Enzuko 29:1-35
29 Enyuma sy’aho, mwaendelea n’olughendo lwiwe, amalolera omo kihugho ky’abandu b’oko luhande lw’eyo ryuba rikasira.
2 Neryo, mwalangira eribulu omo kisuki n’ebihangulo bisatu by’esyombuli ibyabiribundama hakuhi naryo, kundi aho ho bandu babya babeghere erinywisya ebihangulo byabo. Babya ibakaswika oko ribulu kw’eribwe rinene.
3 Ibakabya babikuma-kumira esyonyama syosi syo haghuma, ibakalusaya eribwe eryo oko buno bw’eribulu, neryo ibanywisya esyonyama syabo. Isikabya syabinywa, ibasubyaryo oko buno bw’eribulu.
4 Neryo Yakobo mwababulya ati: “Baghala betu, ewenyu ni hayi?” Mubamusubirya bati: “Tuli be Harani.”
5 Mwatasyababwira ati: “Munasi Labani, omwitsikulu wa Nahori?” Nabo mubamusubirya bati: “Ehee, tunamwasi.”
6 Neryo mwababulya ati: “Anuwene?” Mubamusubirya bati: “Anuwene, nibya n’omwali wiwe yo Rakeli, yolya anemwasa n’esyombuli.”
7 Neryo mwabugha ati: “Ikine medi. Endambi y’erikuma-kuma esyonyama siyiriyahika, munywisaye esyombuli, neryo muyalisayesyo.”
8 Mubabugha bati: “Situhamulirwe erikola tutya.Tukatsuka twakuma-kumira haghuma ebihangulo byosi n’erilusya oko ribulu kw’eribwe, neryo imo twanywisya esyombuli.”
9 Yakobo iniakinabugha, Rakeli mwasa n’esyombuli sya baba wiwe, kundi abya mulisya.
10 Yakobo mwabya abilangira Rakeli mwali wa Labani, muyomba* wiwe, n’esyombuli sya Labani, mwalw’iniayalusya eribwe oko ribulu, neryo amanywisya esyombuli sya Labani.
11 Yakobo mwakumbatira Rakeli, amalira kutsibu.
12 Neryo mwabwira Rakeli ngoko ni w’oko kihanda kya baba wiwe, kandi ngoko ni mughala wa Rebeka. Neryo Rakeli mwalw’iniatibita ewabo, amayabwira baba wiwe.
13 Labani abere abyowa ngoko Yakobo mughala wa mwali wabo abirihika, mwalw’iniayasungana naye. Mwamuha eyambi n’erimukumbatira n’erimutwala omo nyumba yiwe. Yakobo mwatsuka erimukanirya ebyosi ebyo alyalolako.
14 Neryo Labani mwamubwira ati: “Oko kwenene, uli rikuha ryaghe, n’omunyuku waghe.” Neryo Yakobo mwabugha ewa Labani y’omwisi mughuma.
15 Enyuma sy’aho, Labani mwabwira Yakobo ati: “Si bugha ambu ukendinikolera bule kundi uli w’oko kihanda kyetu. Wanzire inabya ngakulihaki?”
16 Labani abya n’abasika babiri. Omukulu iniakahulawa mo Lea, n’omulere iniakahulawa mo Rakeli.
17 Ameso wa Lea isyalyaka, aliwe Rakeli abya mubuya kutsibu.
18 Yakobo abya iniabirianza Rakeli, neryo mwabugha ati: “Nine tayari erikukolera oko myaka 7 wanamatamba Rakeli, mwali waghu mulere.”
19 Neryo Labani mwabugha ati: “Kyuwene okw’ingye erikuha ye omo mwanya w’erimuha oghundi mundu. Usighale haghuma netu.”
20 Neryo Yakobo mwakolera Labani oko myaka 7 batoke erimuha Rakeli, aliwe emyaka eyo muyabya ng’ebiro bike kundi abya anzire Rakeli.
21 Neryo Yakobo mwabwira Labani ati: “Namabibugha ebiro ebyo twalighiranako. Umba mukali waghe, ngayaghotsere naye.”
22 Neryo Labani mwahindania abandu bosi b’omo kiharo ekyo, amakola efete.
23 Aliwe omw’igholo, mwaletera Yakobo y’omwali wiwe, ye Lea, atoke erighotsera naye.
24 Kandi Labani mwaha Lea omughombe wiwe w’obukali, ye Zilpa.
25 Omo tututu, Yakobo mwafumbula ngoko kwesi ni Lea! Neryo mwabwira Labani ati: “Kwe rero mukangoleraki? Sunasi ngoko nakutumikira busana na Rakeli, busanaki mukaniteba?”
26 Neryo Labani mwamubwira ati: “Ewetu eno situliha omundu y’omulere omukulu isyalyatahibwa.
27 Tabugha eyenga nguma ighunemutsema n’omukali oyo. N’enyuma sy’aho, ngendikuha oghundi mukali wabinikolera omo yindi myaka 7.”
28 Yakobo mwakola atya. Amabugha eyenga nguma akatsema na Lea. Enyuma sy’aho, Labani mwamuha mwali wiwe Rakeli, abye mukali wiwe.
29 Kandi Labani mwaha Rakeli omughombe wiwe mukali, oyukahulawa mo Bila.
30 Neryo Yakobo mwaghotsera na Rakeli naye. Abya anzire Rakeli kulenga Lea. Neryo mwatasyatumikira Labani eyindi myaka 7.
31 Yehova abere alangira ngoko Yakobo syanzire Lea nga Rakeli, mwaha Lea y’abana,* aliwe Rakeli abya mughumba.
32 Neryo Lea mwabya mukule, amabuta omwana w’obulume. Mwamuha erina rya Rubeni,* kundi mwabugha ati: “Ni busana Yehova mwakalangira ngoko ngaghalawa, neryo omulume waghe akenditsuka erinianza.”
33 Kandi mwabya mukule, amabuta omwana w’obulume, n’eribugha ati: “Yehova abiritasyamba oyu kundi mwalangira ngoko sinabya nanzirwe.” Neryo mwamuha erina rya Simeoni.*
34 Kandi mwabya mukule, amabuta omwana w’obulume, n’eribugha ati: “Rero omwira waghe akendimatana naghe, kundi nabirimubutira abana basatu b’obulume.” Kyo kyaleka iniahulwa mo Lawi.*
35 Kandi mwatasyabya mukule, amabuta omwana w’obulume, n’eribugha ati: “Rero ngendipipa Yehova.” Neryo Lea mwamuha erina rya Yuda.* Neryo amabuta bangaho.
Amaelezo awehikwa
^ Kinywa kwa kinywa, “mughala wabo mama wiwe.”
^ Kinywa kwa kinywa, “mwakingula enda yiwe.”
^ Ni bugha ambu “mulangire, omwana w’obulume!”
^ Ni bugha ambu “eryowa.”
^ Ni bugha ambu “erimatana; obughuma.”
^ Ni bugha ambu “oyukapipawa; eky’eripipa.”
