Enzuko 39:1-23
39 Abaismaeli mubatwala Yozefu ye Misri. Mubamughulya Omumisri oyukahulawa mo Potifari. Abya mukulu oyukakolera omo bwikalo bwa Farao, kandi abya mukulu w’abasuda abakatsunga omwami Farao.
2 Aliwe Yehova abya haghuma na Yozefu. Neryo emyatsi yosi eyo Yozefu abya akakola muyabya ikaghenda ndeke. Kandi mwayirwa mo mwimaniri w’enyumba y’omukama wiwe, Omumisri.
3 Omukama wiwe mwalangira ngoko Yehova abya haghuma naye, kandi ngoko Yehova abya akatsumula emyatsi yosi eyo Yozefu abya akakola.
4 Omukama wa Yozefu mwamutsemera. Mwamuyiramo mughombe wiwe oyo ayiketere, neryo mwamuyira mo mwimaniri w’enyumba yiwe, n’omwimaniri w’ebindu biwe byosi.
5 Eritsuka ekiro amuyira mo mwimaniri w’enyumba yiwe n’ow’ebindu biwe byosi, Yehova mwabya akatsumula enyumba y’Omumisri oyo busana na Yozefu. Yehova mwatsumula ebyosi ebyo abya nabyo omo nyumba n’omoli.
6 Mwahika n’oko kika ky’erimuleka imanire ebindu biwe byosi. Mwatasyatsomana omwatsi wosi-wosi erilusyako akalyo akabya akalya. Kandi Yozefu mwabya n’akaghala, kandi mwabya mubuya.
7 Enyuma sy’aho, muka Potifari mwatsuka erisamalira Yozefu n’erimwanza. Neryo mwamubwira ati: “Ghotsera naghe!”
8 Aliwe mwaghana. Mwabwira muka Potifari ati: “Omukama waghe abiriniyira mo mwimaniri w’ebindu biwe byosi. Sihali ekyo akalebaya omo nyumba eno.
9 Muno simuli omukulu okw’ingye, kandi syalyatanighanira ekindu kyosi-kyosi erilusya kw’iwe, kundi uli mukali wiwe. Neryo ngenditoka niti erikola ekibi kingaha n’eki, n’erikolera oMungu y’erilolo?”
10 Obuli kiro, iniakabya inianemukania na Yozefu, aliwe Yozefu mwataligha erighotsera naye kutse erisighala naye.
11 Kiro kighuma, Yozefu mwingira omo nyumba akayakola omubiiri wiwe. Oko ndambi eyo, habya isihali omughombe n’omughuma.
12 Neryo muka Potifari mwahamba olukimba lwa Yozefu n’eribugha ati: “Ghotsera naghe!” Neryo Yozefu mwasigha olukimba lwiwe omo byala by’omukali oyo, n’eritibita ehihya.
13 Abere abilangira ngoko Yozefu abirisigha olukimba lwiwe omo byala biwe n’eritibita ehihya,
14 mwatsuka erilakira abaghombe b’omo nyumba yiwe ati: “Mwanamalangira! Mwakatuletera Omuebrania oyu abandu batoke eritusekererya. Mwakasonda erighotsera naghe, neryo mungalaka omo mulenge waghe wosi.
15 Mwakabya abilangira ngoko namabilaka, amasigha olukimba lwiwe lo hakuhi naghe, n’eritibita ehihya.”
16 Mwatalusya olukimba olo lo hakuhi naye erihika omughulu omukama wa Yozefu asuba ewiwe.
17 Omukama wa Yozefu abere abihika, omukali oyo mwamukanirya ebinywa bighumerera ebyo ati: “Omughombe Muebrania oyo ulyatuletera mwakasonda eriniyira mo kindu ky’erisekererya.
18 Aliwe mwakabya abilangira ngoko namabilaka, mwakasigha olukimba lwiwe lo hakuhi naghe, n’eritibita ehihya.”
19 Potifari mwabya abyowa omukali wiwe akabugha ati: “Ekyo kyo mughombe waghu alyanikolera,” mwahitana kutsibu.
20 Neryo omukama wa Yozefu mwamuhira omo ngomo, eyo mwami abya akabohera abandu. Neryo Yozefu mwasighala omo ngomo.
21 Aliwe Yehova mwaendelea eribya haghuma na Yozefu n’erimukangania olwanzo oluteleghula. Mwamuwatikya, neryo omukulu w’engomo amamutsemera.
22 Omukulu w’engomo mwayira Yozefu mo mukulu w’abosi abali omo ngomo. N’iye yo wabya akabaha omubiiri w’erikola omo ngomo.
23 Omukulu w’engomo mwatabya akatsomana erilebya ebyo Yozefu abya akimanira, kundi Yehova abya haghuma na Yozefu, kandi Yehova abya akatsumula ebyosi ebyo Yozefu abya akakola.
