Enzuko 38:1-30
-
Yuda na Tamari (1-30)
38 Oko mughulu oyo, Yuda mwalua ahali abaghala biwe, amayahimba ehema yiwe hakuhi n’aho Hira Omuadulamu abya ikere.
2 Iniane eyo, Yuda mwalangira omumbesa Omukanana, oyukahulawamo Shua. Neryo mwamuyira mo mukali wiwe, amaghotsera naye.
3 Neryo Shua mwabya mukule, amabuta omwana w’obulume, neryo Yuda amamwahula mo Eri.
4 Kandi mwabya mukule, amabuta omwana w’obulume, n’erimwahula mo Onani.
5 Kandi mwabuta oghundi mwana w’obulume, amamwahula mo Shela. Yuda abya ikere e Akzibu omughulu Shua amubutira omwana oyo.
6 Enyuma sy’aho, Yuda mwatahirya Eri, akambere kiwe. Erina ry’omukali wa Eri ryabya Tamari.
7 Aliwe Eri, akambere ka Yuda, abya akakola ebituwene omo meso wa Yehova, neryo Yehova mwamwita.
8 Neryo ekyo mukyaleka Yuda iniabwira Onani ati: “Ukole ekyo bonde w’omundu atolere iniakola, tahaya maina* waghu, neryo mughala wenyu akendibya n’abana erilabira iwe.”
9 Aliwe Onani abya inianasi ngoko abana abo sibendisyalangirwa mo bana biwe. Neryo omughulu abya akaghotsera na maina* wiwe, iniakalabiraya ahisi obuhalya* kundi syabya anzire mughala wabo akabya n’abana erilabira iye.
10 Eby’akola byabya bibi embere sya Yehova, neryo naye oMungu mwamwita.
11 Yuda mwabwira Tamari, omwalyana wiwe, ati: “Uyikale ewenyu ng’omukwa-kali erihika omughulu mughala waghe Shela akendisyakula.” Mwabugha atya kundi abya akalengekania ati: ‘Naye anganahola ng’abaghala babo.’ Neryo Tamari mwayikala omo nyumba ya baba wiwe.
12 Habere habilaba ebiro, muka Yuda, mwali wa Shua mwahola. Yuda abere abibugha ebiro by’erimulira, mwaya e Timna eriyalebya abakatwa oko syombuli siwe k’obweya. Mwaghenda n’omwira wiwe Hira Omuadulamu.
13 Mubabwira Tamari ambu: “Tata-byala* waghu anemwerukira e Timna eriyatwa oko syombuli siwe k’obweya.”
14 Neryo mwalusya esyongyimba siwe esikakanganaya ngoko ni mukwa-kali, amaswika obusu bwiwe, amayiswika ekitambara kinene, neryo amikala oko mulango w’omuyi we Naimu, omuyi owali oko nzira eyikaya e Timna. Mwakola atya kundi mwalangira ngoko Shela abirikula aliwe babya isibalibabugha ambu abye mukali wiwe.
15 Yuda abere abimulangira, mwalw’inialengekania ati ni mumbalaka, kundi abya aniabiriswika obusu bwiwe.
16 Neryo Yuda mwakitira eyali n’erimubwira ati: “Kisi nanzire inaghotsera naghu.” Mwamubwira atya kundi abya isyasi ngoko ni mwalyana wiwe. Tamari mwamubulya ati: “Wamabighotsera naghe, ighukendimbaki?”
17 Neryo Yuda mwamusubirya ati: “Ngendisyakutumira akasuhene.” Aliwe Tamari mwamubwira ati: “Ukendimbaki ekikendikangania ngoko ukendisyanitumira akasuhene ako?”
18 Neryo Yuda mwamubulya ati: “Wanzire inakusighiraki?” Na Tamari mwamusubirya ati: “Unisighire embuka* yaghu eyikakolesibawa erihira oko kindu kw’ekikumo, akaliki kaghu, n’omutso owali omo byala byaghu.” Yuda mwamuhabyo, neryo amaghotsera na Tamari. Tamari mwabya mukule.
19 Enyuma sy’aho, mwaghenda, amalusya ekitambara kiwe kinene, amatasyambala esyongyimba siwe esikakanganaya ngoko ni mukwa-kali.
20 Neryo Yuda mwatuma mwira wiwe Omuadulamu ati atwalire omukali oyo y’akasuhene ako, n’erisubulya ebindu ebyo mukali oyo asighala nabyo. Aliwe Omuadulamu oyo mwatasunga omukali oyo.
21 Mwabulya abalume b’omo muyi oyo ati: “Omumbalaka w’ehekalu oyo wabya akabya oko musike w’endaki omo muyi ono we Naini ali hayi?” Aliwe mubamusubirya bati: “Eno kasiyiriyatabya omumbalaka w’ehekalu.”
22 N’oko nduli, mwasuba eyiri Yuda, amayamubwira ati: “Sinditamusunga. Nibya n’abalume b’omo muyi oyo mubakanibwira bati, ‘Eno siyiriyatabya omumbalaka w’ehekalu.’”
23 Neryo Yuda mwabugha ati: “Asighale nabyo tukasyahemuka. Ingye nabirikola ekyo nilue nitolere erikola. Nabiritumayo akasuhene kano, aliwe siwetamusunga.”
24 Neryo habere habilaba emisi isatu, mubasyabwira Yuda ambu: “Tamari, omwalyana waghu, abirikola obumbalaka, kandi abiriheka obukule bw’obumbalaka.” Neryo Yuda mwabugha ati: “Mumuhulukaye atimibawe.”
25 Babere bakamutwala ehihya, mwabugha ati bayabwire tata-byala wiwe ambu: “Omwinye bindu ebi yulyanihekaya obukule.” Kandi mwabugha ati bakendimubwira bati: “Kisi, lebaya ebindu ebi nga ni byandi, embuka* eno eyikakolesibwa erihira oko kindu kw’ekikumo, akaliki kano, n’omutso ono.”
26 Neryo Yuda mwalebyabyo, amabugha ati: “Asingene, n’ingye w’amakosa, kundi munatamuha Shela, mughala waghe.” N’erilua ekiro ekyo, mwatasyaghotsera naye.
27 Omughulu Tamari abuta, omo nda yiwe mwabya abahasa.
28 Omughulu abya akabuta, omwana mughuma mwahulukya ebyala biwe. Oyo wabya akamubutisya mwalw’iniaboha akaliki k’erangyi y’omusasi eyihenirye* oko byala by’omwana, n’eribugha ati: “Ono yulyatsuka eriluamo.”
29 Omwana oyo abere abinasubya ebyala biwe by’enyuma, mughala wabo naye mwalua omo nda, neryo oyo wabya akamubutisya mwabugha ati: “Mukalw’iwayitulira enzira.” Neryo mwamwahulamo Perezi.*
30 Enyuma sy’aho, mughala wabo oyo babohera oko byala biwe kw’akaliki k’erangyi y’omusasi eyihenirye* mwalua omo nda. Mubamwahula mo Zera.
Amaelezo awehikwa
^ Kutse “demai.”
^ Kutse “demai.”
^ Kutse “esperme.”
^ Kutse “Baba-mukwe.”
^ Kutse “ebage; epeta.”
^ Kutse “ebage; epeta.”
^ Kutse “ko lukula-kula; ke écarlate.”
^ Ni bugha ambu “eritulika,” alinga n’itulika rye périnée omukali akabuta.
^ Kutse “ko lukula-kula; ke écarlate.”
