Enzuko 27:1-46
27 Isaka mwabya abibya musyakulu, n’ameso wiwe isyakilangira ndeke, mwabirikira mughala wiwe mukulu ye Esau. Mwamubwira ati: “Mughala waghe!” Naye mwasubirya ati: “Ingye y’ono baba!”
2 Isaka mwamubwira ati: “Yono namabibya musyakulu. Sinasi nga nikinawite biro bingahi.
3 Kisi, wimaye ebindu byaghu by’erihighamo, olubo* lwaghu, obuta* bwaghu, uye omoli, uya nihighire akanyama.
4 Neryo ukendinihukira akalyo akasihire ako nganza, ukendinileterako. Ngendiryako, neryo inakutsumula* embere nihole.”
5 Nikwa Rebeka abya inianahulikirire omughulu Isaka abya akakania na mughala wiwe Esau. Neryo Esau mwaghenda omoli, amayahigha akanyama n’eriletako.
6 Neryo Rebeka mwabwira Yakobo, omughala wiwe ati: “Namabyowa baba waghu akakania na mughala wenyu Esau, ati:
7 ‘Uniletere akanyama, unihukire akalyo akasihire. Ngendiryako, neryo inakutsumula embere sya Yehova, embere nihole.’
8 Nikwa mughala waghe, nihulikirire ndeke, kandi ukole ekyo ngakubwira.
9 Kisi, uye eyiri ekihangulo, uniletere ebyana by’embene bibiri ebyuwene, nitoke erihukira baba waghu y’akalyo akasihire, ako anzire.
10 Neryo ukenditwalirako baba waghu, alyeko, neryo akendikutsumula embere ahole.”
11 Yakobo mwabwira mama wiwe Rebeka ati: “Esau mughala wetu aliko obweya, aliwe ingye iyehe.
12 Neryo bikendibya biti baba waghe amabinitulako? Singendibya nga ngamutsangamo. Neryo iniakendinitakira omo mwanya w’erinitsumula.”
13 Neryo mama wiwe mwamusubirya ati: “Nitakirawe omo mwanya waghu, mughala waghe. Iwe tu ukole ekyo namakubwira, uyaniletere esyombene esyo.”
14 Neryo mwayaleterasyo mama wiwe, na mama wiwe mwahuka akalyo akasihire, ako baba wiwe akanza.
15 Enyuma sy’aho, mama wiwe mwimya esyongyimba esyuwene sya mughala wiwe mukulu, ye Esau, esyabya omo nyumba. Amambalyasyo mughala wiwe mulere ye Yakobo.
16 Kandi mwahira esyongobi sy’ebyana ebyo by’embene oko byala bya Yakobo, mwayirasyo n’oko ngoto yiwe ahatabya obweya.
17 Neryo mwaha Yakobo y’akalyo akasihire, n’emikati ey’alyahuka.
18 Neryo Yakobo mwaya eyiri baba wiwe n’eribugha ati: “Baba!” naye mwamusubirya ati: “Ingye y’ono! Ulindi mughala waghe?”
19 Yakobo mwasubirya baba wiwe ati: “Niri Esau, akambere kaghu. Nabirikola ngoko ulyabugha. Kisi, uhangane, ulye oko kanyama kaghe, utoke erinitsumula.”*
20 Neryo Isaka mwamubwira ati: “Kwe rero mughala waghe, ka wamasungako luba?” Naye mwasubirya ati: “Ni kundi Yehova Mungu waghu mwakanileterako.”
21 Neryo Isaka mwabwira Yakobo ati: “Kisi mughala waghe, seghera hakuhi naghe nitoke erikutulako, neryo ngendiminya ng’uli Esau, kutse iyehe.”
22 Neryo Yakobo mwaseghera hakuhi na baba wiwe Isaka, amamutulako. Abere abimutulako, amabugha ati: “Omulenge ni wa Yakobo, aliwe ebyala ni bya Esau.”
23 Mwatamuminya kundi ebyala biwe byabyako obweya ng’ebyala bya mughala wabo Esau. Neryo mwamutsumula.
24 Enyuma sy’aho, mwamubulya ati: “Kwenene-kwenene ninawe mughala waghe Esau?” Naye mwasubirya ati: “Inga n’ingye.”
25 Neryo mwamubwira ati: “Mughala waghe, ndetere oko kanyama ako nirye, neryo ngendikutsumula.”* Neryo mwaleterako baba wiwe, naye mwalya. Mwamuletera n’edivai, amanywa.
26 Neryo Isaka, baba wiwe, mwamubwira ati: “Kisi, mughala waghe, seghera hakuhi naghe, unikumbatire.”
27 Mwaseghera hakuhi naye, amamukumbatira, na Isaka mwowa ekikumbo ky’omo syongyimba sya Yakobo, neryo mwamutsumula omwibugha ati:
“Ekikumbo ekikalua oko mughala waghe kiri ng’ekikumbo ky’eririma eryo Yehova abiritsumula.
28 OMungu w’ekwenene akuhe ekimi ky’elubula, n’ebitaka ebirimo embolewa, ebyalya bingyi, n’edivai nyihya-nyihya.
29 Abandu bakukolere, ebihanda bikukame embere syaghu. Ubye mukama w’abaghala benyu, n’abana b’obulume ba mama waghu bakukame embere syaghu. Obuli mundu oyukakutakira atakirawe, n’obuli mundu oyukakutsumula atsumulawe.”
30 Isaka abere anabibugha eritsumula Yakobo, na Yakobo imwanamalua ahali baba wiwe Isaka, mughala wabo Esau mwalua eyo alyayahighira.
31 Naye mwahuka akalyo akasihire, amatwalirako baba wiwe. Mwabwira baba wiwe ati: “Baba hangana, ulye oko kanyama kaghe, utoke erinitsumula.”*
32 Neryo baba wiwe, ye Isaka, mwamubulya ati: “Ulindi?” Naye mwabugha ati: “Niri mughala waghu Esau, akambere kaghu.”
33 Neryo Isaka mwatsuka erititimana kutsibu, mwabugha ati: “Neryo nindi yulyahigha akanyama n’erindeterako? Mongalyako isiwewahika, n’erimutsumula. Oko kwenene, abiritsumulwa.”
34 Esau mwabya abyowa ebinywa bya baba wiwe, mwatsuka erilaka kutsibu omo mulenge w’obulighe. Mwabwira baba wiwe ati: “Baba, naghe unitsumule!”
35 Aliwe baba wiwe mwamubwira ati: “Mughala wenyu mwakaniteba atoke eribana emiyisa eyo nangakuhere.”
36 Neryo Esau mwabugha ati: “Kyo kikaleka iniahulwa mo Yakobo. Amabimya omwanya waghe gho kabiri. Abirimya obukulu bwaghe, kandi y’oyo amabimya n’omuyisa waghe.” Mwatasyabugha ati: “Naghe siwetanibikira omuyisa?”
37 Aliwe Isaka mwasubirya Esau ati: “Nabirimuyira mo mukama waghu, nabiribugha niti abaghala babo bosi, bakendisyabya abaghombe biwe, kandi nabirimuha ebyalya n’edivai nyihya-nyihya. Ngenditasyakuha omuyisa wahino, mughala waghe?”
38 Esau mwabwira baba wiwe ati: “Baba, ni bugha ambu uwite oko muyisa mughuma musa kwe? Baba, naghe nitsumule!” Neryo Esau mwalira kutsibu, amatoghongya emisonia.
39 Neryo Isaka, baba wiwe, mwamusubirya ati:
“Ukendisyikala omo bihugho ebitemo mbolewa n’ebitemo ekimi ekikalua elubula.
40 Omuyali waghu oyo wakendisyabya akakuha eky’erirya. Ukendisyabya mughombe wa mughala wenyu. Aliwe ukendisyabya waluha, ukendisyabuna omuketo ogho akendisyabya iniabirihira oko ngoto yaghu.”
41 Neryo Esau mwabika ekinigha ky’oko Yakobo busana n’omuyisa ogho baba wiwe amuha. Esau mwabya akayibwira ati: “Baba akisigha iniahola.* Enyuma sy’aho, ngendisyita Yakobo, mughala wetu.”
42 Omughulu babwira Rebeka ebyo Esau mughala wiwe mukulu alyabugha, mwalw’iniabugha ati bayende Yakobo mughala wiwe mulere. Neryo mwamubwira ati: “Hulikirira, mughala wenyu Esau anemubugha* ati akendikwita busana n’ekyo wakola.”
43 Neryo mughala waghe, ukole ekyo ngakubwira. Hangana, utibite e Harani, ew’omughala wetu Labani.
44 Wikale naye erihika omughulu ekinigha kya mughala wenyu kikendisyabondera,
45 erihika omughulu mughala wenyu akendisyaleka erikuhitanako n’eribirirwa ebyo wamukolera. Neryo, ngendisyatuma omundu iniayakwenda. Sinanzire eribaherya inywe babiri ekiro kighuma.”
46 Enyuma sy’aho, Rebeka mwabya akabwira Isaka ati: “Omutima waghe abiriluha busana n’abali ba Heti. Yakobo naye amabitahya oko bali ba Heti, abali ng’abambesa b’omo kihugho eki, inalw’inahola basi.”
Amaelezo awehikwa
^ Ni kafuko k’erihekamo emisali.
^ Ni kindu ky’erilasamo emisali.
^ Kutse “enafsi yaghe iyakutsumula.”
^ Kutse “enafsi yaghu itoke erinitsumula.”
^ Kutse “enafsi yaghe ikendikutsumula.”
^ Kutse “enafsi yaghu itoke erinitsumula.”
^ Kinywa kwa kinywa, “Ebiro by’erilira baba bikisiya ibyahika.”
^ Kutse “anemuyikirania.”
