Enzuko 30:1-43
30 Rakeli mwabya abilangira ngoko syalitabutira Yakobo y’abana, mwatsura mwali wabo n’eribwira Yakobo ati: “Umba abana. Bite-bitya, ingendihola.”
2 Aliwe Yakobo mwahitana oko Rakeli n’erimubwira ati: “N’ingye Mungu kwe, oyulyaleka ighutabya n’abana?”
3 Neryo Rakeli mwabwira Yakobo ati: “Omughombe waghe w’obukali ye Bila, y’oyu. Ughotsere naye atoke erinibutira* abana, neryo naghe ngendiyira abana erilabira iye.”
4 Neryo mwamuha Bila, omughombe wiwe mukali abye mukali wiwe. Na Yakobo mwaghotsera naye.
5 Bila mwabya mukule, amabutira Yakobo y’omwana w’obulume.
6 Neryo Rakeli mwabugha ati: “OMungu abirinitswera, kandi abiryowa omulenge waghe, neryo mwakamba omwana w’obulume.” Kyo kyaleka Rakeli iniamuha erina rya Dani.*
7 Kandi Bila, omughombe wa Rakeli, mwabya mukule, amabutira Yakobo omwana w’akabiri w’obulume.
8 Neryo Rakeli mwabugha ati: “Nabirilwa kutsibu na mwali wetu, nibya nabirimusinga.” Neryo Rakeli mwaha omwana oyo y’erina rya Naftali.*
9 Lea mwabya abilangira ngoko syakibuta, amaha Yakobo y’omughombe wiwe mukali ye Zilpa, abye mukali wiwe.
10 Zilpa omughombe wa Lea mwabutira Yakobo y’omwana w’obulume.
11 Neryo Lea mwabugha ati: “Niri n’omuyisa.” Neryo Lea mwamuha erina rya Gadi.*
12 Enyuma sy’aho, Zilpa omughombe wa Lea mwabutira Yakobo omwana w’akabiri w’obulume.
13 Neryo Lea mwabugha ati: “Nitsemire basi. Oko kwenene, abakali bakendibugha ambu nitsemire.” Neryo Lea mwamuha erina rya Asheri.*
14 Oko mughulu w’erighesa engano, Rubeni abya inianemulendera omo kisuki, neryo mwasunga amatunda w’amandragore. Mwaleteragho mama wiwe, yo Lea. Neryo Rakeli mwabwira Lea ati: “Tamba oko matunda w’amandragore w’omughala waghu.”
15 Lea mwamusubirya ati: “Eribya n’omwira waghe, sikitosire kwe? Kandi wanzire n’erimya n’amandragore w’omughala waghe?” Neryo Rakeli mwabugha ati: “Sihali lubanza. Ukendighotsera na Yakobo omo kiro kya munabwire wamabimba oko matunda w’amandragore w’omughala waghu.”
16 Omw’igholo-gholo, Yakobo inianemulua omo kisuki, Lea mwaya eyo ali, n’erimubwira ati: “Munabwire n’ingye ukendighotsera naghe, kundi mungaliha Rakeli amatunda w’amandragore w’omughala waghe, utoke erighotsera naghe.” Neryo omo kiro ekyo, Yakobo mwaghotsera na Lea.
17 Neryo oMungu mwowa n’erisubirya oko musabe wa Lea. Mwabya mukule, amabutira Yakobo omwana w’akatano w’obulume.
18 Neryo Lea mwabugha ati: “OMungu abirimba omusahara waghe kundi mungaha omulume waghe y’omughombe waghe.” Neryo Lea mwaha omwana oyo y’erina rya Isakari.*
19 Kandi Lea mwabya mukule, amabutira Yakobo y’omwana w’esita w’obulume.
20 Neryo Lea mwabugha ati: “OMungu abirimba ekihembo, ekihembo ekyuwene. Rero omulume waghe akendinivumilia, kundi nabirimubutira abana 6 b’obulume.” Neryo Lea mwaha omwana oyo y’erina rya Zabuloni.*
21 Enyuma sy’aho, Lea mwabuta omwana w’obukali amamuha erina rya Dina.
22 OMungu mwasal’ibuka Rakeli, mwowa n’erisubirya oko misabe yiwe, mwamuwatikya eribya mukule.*
23 Rakeli mwabya mukule, amabuta omwana w’obulume. Neryo mwabugha ati: “OMungu abirinilusyako esisoni!”
24 Neryo Rakeli mwaha omwana oyo y’erina rya Yozefu,* mwabugha ati: “Yehova amabitasyamba oghundi mwana w’obulume.”
25 Rakeli mwabya abibuta Yozefu, Yakobo mwalw’iniabwira Labani ati: “Leka ngaghende ewaghe, omo kihugho kyaghe.
26 Umbe abakali baghe, abaleka inakukolera, umbe n’abana baghe kusudi nighende, kundi unasi ndeke-ndeke omubiiri ogho nakukolera.”
27 Neryo Labani mwamubwira ati: “Wamabya iwabirinisima, isiwaghenda kundi nabirilangirira ngoko Yehova anemunitsumula busana naghu.”
28 Labani mwatasyabugha ati: “Nibwire nga nikuliheki, ngendikulihakyo.”
29 Neryo Yakobo mwamusubirya ati: “Unasi ngoko nakukolera kandi unasi esyonyama syaghu nga syabya siti omughulu nabya ngatsungasyo.”
30 Syabya sike embere niase, aliwe lino syabirikanya n’eribya sinene. Kandi eritsuka aho nahikira hano, Yehova abirikutsumula, neryo ngendisyakuha-kuhira ekihanda kyaghe ky’omughulu wahi?”
31 Labani mwamubulya ati: “Wanzire inakuhaki?” Yakobo mwamusubirya ati: “Siwendimba kindu, ngenditasyabya ngakulisirya esyonyama syaghu n’eritsungasyo, wamabinikolera kino:
32 Munabwire, ngendilaba omo syonyama syaghu. Ulusaye musyo mw’esyombuli syosi esyamadoa-madoa n’esyebitanga-bitanga, esyombangale syosi esikine nyilere esikinire,* n’esyombene syosi esy’obukali esy’ebitanga-bitanga n’amadoa-madoa. Eritsuka lino, esyonyama esyo syo sikendibya musahara waghe.
33 Ukendibya wasyalebya esyonyama syaghe, ukendilangira ngoko niri mundu musa-musa.* Wamabinieya n’esyombene sy’obukali esitemo madoa-madoa n’ebitanga-bitanga kutse esyombangale nyilere esitakinire, aho inamabya mwibi.”
34 Labani mwabugha ati: “Sawa, ekyo kyuwene. Bibye ngoko wamabugha.”
35 Ekiro ekyo, Labani mwalusya omo syonyama siwe mw’esyombaya sy’emilera-milera, n’esyebitanga-bitanga, n’esyombene syosi esy’obukali esirimo madoa-madoa n’ebitanga-bitanga, n’esyonyama syosi esyabyako ekitanga ky’omusohe, n’esyombangale syosi esikine nyilere esikinire,* mwahasyo abaghala biwe batsungesyo.
36 Enyuma sy’aho, Labani mwalua ahali Yakobo, mwaya omo kindi kiharo. Mwabugha ebiro bisatu kusudi ahikeyo. Yakobo mwasighala inianemulisya esindi nyama sya Labani.
37 Yakobo mwimya ehiti hy’omuti mubisi w’omulibini, omuti w’elozi,* n’ehy’omuti w’omwaramoli, mwakokolahyo. Mwakokola ehyanya hilebe hyoko hiti ehyo, ehitingu hy’erangi y’omusohe* hitoke erilangirika.
38 Neryo mwahira ehiti ehyo embere oko syonyama, omo mighende, n’omo bindu ebyo esyonyama sikanywiramo, kusudi esyonyama sihisaye syabihika embere sy’ehiti ehyo omughulu sikasyanywa amaghetse.
39 Neryo esyonyama musyabya sikahisya syabihika embere sy’ehiti ehyo, neryo musyabya sikabuta ebyana by’emilera-milera, ebya madoa-madoa, n’eby’ebitanga-bitanga.
40 Yakobo mwalusya musyo mw’esyombangale esikine nyilere, amahirasyo embere sy’esyonyama sya Labani sy’emilera-milera n’esikinire.* Emitwe yasyo yabya iyinabindukirene, neryo mwalusyamo esikendibya siwe, mwatahirasyo omo sya Labani.
41 Omughulu esyonyama sy’amaka syabya sikahisya, Yakobo iniakahira ehiti ehyo omo mighende, esyonyama esyo sitoke erilangirahyo n’erisambanako hakuhi n’ehiti ehyo.
42 Aliwe omughulu esyonyama esite n’amaka syabya sikahisya, isyalihiraho ehiti. Neryo esyonyama esite n’amaka isikabya ini sya Labani, aliwe esiri n’amaka isikabya sya Yakobo.
43 Neryo Yakobo mwabya muteke kutsibu, mwayira esyonyama nene, abaghombe banene ab’obulume n’ab’obukali, esyongamia nene, n’esyopunda nene.
Amaelezo awehikwa
^ Kinywa kwa kinywa, “eributira oko maru waghe.”
^ Ni bugha ambu “omutsweri.”
^ Ni bugha ambu “amalwa waghe.”
^ Ni bugha ambu “omuyisa.”
^ Ni bugha ambu “oyutsemire; obutseme.”
^ Ni bugha ambu “ni musahara.”
^ Ni bugha ambu “erihanda omutima; erivumilia.”
^ Kinywa kwa kinywa, “kandi oMungu mwamuhulikirira n’erikingula enda yiwe.”
^ Ni kikuhi ky’erina Yozefaya, erikamaanisaya “Yah atomekeko; akanyaye.”
^ Kutse “esy’eshokola.”
^ Kutse “sindi mwibi.”
^ Kutse “esy’eshokola.”
^ Kutse “we amande.”
^ Kutse “y’enzeru; ye blanc.”
^ Kutse “n’esy’eshokola.”
