Enzuko 35:1-29
35 Enyuma sy’aho, oMungu mwabwira Yakobo ati: “Hangana, uyikale e Beteli. Ukendibya wahikayo, iwahimbira oMungu w’ekwenene y’ekiherero, oMungu oyo wakuhulukira ukasagha mughala wenyu Esau.”
2 Neryo Yakobo mwabwira ekihanda kiwe n’abosi ababya bikere naye, n’abosi ababya haghuma naye ati: “Mulusaye emiungu y’amabehi omo kati-kati kenyu, muyeraye n’eryambala esindi ngyimba.
3 Tukendiya e Beteli. Tukendibya twahikayo, ngendihimbira oMungu w’ekwenene y’ekiherero, oMungu oyo wasubiraya oko musabe waghe omughulu nabya ngaghalwa, n’oyo wabya haghuma naye ehosi-hosi* eyo naya.”
4 Neryo mubaha Yakobo emiungu yosi y’amabehi eyo babya nayo, n’amaningita agho babya bambite. Neryo Yakobo mwakundabyo* omo ndina y’omuti munene owabya hakuhi ne Shekemu.
5 Omughulu babya bakaghenda, oMungu mwahira obuba omo bandu b’emiyi eyabya yibatimbireko, neryo mubatakwamirira abaghala ba Yakobo.
6 Neryo Yakobo haghuma n’abosi ababya naye mubahika e Luzi, ni bugha ambu e Beteli, omo kihugho kye Kanana.
7 Babere bahikayo, Yakobo mwahimba ekiherero n’eryahula omwanya oyo mo El-beteli,* kundi eyo y’oMungu w’ekwenene amuhulukira omughulu abya akasagha mughala wabo.
8 Habere habilaba mughulu mulebe, Debora, omulemberi wa Rebeka, mwahola. Mubamuta hakuhi ne Beteli, omo ndina y’omuti w’Omwaloni. Neryo Yakobo mwahula omuti oyo mo Aloni-bakuti.*
9 Kandi oMungu mwahulukira Yakobo inianemulua e Padani-aramu, neryo mwamutsumula.
10 OMungu mwamubwira ati: “Erina ryaghu ni Yakobo. Siwendisyahulwa mo Yakobo, aliwe ukendyahulwa mo Israeli.” Neryo mwamwahula mo Israeli.
11 Kandi oMungu mwamubwira ati: “Niri Mungu, Omutoki w’Ebyosi, abana baghu babute n’erikanyirira. Ukendisyabya tata-kulu w’ebihanda, w’ebihanda binene, n’abami bakendisyalua omo kihanda kyaghu.*
12 N’ekihugho ekyo naha Abrahamu na Isaka, ngendikuhakyo iwe n’abana baghu.”
13 Enyuma sy’aho, oMungu mwalua ahali Yakobo, aho akanaya naye embere.
14 Neryo Yakobo mwimania enduyi, enduyi y’amabwe, omo mwanya ogho Mungu akanaya naye, amuta oko nduyi eyo k’obuhere bw’edivai n’amaghuta.
15 Yakobo mwaendelea eryahula omwanya oyo, oho oMungu akanaya naye, mo Beteli.
16 Neryo mubalua e Beteli. Ihakinasiya olughendo lulebe ibahika e Efrati, obukule bwa Rakeli mubwaluma, mubwaluma kutsibu.
17 Bwabere bwabiluma kutsibu, oyukamubutisaya mwamubwira ati: “Sighusaghe, kandi ukendibuta omwana w’obulume.”
18 Abere akasonda eritwa omutima* kundi ihakisiya hake iniahola, mwamwahula mo Benoni,* aliwe baba wiwe mwamwahula mo Benyamini.*
19 Rakeli mwahola, bamamuta oko nzira eyikaya e Efrati, ni bugha ambu e Betlehemu.
20 Yakobo mwimania enduyi oko yisinda ya Rakeli, ni nduyi eyikakanganaya ahali eyisinda ya Rakeli erihika munabwire.
21 Enyuma sy’aho, Israeli mwaluaho, amayahimba ehema yiwe abilaba oko nyumba nyiri ye Ederi.
22 Kiro kighuma, Israeli iniakine omo kihugho ekyo, Rubeni mwaghotsera na Bila, oghundi mukali wa baba wiwe. Israeli mwowa omwatsi oyo.
Yakobo abya n’abana b’obulume 12.
23 Abana b’obulume abo abuta oko Lea ni Rubeni, akambere, Simeoni, Lawi, Yuda, Isakari, na Zabuloni.
24 Abana b’obulume abo abuta oko Rakeli ni Yozefu na Benyamini.
25 N’abana abo Yakobo abuta oko Bila, omughombe mukali wa Rakeli, ni Dani na Naftali.
26 N’abana b’obulume abo Yakobo abuta oko Zilpa, omughombe mukali wa Lea, ni Gadi na Asheri. Abo b’abana b’obulume abo Yakobo abuta iniane e Padani-aramu.
27 Neryo Yakobo mwahika ewa baba wiwe Isaka, e Mamre, hakuhi ne Kiriati-arba, ni bugha ambu e Hebroni, eyo Abrahamu na Isaka bikala ng’abagheni.
28 Isaka mwabugha emyaka 180.
29 Neryo Isaka mwatwa omutima, amahola n’erihindanibwa n’abandu biwe.* Mwahola iniamabiyira emyaka minene kandi mwabya n’amaisa awuwene,* neryo abaghala biwe, ye Esau na Yakobo mubamuta.
Amaelezo awehikwa
^ Kutse “omo nzira.”
^ Kutse “mwabisabyo.”
^ Ni bugha ambu “oMungu we Beteli.”
^ Ni bugha ambu “omuti w’omwaloni w’ekiriro.”
^ Kinywa kwa kinywa, “mbindi yaghu.”
^ Kutse “engebe yiwe yikasonda erimuluamo; enafsi yiwe yikasonda erihola.”
^ Ni bugha ambu “omwana w’ekiriro kyaghe.”
^ Ni bugha ambu “omwana w’oko byala by’amali.”
^ Ebi ni binywa by’ekisosekanio ebikamaanisaya erihola.
^ Kinywa kwa kinywa, “iniabiribya musyakulu, kandi iniabiryughuta ebiro.”
