Enzuko 26:1-35
26 Omo kihugho mumwabya enzala. Enzala eyo muyaleka Isaka iniaya e Gerari, ewa Abimeleki, omwami w’Abafilistini. Oko biro bya Abrahamu, habya ihabiribya eyindi nzala.
2 Neryo Yehova mwamuhulukira, amamubwira ati: “Isiwandaghalira e Misri. Wikale omo kihugho ekyo ngakukanganaya.
3 Wikale omo kihugho kino ng’omugheni. Ngendibya inine naghu, kandi ngendikutsumula, kundi ngendisyakuha, iwe n’abana baghu ebihugho byosi ebi. Kandi ngendisyaberererya ebyo nalapa erikolera baba waghu, ye Abrahamu:
4 ‘Ngendisyayira abana baghu mo banene ng’esyongununu sy’elubula, kandi ngendisyaha abana baghu b’ebihugho byosi ebi. Kandi erilabira olubuto lwaghu, ebihanda byosi by’oko kihugho bikendisyayibanira emiyisa,’
5 kundi Abrahamu mwahulikirira omulenge waghe, kandi mwataleka erikola ebyo namusaba erikola, ebyalayiro byaghe, ebihano byaghe, n’emighambo yaghe.”
6 Neryo Isaka mwaendelea erikala e Gerari.
7 Omughulu abandu b’eyo babya bakamubulya Rebeka nga ni mukali wiwe, abya akababwira ati: “Ni mwali wetu.” Abya akasagha eribabwira ati, “Ni mukali waghe,” kundi iniakayibwira ati, “Abandu b’eno bangananiita busana na Rebeka,” kusangwa Rebeka abya mubuya.
8 Habere habilaba ebiro bilebe, Abimeleki, omwami w’Abafilistini, mwaleberya omo ridirisa, amalangira Isaka inianemukumbatira Rebeka, mukali wiwe.
9 Neryo Abimeleki mwalw’iniabirikira Isaka n’erimubwira ati: “Kwesi ni mukali waghu! Busanaki mukabugha uti ni mwali wenyu?” Neryo Isaka mwamubwira ati: “Mungasagha erihola, kyo kiryaleka inabugha nitya.”
10 Kandi Abimeleki mwamubwira ati: “Lebaya ekyo wamatukolera! Omundu alue inianganaghotsera n’omukali waghu, neryo wangalekire itwakola erilolo!”
11 Neryo Abimeleki mwabwira abandu bosi ati: “Omundu oyukendisyayitswa eritula oko mulume oyu n’omukali wiwe akendisyitibwa.”
12 Neryo Isaka mwatsuka erihera embuto omo kihugho ekyo. Oko mwaka oyo, mwaghesa embuto eyo ahera yo ngendo 100, kundi Yehova abya akamutsumula.
13 Isaka mwabya muteke, ebindu biwe mubyakanyirira kutsibu erihika oko kika amabya muteke, amabya kikunguli.
14 Mwayira oko bihangulo by’esyombuli, by’esyonde, n’abaghombe banene. Neryo Abafilistini mubamutsura.
15 Neryo Abafilistini mubimya omutaka, bamaliba amabulu agho baghombe b’abobaba wiwe batakula oko biro bya Abrahamu.
16 Neryo Abimeleki mwabwira Isaka ati: “Ulue omo kihugho kyetu, kundi wabiribya n’akaghala kutulenga.”
17 Neryo Isaka mwahumayo, amayahira ekambi yiwe omo musya we Gerari, amikala eyo.
18 Isaka mwatasyatakula amabulu awatakulawa oko mughulu wa baba wiwe Abrahamu, kundi Abafilistini mubalibagho Abrahamu abihola. Mwahulagho ngoko baba wiwe abya akahulagho.
19 Omughulu abaghombe ba Isaka babya bakatakula omo musya, mubasungamo eribulu eririmo amaghetse awasihire.
20 Abalisya be Gerari mubatsuka erilwa n’abalisya ba Isaka. Babya bakabugha bati: “Amaghetse ni wetu!” Neryo Isaka mwahula eribulu eryo mo Eseki,* kundi mubalwa naye.
21 Mubatsuka eritakula erindi ribulu, kandi mubatsuka erilwiraryo, neryo Isaka mwahularyo mo Sitina.*
22 Enyuma sy’aho, mwalua aho, amayatakula erindi ribulu. Rero mubatalwiraryo. Neryo mwahularyomo Rehoboti,* n’eribugha ati: “Ni kundi rero Yehova abirituha omwanya munene, kandi abirituyiramo banene omo kihugho.”
23 Neryo mwalua aho, amaya e Beeri-sheba.
24 Omo kiro ekyo, Yehova mwamuhulukira, amamubwira ati: “Niri Mungu wa baba waghu Abrahamu. Isiwasagha, kundi niri haghuma naghu. Ngendikutsumula, ngendiyira abana baghu mo banene, busana na Abrahamu, omughombe waghe.”
25 Neryo mwahimba eyo y’ekiherero n’eripipa* erina rya Yehova. Isaka mwahimba ehema yiwe y’eyo, n’abaghombe biwe mubatakulayo eribulu.
26 Enyuma sy’aho, Abimeleki mwalua e Gerari, amasyabana Isaka. Abya haghuma na Ahuzati, omuhani wiwe, na Fikoli, omukulu w’abasuda biwe.
27 Neryo Isaka mwamubulya ati: “Muwanipona, wamanihigha n’omo kihugho kyaghu, neryo ukasyanibana busanaki?”
28 Neryo mubamusubirya bati: “Twabiriyilangirira ngoko Yehova ane haghuma naghu. Neryo mutukayisogha erikubwira tuti, ‘Kisi tukole endaghane y’obuholo haghuma naghu. Tukole endaghane eno naghu:
29 Siwendisyatukolera kibi ngoko netu mututakukolera ekibi, nibya mutwakukolera ebibuya bisa-bisa. Mutwabugha tuti ughende buholo. Twabirilangira ngoko Yehova anemukutsumula.’”
30 Neryo mwabakolera efete, bamalya, n’erinywa.
31 Mubabuka omo tututu, n’obuli mughuma amalapa embere sy’oghundi ngoko akendisikya ebyo balyalaghana. Enyuma sy’aho, Isaka mwalekabo baghende, nabo mubaghenda buholo.
32 Ekiro ekyo, abaghombe ba Isaka mubasa n’erimubwira ngoko babiritakula eribulu. Mubamubwira bati twabirisunga amaghetse.
33 Neryo mwahularyo mo Shiba. Kyo kikaleka omuyi oyo iniahulwa mo Beeri-sheba erihika na munabwire.
34 Esau mwabya abiyira emyaka 40, mwatahya Jidite, mwali wa Beri, Omuhiti. Mwatahya na Basemati, mwali wa Eloni, Omuhiti.
35 Abakali abo mubaleka Isaka na Rebeka ibabya omo bulighe bunene kutsibu.
Amaelezo awehikwa
^ Ni bugha ambu “amalwa.”
^ Ni bugha ambu “erisitaka.”
^ Ni bugha ambu “emyanya minene.”
^ Kinywa kwa kinywa, “n’eribirikira.”
