Enzuko 32:1-32
32 Neryo Yakobo mwaendelea n’olughendo lwiwe, n’abamalaika b’oMungu mubamweya omo nzira.
2 Yakobo abere abilangirabo, mwabugha ati: “Eno ni kambi y’oMungu!” Neryo mwahula omwanya oyo mo Mahanaimu.*
3 Neryo Yakobo mwatsuka atuma abandu oko mughala wabo Esau, omo kihugho kye Seiri, ekiharo* kye Edomu.
4 Neryo, mwababwira ati: “Muyabwire omukama waghe Esau muti, ‘Omughombe waghu Yakobo ati: “Nabiribugha* ewa Labani y’ebiro binene.
5 Kandi nabiriyira oko syonume sy’esyonde, esyopunda, esyombuli, n’abaghombe b’obulume n’ab’obukali. Neryo mukama waghe, namakutumako abandu utoke erinikangania olukogho.”’”
6 Abandu abo Yakobo atuma mubabya babisubula, mubamubwira bati: “Mutukasunga mughala wenyu Esau. Anemwasa eyo uli, ane n’abalume 400.”
7 Yakobo mwasagha n’erihangya-hangya kutsibu. Neryo mwaghaba abandu ababya haghuma naye, esyonyama, esyonde n’esyongamia mo syokambi ibiri.
8 Mwabugha ati: “Esau amabilwa n’ekambi nguma, eyindi iyikendibala.”
9 Enyuma sy’aho, Yakobo mwabugha ati: “Yehova, oMungu wa baba waghe Abrahamu, n’oMungu wa baba waghe Isaka, iwe ulyambwira uti, ‘Suba omo kihugho kyaghu, n’eyiri abatunga baghu. Ngendikukolera ebyuwene,’
10 sinitolere olukogho* losi n’obutaleghula bosi obo ulyakanganaya omughombe waghu. Kundi omughulu nasoka e Yordani eno, nabya n’omutso waghe musa. Aliwe lino nabiribya n’esyokambi ibiri.
11 Ngakusaba unisabule omo byala bya mughala wetu Esau, kundi nabirimusagha. Ngasagha niti anganasa, inialwa naghe, n’abamama aba, n’abana babo.
12 Kandi muwabugha uti: ‘Ngendisyakukolera ndeke n’eriyira abana baghu mo banene ng’omutsanga w’omo ngetse ogho omundu ateangatoka erighanza.’”
13 Neryo mwaghotsera aho. Mwimya oko syonyama siwe kw’esyo akendiha mughala wabo Esau mo kihembo.
14 Mwimya esyombene sy’obukali 200, esyombaya 20, esyombuli sy’obukali 200, esyombangale 20,
15 esyopunda 30 esiriko ebyana, esyonde sy’obukali 40, esyonde sy’obulume 10, esyopunda 20 esy’obukali, n’esyopunda sy’obulume 10.
16 Mwaha abaghombe biwe b’ekihangulo kighuma-kighuma, n’eribabwira ati: “Mutsuke mwasoka, n’obuli kihangulo isikyabya hakuhi n’ekindi.”
17 Neryo mwabwira omughombe w’erimbere ati: “Wamabisunga mughala wetu Esau, neryo iniakubulya ati, ‘Uli mughombe wandi kandi ukayahi, n’esyonyama esiri embere syaghu esi ni syandi?’
18 Ritolere iwamubwira uti, ‘Niri mughombe wa Yakobo, n’esyonyama esi ni siwe. Ni kihembo ekyo alyatumira omukama waghe Esau. Nibya naye anemwasira enyuma syetu.’”
19 Mwabwira ow’akabiri, ow’akasatu, n’abosi ababya enyuma sy’ebihangulo ati: “Ko mukendibwira mutya Esau mwamamubandana.
20 Kandi ritolere imwamubwira muti, ‘Omughombe waghu Yakobo anemwasira enyuma syetu.’” Yakobo mwababwira atya kundi abya akayibwira ati: ‘Namabimutulerya omw’imutumira ekihembo, ingendibya nabibandana naye, kwamuhwa iniangananikokya ndeke.’
21 Neryo abaghombe biwe mubatsuka basoka olusi ibane n’ebihembo. Aliwe Yakobo mwaghotsera omo kambi.
22 Enyuma sy’aho, omo kiro ekyo, Yakobo mwahangana, mwimya abakali biwe babiri n’abaghombe biwe babiri b’obukali n’abana biwe 11, amasoka ahali ekisokero kye Yaboki.
23 Neryo mwasokyabo olusi,* amasokya n’ebindu byosi eby’abya n’abyo.
24 Neryo Yakobo mwasighala iyuwene. Neryo omulume mughuma mwatsuka erilwa naye erihika omo tututu.
25 Omulume abere abilangira ngoko syetasinga Yakobo, mwatula oko ngunyiro y’embindi yiwe, neryo engunyiro y’embindi ya Yakobo muyateghuka akalwa n’omulume oyo.
26 Enyuma sy’aho, omulume oyo mwabugha ati: “Leka ngaghende, kundi bukisiya ibwakya.” Aliwe Yakobo mwamubwira ati: “Sinendikuleka ughende ute wanitsumula.”
27 Neryo omulume oyo mwamubulya ati: “Erina ryaghu iwendi?” Naye mwamusubirya ati: “Ingye Yakobo.”
28 Omulume oyo mwamubwira ati: “Siwendisyahulwa mo Yakobo. Aliwe ukendyahulwa mo Israeli,* kundi mukalwa n’oMungu n’abandu, n’oko mwiso wamasinga.”
29 Na Yakobo naye mwamubwira ati: “Kisi, naghe mbwire erina ryaghu.” Aliwe omulume oyo mwamusubirya ati: “Busanaki ukanibulaya erina ryaghe?” Neryo mwamutsumulira aho.
30 Neryo Yakobo mwahula omwanya oyo mo Penieli,* kundi mwabugha ati: “Mungalangira oMungu busu kwa busu, aliwe sinditahola.”
31 Neryo eryuba muryahuluka Yakobo abinalaba e Penueli.* Aliwe abya inianemutsukuda busana n’embindi yiwe.
32 Ekyo kyo kikaleka erihika na munabwire Abaisraeli sibalirya omuki w’oko kihinga ky’enyama owali oko ngunyiro ey’embindi, kundi omulume oyo mwatula oko ngunyiro y’embindi ya Yakobo, oko muki w’oko kihinga.
Amaelezo awehikwa
^ Ni bugha ambu “esyokambi ibiri.”
^ Kinywa kwa kinywa, “ekisuki.”
^ Kutse “Nabirikala ng’omugheni.”
^ Kutse “olwanzo oluteleghula.”
^ Kutse “akusi akakuma.”
^ Ni bugha ambu “oyukalwa n’oMungu, oyukahatikana oMungu” kutse “oMungu akalwa.”
^ Ni bugha ambu “obusu bw’oMungu.”
^ Kutse “Penieli.”
