Enzuko 33:1-20
33 Yakobo mwasumba ameso wiwe, amalangira Esau inianemwasa n’abalume 400. Neryo mwimya abana balebe, amabaha Lea, abandi amabaha Rakeli, n’abandi amabaha abaghombe biwe babiri b’obukali.
2 Abaghombe b’obukali n’abana babo, mwabahira embere, Lea n’abana biwe enyuma wabo, na Rakeli na Yozefu enyuma wabo.
3 Yakobo mwalaba kubo abosi, amayabya embere sy’abo, neryo abere akasonda erihika hakuhi n’omughala wabo, munama n’erihira obusu b’oko kitaka ngendo 7.
4 Aliwe Esau mwatibita akayahindana naye. Esau mwakumbatira Yakobo, amamuha ebizu, neryo bamalira.
5 Esau mwabya abisumba ameso wiwe n’erilangira abakali n’abana, mwabulya Yakobo ati: “Abandu abali haghuma naghu aba ni bahi?” Yakobo mwamusubirya ati: “Aba ni bana abo Mungu abiriha omughombe waghu.”
6 Abaghombe b’obukali nabo mubaseghera hakuhi na Esau, ibo n’abana babo, neryo bamunama embere siwe.
7 Lea naye n’abana biwe, mubaseghera hakuhi na Esau, bamunama embere siwe. Yozefu na Rakeli nabo mubaseghera hakuhi na Esau, bamunama embere siwe.
8 Esau mwabulya Yakobo ati: “Busanaki mukatuma abandu aba n’esyonyama esyo niryasunga?” Yakobo mwamusubirya ati: “Mukama waghe, mungakola nitya utoke erinikangania olukogho.”
9 Esau mwabugha ati: “Niwite oko bindu binene, mughala wetu. Usighale n’ebindu byaghu.”
10 Aliwe Yakobo mwamuhatikana ati: “Kisi, isiwaghanabyo. Wamabya iwabirinisima, isiwabula erimya ekihembo ekyo namakuha, kundi mungatumakyo nitoke erikulolako. Kandi mungabya nabikulangira, mukikabya nga namalangira obusu bw’oMungu, kundi mukanikokaya ndeke.
11 Kisi, wimaye ekihembo ekyo balyakuletera, kundi oMungu abirinikangania olukogho, kandi ninawite oko byosi ebyo nilaghireko.” Esau mwimya ekihembo ekyo kundi Yakobo mwamuhatikana.
12 Habere habilaba omughulu mulebe, Esau mwabugha ati: “Tulue hano, tughende, ngendikubera embere.”
13 Aliwe Yakobo mwamusubirya ati: “Mukama waghe, unasi ngoko abana sibali n’akaghala kanene, kandi ngoko niwite esyombuli n’esyonde esiriko ebyana. Namabitwalasyo luba-luba, esyonyama syosi isikendihola.
14 Kisi mukama waghe, unibere embere, ingye mughombe waghu. Ingye ngendighenda bolo-bolo ngoko esyonyama syaghe n’abana baghe banemughenda, erihika omughulu tukendihika ew’omukama waghe e Seiri.”
15 Neryo Esau mwabugha ati: “Kisi-kisi, leka abalume balebe basighale naghu.” Yakobo mwamusubirya ati: “Iyehe, mukama waghe. Olukogho lusa lo unikanganganaye.”
16 Neryo ekiro ekyo, Esau mwasuba e Seiri.
17 Yakobo mwaya e Sukoti. Abere ahikayo, mwahimbayo enyumba. Mwahimbira n’esyonyama siwe sy’ehinyumba. Kyo kyaleka omwanya oyo iniahulwamo Sukoti.*
18 Yakobo abere ebilua e Padani-aramu, mwahika buholo omo muyi we Shekemu, omuyi w’omo kihugho kye Kanana. Mwahimba ekambi yiwe hakuhi n’omuyi oyo.
19 Enyuma sy’aho, mwaghula eririma eryo ahimbamo ehema yiwe. Mwaghularyo ebihande 100 by’esyofranga oko baghala ba Hamori, baba wa Shekemu.
20 Mwahimba muryo mw’ekiherero, amahulakyo mo Mungu, oMungu wa Israeli.
Amaelezo awehikwa
^ Ni bugha ambu “ehibanda; ehinyumba.”
