabe wiwe, neryo Rebeka amabya mukule.
22 Abana mubatsuka erilwira omo nda yiwe, neryo Rebeka mwabugha ati: “Byamabya iko biri bitya, inalw’inahola.” Neryo Rebeka mwabulya Yehova emyatsi nga yiri yitya busanaki.
23 Neryo Yehova mwamubwira ati: “Ebihanda bibiri biri omo nda yaghu, n’ebitunga bibiri bikendisyalua omo nda yaghu n’erighabana. Ekihanda kighuma kikendisyabya n’akaghala kulenga ekindi, n’omukulu akendisyakolera omulere.”
24 Endambi yiwe y’eributa yabere yahika, kwenene abahasa bo babya omo nda yiwe.
25 Oyo watsuka eriluamo, iye wosi abya w’erangyi y’omusasi, kandi abya ng’olukimba lw’obweya. Neryo mubamwahula mo Esau.*
26 Enyuma sy’aho, mughala wabo naye mwalua omo nda, inianamakirire akasinziro ka Esau. Neryo mubamwahula mo Yakobo.* Isaka abya n’emyaka 60 omughulu Rebeka abutabo.
27 Abalwana abo mubakula. Esau mwabya muhiyi, oyo wasi erihigha. Abya akasiba omoli. Aliwe Yakobo, iye iniakasighala omo mahema. Abya mundu musa-musa.*
28 Isaka mwanza Esau, kundi iniakamuletera enyama y’erirya. Aliwe Rebeka abya anzire Yakobo.
29 Kiro kighuma, Yakobo abya inianemuhuka emboka y’elantiye,* neryo Esau amalua omoli iniabiriluha.
30 Neryo Esau mwabwira Yakobo ati: “Kisi, umba luba-luba* oko mboka eyo, ey’eruje,* kundi niluhire kutsibu!” Kyo kyaleka Esau iniahulwa mo Edomu.*
31 Yakobo mwabugha ati: “Tsuka wanighulya obukulu* bwaghu!”
32 Esau mwamusubirya ati: “Yono ngahola! Obukulu* bukendimbaki?”
33 Neryo Yakobo mwamubwira ati: “Utsuke walapa embere syaghe!” Neryo Esau mwalapa, amaghulya Yakobo obukulu* bwiwe.
34 Neryo Yakobo mwaha Esau emikati n’emboka y’elantiye.* Esau mwalya n’erinywa, neryo amahangana, n’erighenda. Esau kw’apokaya atya obukulu* bwiwe.
Amaelezo awehikwa
^ Ebi ni binywa by’ekisosekanio ebikamaanisaya erihola.
^ Kutse “n’esyokambi syabo esitimbireko esyombimbo.”
^ Ebi ni binywa by’ekisosekanio ebikamaanisaya erihola.
^ Kutse alinga, “Mubatabya bakahulikirirana n’abaghala babo bosi.”
^ Ni bugha ambu “oyuswireko bweya.”
^ Ni bugha ambu “oyumakirire akasinziro; oyukimaya omwanya w’oghundi.”
^ Kutse “Syabyako hinywa-hinywa; Abya alughirirene.”
^ Ni buli nga buhoti.
^ Kutse “umba nimere.”
^ Kinywa kwa kinywa, “ey’eruje erya.”
^ Ni bugha ambu “eky’eruje; eky’erangyi y’omusasi.”
^ Kutse “obumbere.”
^ Kutse “Obumbere.”
^ Kutse “obumbere.”
^ Ni buli nga buhoti.
^ Kutse “obumbere.”
