Enzuko 3:1-24
3 Neryo enzoka yabya n’amayele kulenga esyonyama syosi sy’omoli esyo Yehova Mungu ahangyika. Muyabulya omukali yiti: “Kwenene oMungu abiribugha ati isimwalya amatunda w’emiti yosi eyiri omw’irima?”
2 Omukali mwasubiryayo ati: “Twanganalya amatunda w’emiti y’omw’irima.
3 Aliwe oko mwatsi owalebirye amatunda w’omuti owali omo kati-kati k’eririma, oMungu mwabugha ati: ‘Isimwalya kugho, isimwatula na kugho, mukasyahola.’”
4 Aliwe enzoka muyabwira omukali yiti: “Iyehe, simwendihola.
5 Kundi oMungu anasi ngoko ekiro kisa-kisa ekyo mukendisyalya oko matunda w’omuti oyo, ameso wenyu akendisyakingukala, neryo mukendisyabya ng’oMungu, imwaminya ekibuya n’ekibi.”
6 Neryo omukali mwasamalira amatunda w’omuti oyo, amalangira ngoko uwene, kandi ngoko akatsemesaya ameso. Oko kwenene, omuti oyo abya iniakatsemesaya ameso. Neryo omukali mwimya eritunda ry’ok’omuti oyo, amalyaryo. Mwabya abibya hakuhi n’omulume wiwe, amamuha, naye amalya.
7 Neryo ameso w’abosi babiri mwakingukala, bamafumbula ngoko bali ndumbu. Neryo mubimya ebiti by’omuti w’omutini, bamayisonera emipindo.*
8 Habere habilaba akatambi kalebe, mubowa omulenge wa Yehova Mungu. Mubowagho omughulu oMungu abya akalendera omo ririma, akahunga akuwene kakasonda erilaba. Neryo omulume n’omukali mubayibisa omo kati-kati k’emiti y’eririma Yehova Mungu akasyabalangira.
9 Neryo Yehova Mungu mwabirikira omulume n’erimubulya ati: “Uli hayi?”
10 Mwasala amusubirya ati: “Mungowa omulenge waghu omw’irima, aliwe mungasagha kundi nilwe isinimbite. Neryo mungabisama.”
11 Neryo oMungu mwamubulya ati: “Nindi yulyakubwira ati siwambite? Wabirirya oko matunda w’omuti ogho nakubwira niti isiwalya oko matunda wagho?”
12 Omulume mwamusubirya ati: “Omukali oyo wamba yulyamba eritunda ry’omuti oyo, neryo mungalyaryo.”
13 Neryo Yehova Mungu mwabulya omukali ati: “Ulyakola utya busanaki?” Omukali mwamusubirya ati: “Enzoka muyikaniteba, neryo namalya.”
14 Neryo Yehova Mungu mwabwira enzoka ati: “Kundi mukakola utya, wamabitakirwa omo kati-kati k’esyonyama syosi esikatungawa, n’omo kati-kati k’esyonyama syosi sy’omoli. Ukendibya ukaghendera oko nda. Kandi omo maisa waghu wosi, ukendisyabya ukalya olututu.
15 Ngendihira obuyighu omo kati-kati kaghu n’omukali, omo kati-kati k’olubuto lwaghu n’olubuto lwiwe. Olubuto lw’omukali lukendisyahinolera omutwe waghu, naghu ukendisyahutalyalo oko kasinziro.”
16 Mwabwira n’omukali ati: “Ngendikanyirirya kutsibu obulumi bw’obukule bwaghu; ukendibya ukabuta abana omw’inuba, kandi ukendisyabya n’engumbu nene y’eribya* n’omwira waghu, naye akendisyakutabala.”
17 Mwabwira na Adamu ati: “Kundi mukahulikirira omulenge w’omukali waghu n’erirya eritunda ry’omuti ogho nabugha niti, ‘Isiwalya amatunda wagho,’ ekitaka kyamabitakirwa busana naghu. Omo biro byosi by’amaisa waghu, ukendibya ukalya akalyo akakalua mukyo wabinuba.
18 Kikendikulasirya amahwa n’emisaki-saki, kandi ukendibya ukalya ebiti.
19 Ukendisyabya ukabana akalyo* wabitwa olunza erihika ekiro ukendisyasuba omo lututu, kundi walua omo lututu. Uli lututu, kandi ukendisyasuba omo lututu.”
20 Enyuma sy’aho, Adamu mwahula omukali wiwe mo Eva, kundi iye yo wangabere mama w’abandu bosi.
21 Kandi Yehova Mungu mwakokoterya Adamu n’omukali wiwe esyongyimba nyiri-nyiri sy’engobi, atoke eryambalyabo.
22 Enyuma sy’aho, Yehova Mungu mwabugha ati: “Omundu yono abiribya ng’omughuma w’okw’itwe omw’iminya ekibuya n’ekibi. Neryo kusudi isyasumba ebyala biwe n’erimya eritunda ry’omuti w’engebe n’eriryaryo, n’eribyaho kera na kera,— ”
23 Neryo Yehova Mungu mwamuhigha omo ririma rye Edeni kusudi ayalime ekitaka ekyo abumbawamo.
24 Neryo oMungu mwahigha omundu, kandi mwahira abamakerubi oko luhande lw’eyikasira eryuba lw’eririma rye Edeni. Mwahirayo n’omuyali owakaka owabya akatimba. Mwakola atya eriteya enzira eyikatwala ahali omuti w’engebe.
Amaelezo awehikwa
^ Kutse “ebibete; olumbo.”
^ Kutse “ukanza kutsibu eribya.”
^ Kinywa kwa kinywa, “omukati.”
