Enzuko 34:1-31
34 Dina, mwali wa Yakobo, oyo Lea amubutira, abya iniabeghere eriyatsanga* n’abambesa b’omo kihugho ekyo.
2 Omughulu Shekemu, mughala wa Hamori, Omuhivi, omukama w’ekihugho ekyo amulangira, mwamwimya n’erighotsera naye kinyanganga.
3 Obuli ndambi iniakalengekanaya oko Dina, mwali wa Yakobo. Mwanza Dina yo kutsibu. Mwabya akamubwira ehinywa ehikendileka naye iniamwanza.*
4 Shekemu mwahika oko kika ky’eribwira Hamori baba wiwe ati: “Unitahiraye omumbesa oyu.”
5 Omughulu Yakobo owa ngoko Shekemu abiritsandya mwali wiwe Dina, abaghala biwe babya ibanemulisya esyonyama siwe omoli. Neryo mwahuna erihika omughulu bakendisubula.
6 Habere habilaba mughulu mulebe, Hamori, baba wa Shekemu, mwasyamubana.
7 Abaghala ba Yakobo babere babyowa ekiryakoleka, mubalw’ibalua omoli. Babya ibabiryaghalwa omo mutima n’erihitana kutsibu, kundi Shekemu mwahemula Israeli omwighotsera na mwali wa Yakobo, omwatsi owatatolere erikoleka.
8 Hamori mwababwira ati: “Mughala waghe Shekemu anzire* kutsibu mwali wenyu. Kisi, mumuhe ye abye mukali wiwe.
9 Kandi tubye tukatahania. Mubye mukatuha oko bambesa benyu, nenyu imwimya oko betu.
10 Mwanganikala haghuma netu, mwanganikala ehosi-hosi omo kihugho kyetu. Mwikalemo n’erikoleramo ekomerse; mwikale mukyo.”
11 Shekemu naye mwabwira baba n’abaghala b’abo Dina ati: “Munikanganaye olukogho. Mwamabikola mutya, ingendibaha ekyosi-kyosi ekyo mukendinisaba.
12 Mwangananisaba omutahyo munene n’ebihembo binene. Nine tayari eribaha ekyosi-kyosi ekyo mwanganisaba. Mumbe tu omumbesa oyu, abye mukali waghe.”
13 Abaghala ba Yakobo mubateba Shekemu na Hamori baba wiwe, kundi Shekemu abya iniabiritsandya mwali wabo, ye Dina.
14 Mubabwira Shekemu na Hamori bati: “Ekyo sikyangatokekana. Sitwangaha mwali wetu y’omundu oyutabanibwe,* ni mwatsi w’esisoni okw’itwe.
15 Mwamanza muti tubahe ye, kino kisa kyo mukole: Mubye ngatwe omw’ibania abalume bosi b’ewenyu.
16 Mwamabikola mutya, itukendibaha oko bambesa betu, netu itwimya oko bambesa benyu. Kandi itukendikala haghuma nenyu n’eribya kihanda kighuma.
17 Aliwe mutitatuhulikirira n’eribanibwa, itukendimya mwali wetu n’erighenda.”
18 Hamori na mughala wiwe, ye Shekemu, mubatsemera ebinywa ebyo.
19 Omulwana oyo mwalw’iniayakola ekyo balyamusaba, kundi abya anzire kutsibu omwali wa Yakobo. Shekemu abya asikibwe kulenga bosi b’omo kihanda kya baba wiwe.
20 Neryo Hamori na mughala wiwe, ye Shekemu, mubaya oko mulango w’omuyi n’eribwira abalume ababyaho bati:
21 “Abalume aba banzire erikala netu buholo. Tulekebo bikale netu, tulekebo bakolere ekomerse omo kihugho kyetu, kundi ni kinene. Twamabikola tutya, itukendibya tukatahya oko bambesa babo, n’abo ibatahya oko betu.
22 Aliwe bakendiligha erikala netu tutoke eribya kihanda kighuma, twamabikola omwatsi ono musa: Abalume bosi b’omw’itwe babanibawe ng’ibo.
23 Neryo twamabikola tutya, simulangire ngoko ebindu byabo n’esyonyama syabo syosi ibikendibya byetu? Tulighe ebyo bamatusaba, neryo bakendikala haghuma netu.”
24 Abosi ababya bakalaba omo mulango w’omuyi mubahulikirira Hamori na mughala wiwe Shekemu. Neryo abalume bosi mubabanibwa, abosi ababya bakalaba omo mulango w’omuyi.
25 Aliwe, ekiro ky’akasatu ibakinowa obulumi, abaghala babiri ba Yakobo, ye Simeoni na Lawi, abaghala b’abo Dina, mubimya obuli mundu omuyali wiwe, bamingira omo muyi isihali oyo wasi, n’eriita obuli mulume.
26 Mubita Hamori na mughala wiwe, ye Shekemu, omo muyali. N’enyuma sy’aho, bamalusya Dina omo nyumba ya Shekemu n’erighenda.
27 N’abandi baghala ba Yakobo mubaya omo muyi oyo, bameya abalume ibabiritibwa, neryo mubaheka ebindu by’omo muyi oyo kundi babya ibabiritsandya mwali wabo.
28 Mubaheka esyombene, esyombuli, esyonde, esyopunda, n’ebyosi ebyabya omo muyi n’ebyabya emoli.
29 Mubaheka n’ebindu byosi, bamaheka abana balere n’abakali, n’eriheka ebindu byosi ebyabya omo manyumba.
30 Neryo Yakobo mwabwira Simeoni na Lawi ati: “Aho mwamabinitwira olubanza* lunene. Mwabirileka inabya ekindu ekikakumba muhanda oko Bakanana, n’Abaperezi, abakalani b’omo kihugho kino. Tuli bake, neryo eryo bakendiyighunga haghuma, n’erisyalwa netu, ingye n’ekihanda kyaghe, n’eritubughaho.”
31 Aliwe mubamusubirya bati: “Omundu anganakolera mwali wetu ng’omumbalaka kwe?”
Amaelezo awehikwa
^ Kutse “eriyabana.”
^ Kinywa kwa kinywa, “mwabya akabugha n’omutima w’omumbesa oyo.”
^ Kutse “enafsi ya Shekemu iyanzire.”
^ Kinywa kwa kinywa, “oyuli kitsule.”
^ Kutse “mwamabileka inabya muhanya.”
