Enzuko 28:1-22
28 Neryo Isaka mwabirikira Yakobo, amamutsumula, amamubwira ati: “Isiwatahaya oko bambesa be Kanana.
2 Uye e Padani-aramu ewa Betueli sokulu* waghu, uyatahaye oko bali ba Labani, muyomba* waghu.
3 OMungu Omutoki w’Ebyosi akendikutsumula. Akendikuha abana bangyi n’olubuto lunene. Oko kwenene, ukendisyabya bihanda binene.
4 Kandi oMungu akendisyakuha omuyisa wa Abrahamu, iwe n’abana baghu, utoke erimya ekihugho ekyo wikalamo ng’omugheni, ekyo oMungu aha Abrahamu.”
5 Neryo Isaka mwaleka Yakobo aghende. Neryo, Yakobo mwaya e Padani-aramu, ewa Labani, mughala wa Betueli, Omuaramu, mughala wabo Rebeka, mama wa Yakobo na Esau.
6 Esau mwalangira ngoko Isaka abiritsumula Yakobo n’erimutuma e Padani-aramu, ayarondayeyo omukali, kandi ngoko omughulu Isaka atsumula Yakobo, mwamubwira ati isyatahaya oko bambesa be Kanana.
7 Kandi mwalangira ngoko Yakobo abirikwama ebyo baba wiwe na mama wiwe bamubwira n’eriya e Padani-aramu.
8 Neryo Esau mwafumbula ngoko baba wiwe ye Isaka syanzire abambesa be Kanana.
9 Neryo Esau mwaya ewa Ismaeli, amayatahyayo Mahalati, mwali wa Ismaeli, mughala wa Abrahamu. Mahalati abya mwali wabo Nebayoti. Esau mwatahya oyo iniabiriyira oko bandi bakali.
10 Yakobo mwalua e Beeri-sheba, amalolera e Harani.
11 Abere abihika omo kiharo kilebe, amayisogha erighotsera aho, kundi eryuba ryaba iryabirilenga. Mwimya eribwe atoke eriseghemera kuryo, neryo mwaghotsera aho, amalota.
12 Omo nzoli yiwe, mwalangira omungazi owaluire oko kihugho n’eriyahika elubula. Abamalaika b’oMungu babya bakiruka n’erindaghala oko mungazi oyo.
13 Na Yehova abya endata w’omungazi oyo. Mwabwira Yakobo ati:
“Ingye Yehova, oMungu wa Abrahamu, sokulu waghu, n’oMungu wa Isaka. Ekitaka ekyo ughotsereko, ngendisyakuhakyo, iwe n’abana baghu.
14 Abana baghu bakendisyabya banene ng’olututu oluli oko kihugho. Bakendisyayitsatsanga oko luhande lw’eyo ryuba rikalengera n’eyo ryuba rikasira, oko luhande lw’endata n’oko luhande lw’eyikwa, kandi erilabira iwe n’erilabira olubuto lwaghu ebihanda byosi by’oko kihugho bikendisyatsumulwa.*
15 Nine haghuma naghu, ngendisyakuteya ehosi eyo ukendisyaya, kandi ngendisyakusubya omo kihugho kino. Sinendisyakulekerania, ngendisyakola ebyo nabirikulagha.”
16 Neryo Yakobo abere abibuka, mwabugha ati: “Oko kwenene, Yehova ane hano, nilwe isinasi.”
17 Neryo mwasagha, mwabugha ati: “Omwanya ono akita obuba bunene! Syangabula eribya enyumba y’oMungu, kandi hano h’ahali omulango w’elubula.”
18 Neryo Yakobo mwabuka omo tututu, amimya eribwe eryabya aseghemereko, amimaniaryo ng’enduyi, amuta amaghuta endata oko ribwe eryo.
19 Neryo mwahula omwanya oyo mo Beteli. Aliwe embere, omuyi oyo abya iniakahulawa mo Luzi.
20 Enyuma sy’aho, Yakobo mwayilagha ati: “OMungu amatendinilekerania, kandi amabiniteya omo lughendo lwaghe, amabimba omukati w’erirya n’esyongyimba sy’eryambala,
21 kandi namabisuba omo nyumba ya baba waghe buholo, aho Yehova iniakendibya iniamabikangania ngoko kwenene-kwenene ni Mungu waghe.
22 N’eribwe eri eryo namimania ng’enduyi rikendibya nyumba y’oMungu, kandi ngendiha oMungu ekighuma ky’omwikumi ky’ebyosi ebyo akendimba.”
Amaelezo awehikwa
^ Kinywa kwa kinywa, “baba wa mama waghu.”
^ Kinywa kwa kinywa, “mughala wabo mama waghu.”
^ Kutse “bikendisyayibanira omuyisa.”
